“අනේ මාව මව්බිමට ගෙන්න ගන්න” – සෞදියේ කන්න නැතිව දුක් විදින තරුණයෙක්ගෙන් හෙළිදරව්වක්

2023 මැයි 18, ප.ව. 12:02

---

---

සෞදි අරාබියේ කම්කරු රැකියාවක් සඳහා මීට වසර දෙකකට ප්‍රථම විදෙස්ගතවී ඇති වතුකරයේ තරුණයෙක් තම සේවා කාලය අවසන් වී ආපසු දිවයිනට පැමිණීමට නොහැකිව දින ගණනාවක් නිරාහාරව සිටින බව ඒෂියන් මිරර් වෙත වාර්තා වෙනවා.

ඔහු මස්කෙළිය ෆෙයාර්ලොන් වතුයායේ පදිංචි කුමාර් ඩිලික්ෂාන් නමැති 29 හැවිරිදි එක්දරු පියෙක්.

මෙරට පෞද්ගලික විදේශීය රැකියා ආයතනයකට රු. එක්ලක්‍ෂ විසිපන්දහසක මුදලක් ගෙවා විදේශ සේවා නියුක්ති කාර්යාංශයේදී ලියාපදිංචි නොවී 2021.05.09 දින සෞදි අරාබියට පැමිණි බව එම තරුණයා කියා සිටියා.

සෞදි අරාබියේ පෞද්ගලික රෝහලක කම්කරුවකු වශයෙන් රියාල් 1200 වැටුපකට රැකියාවට යවන බව පවසමින් ඒජන්සිකරුවා විසින් තමන්ව සෞදි අරාබියට එවූ බවත්, ඉන් අනතුරුව සෞදි අරාබියේ රියාත් නගරයේ මාර්ග සංවර්ධන කටයුතුවල නියැළෙන කම්කරු රැකියාවකට තමන්ව යොමු කළ බවත්, ඒ සඳහා මසකට රියාල් 600ක් සහ ආහාරපාන සඳහා අමතර රියාල් 150ක මුදලක් ලැබුණු බවත් කුමාර් ඩිලික්ෂාන් කියා සිටියා.

ශ්‍රී ලංකාවේ පෞද්ගලික විදේශ රැකියා ආයතනයට ගෙවූ මුදලට අමතරව එම ආයතනය විසින් වසරක කාලයක් මසකට රියාල් 100 මුදලක් අය කර ගන්නා බව පවසා තම සේවා කාලය අවසන් වන තෙක්ම එම මුදල කපාගත් බවද කුමාර් ඩිලික්ෂාන් පැවැසුවා.

රියාත් නගරයේ පවතින දැඩි උණුසුම් කාලගුණය හමුවේ කම්කරුවකු වශයෙන් සේවය කළ කාලය තුළ වරින්වර තමන් රෝගාතුර වූ බවත්, තම සේවා කාලය අවසන් වී තිබියදීත් තම කොන්ත්‍රාත් සමාගම විසින් තමාව ආපසු මවුරටට  යැවීමට තවත් වසරක කාලයක් සේවය කරන ලෙස කොන්ත්‍රාත්කාර සමාගම සහ පෞද්ගලික විදේශීය රැකියා ආයතනය විසින් තමන්ට බලපෑම් කරන බවද කුමාර් ඩිලික්ෂාන් කියා සිටියා.

පවත්නා තත්ත්වය සම්බන්ධයෙන් තමන් සෞදි අරාබියේ තානාපති කාර්යාලය වෙත අවස්ථා කිහිපයකදී පැමිණිලි කළද එම කාර්යාලයෙන් තමන්ට කිසිදු ප්‍රතිචාරයක් නොදැක්වූ බවත්, එම කාර්යාලයේ තමන් මෙන් අසරණ වී සිටින ශ්‍රී ලාංකික තරුණයන් කිහිපදෙනකු රැඳී සිටින බවද කුමාර් ඩිලික්ෂාන් පැවැසුවා.

රියාත් නගරයේ තම මිතුරකු රැකියා කරන ස්ථානයේ දැනට තාවකාලිකව නතර වී සිටින බවත්, තමන් සතුව කිසිදු මුදලක් නොමැති නිසා තමන් දින ගණනාවක් නිරාහාරව කුසගින්නේ සිටින බවත් තමන් යළිත් මවුරටට ගෙන්වා ගන්නා ලෙස බලධාරීන්ගෙන් ඉල්ලා සිටින බවත් හෙතෙම තවදුරටත් ප්‍රකාශ කළා.

හැටන් – රංජිත් රාජපක්ෂ

---