කරුණාකර අහිමිවීමකදී ගෞරවාන්විතව නිහඬ වෙන්න ඉගෙන ගන්න – චන්දිමාල් කට අරී

2026 සැප්‍තැම්‍බර් 01, ප.ව. 7:47

---

---

පසුගියදා මුළු රටම කම්පාවට පත් කරමින් මෙලොවින් සමුගත් ජනප්‍රිය නිරූපණ ශිල්පිනී චූලා පද්මේන්ද්‍රගේ අභාවයත් සමඟ කලා ක්ෂේත්‍රය මෙන්ම මුළු සමාජ මාධ්‍ය ජාලයම දැඩි ශෝකයක ගිලී ගියා.

කෙසේ වෙතත්, එවන් සංවේදී මොහොතක පවා ඇතැම් පිරිස් සමාජ මාධ්‍ය ඔස්සේ අසංවේදී ලෙස හැසිරෙමින් සිදුකරන විවිධ ප්‍රකාශ සහ විවේචන සම්බන්ධයෙන් ප්‍රවීණ රූපලාවණ්‍ය ශිල්පී හා ඉසව් සංවිධායක චන්දිමාල් ජයසිංහ දැඩි ආවේගයකින් යුතුව සිය අප්‍රසාදය පළ කර තිබෙනවා.

සිය නිල ෆේස්බුක් ගිණුම ඔස්සේ ඉතා සංවේදී මෙන්ම ප්‍රබල සටහනක් තබමින් චන්දිමාල් පෙන්වා දෙන්නේ, යම් පුද්ගලයෙකුගේ අහිමි වීමකදී ගෞරවාන්විතව නිහඬ වීමට මිනිසුන් පුරුදු විය යුතු බවයි. තවදුරටත් ජීවතුන් අතර නොමැති අයෙකුට සෘජුව හෝ වක්‍රව අපහාස කිරීම කිසිසේත්ම මනුෂ්‍ය සහකම්පනය නොවන බවත්, තමන්ගේ විපරිත විනෝදය සමාජය ඉදිරියේ ප්‍රදර්ශනය නොකරන ලෙසත් ඔහු දැඩිව අවධාරණය කරනවා.

විශේෂයෙන්ම, මවකගේ අහිමි වීමක් ඇගේ දරුවෙකුට කොතරම් දැඩි කම්පනයක් ගෙන දෙන්නේද යන්න පිළිබඳව හෝ කල්පනා කර අහිමි වීමකදී හිස පහත් කර ශෝකය පළ කිරීමට ඉගෙන ගන්නා ලෙස ඔහු සමාජ මාධ්‍ය පරිශීලකයින්ගෙන් ඉල්ලා සිටිනවා.

චන්දිමාල් ජයසිංහ සිය සටහන අවසන් කර ඇත්තේ, “චූලා ඔබ පැතූ සාමය ඔබට ලැබේවා… ඔබට සාමකාමී සුව නින්දක්…” යනුවෙන් සිය හදපිරි ශෝකය සහ ආදරණීය සමුගැනීම සනිටුහන් කරමිනි.

සමාජයේ බොහෝ දෙනෙකුගේ අවධානයට ලක්වූ චන්දිමාල්ගේ සම්පූර්ණ ෆේස්බුක් සටහන පහතින් දැක්වේ.

“කරුණාකර අහිමි වීමකදී ගෞරවාන්විතව නිහඬ වෙන්න ඉගෙන ගන්න. මිනිස්සුන්ගේ කටවල් තියෙන්නේ නිතරම ඇරගෙන ඉන්නම නෙමේ. ඒ කටට පුලුවන් මුනිවත රකින්න. සමාජ මාධ්‍ය ඉඩට තමන්ගේ විපරිතකම නොපෙන්වා ඉන්න ඉගෙන ගන්න. අහිමි වීමකදී හිස පහත් කරලා ශෝකය ප්‍රකාශ කරන්න ඉගෙන ගන්න.

තවදුරටත් ජීවත් නොවෙන මනුස්සයෙක්ට ඍජුව හෝ අනියමාර්ථයෙන් අපහාස කරන එක මනුශ්‍ය සහකම්පනය නෙමේ. ඒ නිසා ඔබලාගේ විපරිත විනෝදය මේ මොහොතේ පුද්ගලිකව විඳින්න. ඒත් එළිපිට සමාජයක් ඉදිරියේ විනෝද වෙන්න කලින් මවකගේ අහිමි විමක් දරුවෙක්ට කොයිතරම් නම් දැඩි කම්පනයක් අත්පත් කරන්න පුලුවන් ද කියන එක ගැන හිතන්න.

චූලා ඔබ පැතූ සාමය ඔබට ලැබේවා… ඔබට සාමකාමී සුව නින්දක්…”

---