hit counter

2024 මාර්තු මස 28 වන බ්‍රහස්පතින්දා

2023 අප්‍රේල් 26, පෙ.ව. 10:26



උණ රෝගයට ගොදුරුව සිටි හත් හැවිරිදි දැරියකට පැරසිටමෝල් අධිමාත්‍රාවක් ලබා දීම නිසා ඇය මරණයට පත්ව ඇති බව ගම්පොළ රෝහල් හදිසි මරණ පරීක්ෂක නලින් ඒ. මැදිවක විසින් සිදුකළ මරණ පරීක්ෂණයකදී අනාවරණය වුණා.

මෙසේ මියගොස් ඇත්තේ උඩහේන්තැන්න, උඩුවැල්ල, තාමරවල්ලි ජනපදයේ පදිංචි රන්කොත්පේඩි ගෙදර ශාමලී තරුෂි නමැති දැරියයි.

ඇය උඩුවැල්ල කණිෂ්ඨ විද්‍යාලයේ 2 වසර පන්තියේ ඉගෙනුම ලබමින් සිටි ශිෂ්‍යාවක්.

ඇගේ මවුපියන් ගම්පොළ කුරුඳුවත්ත රෝහලින් ඇයට දෙවරක් බෙහෙත් රැගෙන දී තිබුණා.

වෛද්‍යවරයා විසින් ලබා දී ඇති අදාළ නියමිත මාත්‍රාව වෙනුවට රෝහලේ ඖෂධහලෙන් සටහන්කොට ලබා දී ඇති වැඩිහිටි මාත්‍රාවක් ළමයාට ලබා දීම නිසා මෙම අධිමාත්‍රාව දැරියට ලැබී තිබෙන බව හෙළි වී තිබෙනවා.

කුරුඳුවත්ත රෝහලෙන් දිනකට රෝගීන් හයසියයක් පමණ ප්‍රතිකාර සඳහා පැමිණෙන අතර ඔවුන්ට ඖෂධ ලබා දීමට සිටින්නේ එක් ඖෂධවේදියෙකු බව පැවසේ. එසේ ම, පෙති වර්ග දැමීමට රෝහලට අවශ්‍ය දවටන හෝ කවර නොමැති අතර එම ඖෂධ වර්ග ලබා දෙන්නේ පරණ ලයිට් බිල් හෝ කඩදාසිවල දවටමින්.

රෝගීන් වැඩි නිසා පැරසිටමෝල් වැනි බොහෝ බෙහෙත් වර්ග කලින් ම කොළවල ඔතා සකස් කර තබා රෝගීන්ට දීම සිදුකරන්නේ ඖෂධ ගන්නා ආකාරය ද සටහන් කර තැබීමෙන්.

වැඩිහිටියන්ට අවශ්‍ය මාත්‍රාවන් එසේ ලියා තිබුණ ද ළමුන් පැමිණි විට එම කොලේ පිට පැත්තේ එම මාත්‍රාව ලියා දීම සිදුකර තිබෙනවා.

ඒ ආකාරයට හත් හැවිරිදි මෙම දරුවාට ද ඖෂධ ලබා දී ඇති අතර මවුපියන් සිදුකර ඇත්තේ එම කොළයේ ඇතුළත සටහන් කර තිබූ වැඩිහිටි මාත්‍රාව මෙම ළමයාට දීමයි.

මේ ආකාරයට දරුවාට උණට බෙහෙත් ගත්ත ද පසුව බඩේ අමාරුවක් සෑදී ඇති අතර මවුපියන් විසින් 22 දින යළි එම දරුවා ගම්පොළ රෝහලට රැගෙනවිත් ඇත්තේ ඉතා අසාධ්‍ය තත්ත්වයට පත්වීමෙන්.

එහිදී දරුවා දැඩි සත්කාර ඒකකයට යොමු කිරීමට වෛද්‍යවරුන් පියවර ගෙන තිබුණ ද ගම්පොළ, පේරාදෙණිය, නාවලපිටිය හෝ මහනුවර රෝහල්වල එම ඇඳන් හිස්ව නොතිබූ නිසා දරුවා රාගම රෝහලට රැගෙන යාමට කටයුතු කර තිබෙනවා.

ඒ අතර දරුවා දැඩි ලෙස දැඟලීම නිසා පියාගේ කැමැත්ත රැගෙන දරුවා නිර්වින්දනය කොට ඇති අතර එදින රාත්‍රි 7.30ට පමණ දරුවා ගම්පොළ රෝහලේදී ම මියගොස් තිබෙනවා.

ඒ අනුව, පශ්චාත් මරණ පරීක්ෂණ කටයුතු සඳහා දරුවාගේ සිරුර මහනුවර මහ රෝහල වෙත 23 දින රැගෙන ගිය අතර එහිදී අනාවරණය වී ඇත්තේ අක්මාවට සිදුවූ බරපතළ හානි නිසා දරුවා මියගොස් ඇති බවයි.

එහිදී විශේෂඥ අධිකරණ වෛද්‍ය නිලධාරිනි සී.යූ. වික්‍රමසිංහ මියගිය දැරියගේ ශරීර කොටස් වැඩිදුර පරීක්ෂණ කටයුතු සඳහා රසායනාගාර පරීක්ෂණයකට ද යොමුකර තිබෙනවා.

ගම්පොළ රෝහල් හදිසි මරණ පරීක්ෂක නලින් ඒ. මැදිවක ගම්පොළ රෝහලේදී මරණ පරීක්ෂණ කටයුතු සිදුකළ අතර එහිදී කුරුඳුවත්ත පොලිසියේ පොලිස් කොස්තාපල් තේනුවරගේ (73444) මෙහෙයවීම මත මියගිය දැරියගේ පියා වන එරංග සමීර කරුණාරත්න (32) හා මව වන ජයසිංහගේ මල්ලිකා රාජපක්ෂ යන අය සාක්ෂි ලබාදෙන ලදී.

මෙහිදී මරණ පරීක්ෂකවරයා මෙම මරණයට හේතු ලෙස උණ රෝගයට අධිමාත්‍රාවෙන් පැනඩෝල් ලබා දීම, අක්මාවට හානි වීම හා රෝහල්ගත කර සිහිනැති කර සිටියදී මිය යාම යන කරුණු දක්වා තිබෙනවා.