තෙල් වැඩියෙන් ගහගත්තු අය මාට්ටු වෙයි – පොලීසියෙන් අලුත් වැඩක්

2022 මැයි 29, පෙ.ව. 4:46

වැඩි වාර ගණනක් පිරවුම්හල් මගින් ඉන්ධන ලබාගෙන තොග රැස් කරන්නන් 2300 කට වැඩි පිරිසක් මේ වනවිට හඳුනාගෙන තිබෙනවා.

ඒ එකම දිනකදී වැඩි වාර ගණනක් පිරවුම්හල් මගින් ඉන්ධන ලබාගන්නා පුද්ගලයින් සෙවීම සඳහා හඳුන්වාදුන් නව යෙදවුම භාවිතයට ගනිමින්.

වැඩි වාර ගණනක් එකම වාහනය මගින් ඉන්ධන පිරවුම්හල් වලින් ඉන්ධන ලබා ගනිමින් එක්රැස් කර ගැනීම සම්බන්ධයෙන් පොලීසියට ලැබී ඇති පැමිණිලි සැලකිල්ලට ගනිමින් මෙම නව යෙදවුම නිර්මාණය කර තිබෙනවා.

ශ්‍රී ලංකා පොලීසියේ පරිගණක අංශයේ මෘදුකාංග සංවර්ධන නිලධාරියෙකු ලෙස කටයුතු කරන පොලිස් කොස්තාපල් මහේෂ් රණතුංග මහතා විසිනුයි මෙම නව යෙදවුම නිර්මාණය කර ඇත්තේ.

ශ්‍රී ලංකා පොලීසියේ පරිගණක අංශයේ අධ්‍යක්ෂ ජ්‍යෙෂ්ඨ පොලිස් අධිකාරි අශෝක ධර්මසේන මහතා කියා සිටියේ පොලිස් කොට්ඨාශ 48 ක් ආවරණය වන පරිදි ඉන්ධන පිරවුම්හල් 1350 කට මෙම නව යෙදවුම ලබාදී ඇති බවයි.

මේ අතර ඉන්ධන පිරවුම්හල් අසල මාර්ග අවහිර කරමින් ඉන්ධන ප්‍රවාහනයට සහ මහජනතාවගේ දෛනික කටයුතුවලට බාධා කරන සංවිධානාත්මක පිරිසක් පිළිබඳව ද අනාවරණය වී ඇති බව විදුලිබල හා බලශක්ති අමාත්‍ය කංචන විජේසේකර මහතා සඳහන් කළා.