නුවර – හැටන් පාරේ රේස් පැද්ද බස් රථ දෙකක රූට් පර්මිට් කැන්සල්

2025 සැප්‍තැම්‍බර් 09, පෙ.ව. 10:10

---

---

පසුගිය (6) වනදා රාත්‍රියේ මහනුවර සිට හැටන් දක්වා අධික වේගයෙන් අන්තරාදායක ලෙස එකම දිසාවට ගමන් ගත් පෞද්ගලික බස් රථ දෙකේ ගමන් වාර විමර්ෂණයකට යටත්ව ඊයේ (08) දින සිට අත්හිටුවීමට මධ්‍යම පළාත් මාර්ගස්ථ ප්‍රවාහන අධිකාරියේ සභාපති සී. ප්‍රියංකර මහතා පියවර ගෙන ඇත.

සමාජ මාධ්‍ය හරහා එම බස් රථ දෙක මාර්ග නීති උල්ලංගණය කරමින් ධාවනය කරන අයුරු දැක්වෙන වීඩියෝවක් සංසරණය වීමත් සමඟ ඒ පිලිබදව අවධානය යොමු කල මධ්‍යම පළාත් මාර්ගස්ථ ප්‍රවාහන අධිකාරියේ සභාපතිවරයා එම බස් රථ දෙකේ ගමන් වාර විමර්ෂණය අවසන් වනතෙක් තාවකාලිකව නතර කිරීමට පියවර ගෙන ඇත.

බස් රථ දෙකම මහනුවර බස් නැවතුම්පොලේ සිට අවස්ථා දෙකකදී ගමන් ආරම්භ කර ඇති අතර, ප්‍රථමයෙන් ධාවනය වූ බස් රථය ගිනිගත්හන ප්‍රදේශයේදි හමු වීමත් සමග එම බස් රථ දෙකේ රියදුරන් හැටන් බස් නැවතුම්පොල දක්වා අධික වේගයෙන් අන්තරාදායක ලෙස බස් රථ ධාවනය කරවන අයුරු බස් රථ දෙකේ පසුපස යතුරු පැදියක පසුපස ගමන් ගත් පුද්ගලයෙකු විසින් ජංගම දුරකථනයෙන් පටිගත කර හැටන් කොට්ඨාශභාර පොලිස් අධිකාරී ප්‍රදීප් වීරසේකර මහතා වෙත පැමිණිල්ලක් වශයෙන් ඉදිරිපත් කර තිබුණි.

වහා ක්‍රියාත්මක වූ පොලිස් අධිකාරීවරයා එම බස් රථ දෙක ධාවනය කල රියදුරන් දෙදෙනා අත්අඩංගුවට ගන්නා ලෙස හැටන් පොලිසියේ රථවාහන අංශයේ නිළධාරීන් වෙත දැනුම් දීමෙන් පසු රියදුරන් දෙදෙනා හැටන් පොලිසියේ රථවාහන අංශයේ නිළධාරීන් විසින් කැදවා මාර්ග නීති උල්ලංගණය කරමින් අනතරාදායක ලෙස රිය ධාවනය කිරීම යන චෝදනා යටතේ දඩ පත් නිකුත් කරනු ලැබිය.

රංජිත් රාජපක්ෂ

---