hit counter

2024 මාර්තු මස 29 වන සිකුරාදා

2023 මැයි 01, පෙ.ව. 1:06



වැසි තත්ත්වයත් සමඟ දකුණු පළාත තුල මී උණ රෝගය දරුණු වසංගතයක් ලෙස ව්‍යාප්ත වෙමින් පවතිනවා.

ගාල්ල දිස්ත්‍රික්කයෙන් මේ වසරේ ගතවූ කාලය තුල මී උණ හේතුවෙන් පුද්ගල මරණ 19ක් වාර්තා වී තිබෙනවා.

ගාල්ල දිස්ත්‍රික්කයේ ප්‍රජා වෛද්‍ය විශේෂඥ අමිල චන්ද්‍රසිරි මහතා මෙසේ අදහස් දක්වා සිටියා,

“මී උණ රෝගය මේ වන විට ගාල්ල සහ මාතර දිස්ත්‍රික්ක වල ඉතා බිහිසුණු වසංගතයක් ලෙස පැතිර යමින් පවතිනවා. 2023 වර්ෂයේ මේ වන විට ගාල්ල දිස්ත්‍රික්කයෙන් රෝගීන් 229 මරණ 19ක් වාර්තා වී තිබෙනවා. ගොවි මහත්වරුන්ට පමණක්ම නෙවෙයි මේ රෝගය වැළඳෙන්නේ. පෙදරේරු මහත්වරුන් කසළ ඉවත් කරන කම්කරුවන් ඒ වගේම කුරුඳු සහ තේ ආශ්‍රිත කර්මාන්තවල වගාවන්වල නිරත වන අය සහ පාසල් සිසුන් මෙවර වසංගතයේ අවධානම් කණ්ඩායම් ලෙස අපි හඳුනාගෙන තිබෙනවා. ඩොක්සි සයිට්ලින් නම් ඖෂධය නියමිත වෛද්‍ය උපදෙස් හා නියමිත මාත්‍රාව අනුව ලබා ගැනීම තුලින් මේ රෝගයෙන් බේරී ඉන්නට පුළුවන්.”

මේ අතර පවතින වැසි තත්වය හමුවේ ඩෙංගු රෝගීන්ගේ ඉහළ යාමක් දක්නට ඇතැයි ජාතික ඩෙංගු මර්ධන ඒකකය පවසනවා.

මෙවැනි පසුබිමක ඩෙංගු මර්ධනය කිරීම සඳහා බිම් මට්ටමේ සේවය කරන සේවකයින්ට සහ නිලධාරීන්ට අවශ්‍ය පහසුකම් ලබා දිය යුතු බව ශ්‍රී ලංකා මහජන සෞඛ්‍ය පරීක්ෂක සංගමය පෙන්වා දෙනවා.

ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා මෙසේ අදහස් දක්වා සිටියා.

“ඉදිරි කාලය තුළ රට තුළ ඩෙංගු අධි වසංගත තත්වයක් ඇතිවීමේ බරපතල අවදානමක් තියෙනවා කියන එක මහජනතාවට අනතුරු අඟවන්න ඕන. ඩෙංගු රෝගය වැඩි වෙනකොට ඩෙංගු රෝගය වැඩි වෙනවා කියන්නේ ජාතික ඩෙංගු මර්ධන ඒකකයක් අවශ්‍ය නැහැ. බිම් මට්ටමේ මේ කරන ක්ෂේත්‍ර නිලධාරීන්ට කිසිඳු පහසුකම් සැපයීමක් නැතුව ජාතික ඩෙංගු මර්දන ඒකකය බලාපොරොත්තු වෙනවා කෑම පාර්සලයක් එහෙම නැත්නම් තේ වේලක් දීලා මේ රටේ ඉන්න සාමාන්‍ය මිනිස්සු ඩෙංගු මර්ධනය සඳහා යොදාගන්න. ඒක ප්‍රායෝගිකව බිම් මට්ටමේ සිද්ධ වෙන්නේ නැහැ. පිටු ගණන් චක්‍රලේඛ සෞඛ්‍ය නිලධාරී කාර්යාලවලට නිකුත් කරලා ඒ වගේම ඉහළම ඉංග්‍රීසි වලින් මේ චක්‍රලේඛ නිකුත් කරලා ඩෙංගු රෝගය මර්දනය වෙයි කියලා ජාතික ඩෙංගු මර්ධන ඒකකය බලාපොරොත්තු වෙනවා නම් ඒක වෙන්නේ නැහැ. අවශ්‍ය රසායන ද්‍රව්‍ය ඒ වගේම අවශ්‍ය පහසුකම්, අවශ්‍ය ඉන්ධන වැනි දේ සපයන්න.”