” ජයග්‍රහණයට මට උදව් කලේ පාසලේ ගුරුවරු සහ දෙමව්පියෝ…” ජීව විද්‍යාවෙන් ප්‍රථමයා වූ සඳිති නිම්හාරා කී කතාව

2025 අප්‍රේල් 29, ප.ව. 1:21

2024 අපොස උසස් පෙළ විභාගයේ ජීව විද්‍යා ලංකාවේ ප්‍රථමයා බවට පත් වූ කුරුණෑගල මලියදේව බාලිකා විද්‍යාලයේ හෑගොඩ ආරච්චිගේ සඳිති නිම්හාරා සිසුවිය මේ වනවිට කතාබහට ලක්වන චරිතයක් බවට පත්ව තිබේ.

ඇය කුරුණෑගල යන්තම්පලාවේ පදිංචිකාරියකි. දියණියන් දෙදෙනකුගේ සහ පිරිමි දරුවකුගෙන් යුත් පවුලක වැඩිමහල් දරුවා වන සදිතිගේ පියා වෘත්තියෙන් විදුලි ඉංජිනේරුවරයෙකි. මහනුවර විදුලිබල මණ්ඩලයේ සංකීර්ණයේ විධායක ඉංජිනේරුවෙකු වන ඔහු ලක්ෂපාන විදුලි බලාගාරයේ සේවයේ නියුතුව සිටි කාලයේ එම ප්‍රදේශයේ පාසලකින් පහ වසරේ ශිෂ්‍යත්ව විභාගයට පෙනී සිටි සදිති, එම විභාගයෙන් නුවරඑළිය දිස්ත්‍රික්කයේ ප්‍රථමයා විය. එම විභාගයෙන් සමත්ව වැඩිදුර අධ්‍යාපනයට හය වසරේ සිට මලියදේව බාලිකාවට ඇතුළත් වූ ඇය සාමාන්‍ය පෙළ විභාගයෙන් ද ඉහළින් සමත්ව උසස් පෙළ ජීව විද්‍යා අංශයෙන් අධ්‍යාපනය ලබා මේ විශිෂ්ට ජයග්‍රහණය හිමි කරගෙන තිබේ.සදිතිගේ සොහොයුරා මේ වනවිට සාමාන්‍ය පෙළ විභාගයට පෙනී සිට උසස් පෙළට සූදානම් වෙමින් සිටින අතර, සොයුරිය ද මලියදේව බාලිකාවේම ඉගෙනුම
ලබයි. මව කුරුණෑගල ලක්දාස් ද මෙල් විදුහලේ ගුරුවරියක ලෙස සේවය කරන්නීය.

තම ජයග්‍රහණය ලබාගත් අයුරු ඇය මෙසේ ප්‍ර‍කාශ කළාය.

‘‘කුඩා කාලයේ ඉඳලාම මගේ බලාපොරොත්තුව තිබුණේ වෛද්‍යවරියක් වෙන්න. පාසලේදී ලබා දුන්න වැඩ එදිනෙදාම කර අවසන් කළා. පාසලේ පැවැත්වුණු වාර විභාග සියල්ලටම මම සහභාගි වුණා. විභාගය සඳහා අවශ්‍ය සැලැස්මක් මමම හදාගත්තා. තාත්තත් ඒ සඳහා උදව් කළා. අවසන් මාස හතරේ කාලසටහනකට වැඩ කළා. ඒකෙදී අමාරු විෂයන් හඳුනාගෙන ඒ සඳහා වැඩියෙන් කාලය ගත කළා. අවුරුදු විස්සක විතර පාස් පේපර්ස් හොයාගෙන ඒවත් කළා. ඒවායින් අමාරු ගැටලු හඳුනාගෙන ආපසු ඒවත් විසඳාගෙන තමයි මම විභාගයට සූදානම් වුණේ. වසර විස්සක පහුගිය ප්‍රශ්න පත්‍ර වලට කීප වතාවක්ම උත්තර සැපයුවා.ඉතාමත් උවමනාවෙන් සහ කැපවීමෙන් වැඩ කළා. විශේෂයෙන්ම සදහන් කරන්න ඕනේ මට තාත්තා හදලා දුන්නු කාලසටහනකට මම වැඩ කළා. විද්‍යාලයේ විදුහල්පති තුමිය ඇතුළු ගුරුවරුන්ගේ සහ මගේ මව්පියන්ගේ සහයෝගයෙන් මට මේ ප්‍රතිඵලය ලබාගන්න පුළුවන් වුණා.

මේ වගේ ජයග්‍රහණයක් ලබන්න මට අම්මයි තාත්තයි තමයි ගොඩාක් උදව් කළේ. ඊට අමතරව මගේ පාසලේ විදුහල්පතිනිය අපිට ජයග්‍රහණය සඳහා විශේෂ මඟපෙන්වීමක් ලබා දුන්නා. ඒ වගේම උසස් පෙළට ඉගැන්වීම් කළ ගුරුවරුත් මට ගොඩාක් උදව් කළා. මේ හැමෝටම ගොඩාක් ස්තුතියි මේ වගේ ජයග්‍රහණයක් ලබාගැනීමට මට සහාය වීම ගැන.”

හැමෝගෙම ආශිර්වාදයෙන්, විද්‍යාලයේ විදුහල්පතිතුමිය ඇතුළු ආචාර්ය මණ්ඩලයේ කැපවීමෙන් ඇය මේ ප්‍රතිඵල ලබා ගැනීම
පිළිබඳව අපි සතුටට පත් වෙනවා.අනාගතයෙ දී වෛද්‍යවරියක ලෙස රටට සේවයක් කිරීම තම එකම අභිප්‍රායෙන් සිටින සඳති දියණිය ඇගේ මේ ගමන් මගට විද්‍යාලයේ විදුහල්පති නිරෝදා අභය වික්‍රම මහත්මිය විද්‍යාලයේ විෂයන් ඉගෙන ගැනීමට උදව්
කළ ගුරුවරුන්ද ඇය සිහිපත් කළාය

‘‘පාසලේදී ලබා දුන්න වැඩ එදිනෙදාම කරලා අවසන් කළා අම්මයි, තාත්තයි තමයි ගොඩාක්ම උදව් කළේ. ඊට අමතරව මගේ පාසලේ විදුහල්පතිතුමිය අපට ජයග්‍රහණය සඳහා විශේෂ මගපෙන්වීමක් ලබා දුන්නා. ඒ වගේම උසස් පෙළට ඉගැන්වීම් කරපු ගුරු මාතාවනුත් මට ගොඩාක් උදව් කළා. මේ හැමෝටම ගොඩාක් ස්තුතියි මේ වගේ ජයග්‍රහණයක් ලබාගැනීමට මට සහාය වීම ගැන.’’