ඖෂධ හිගයක් ගැන හෙළිදරව්වක්

2026 ජූනි 18, පෙ.ව. 12:22

සෞඛ්‍ය අමාත්‍යාංශයේ නිල දත්තවලට අනුව, රජයේ සෞඛ්‍ය පද්ධතිය තුළ අත්‍යවශ්‍ය සහ ප්‍රමුඛතා ඖෂධවල බරපතල හිඟයක් පවතින බව වාර්තා වේ.

සෞඛ්‍ය වෘත්තිකයන්ගේ සංගමයේ සභාපති රවී කුමුදේශ් පවසන්නේ 2026 ජුනි 16 දින ඖෂධ තොග කළමනාකරණ පද්ධතිය හරහා යාවත්කාලීන කරන ලද දත්ත අනුව, වෛද්‍ය සැපයුම් අංශය විසින් කළමනාකරණය කරනු ලබන ඖෂධ සැපයුමේ සැලකිය යුතු හිඩැස් පවතින බවයි.

වාර්තාවට අනුව, අත්‍යවශ්‍ය ඖෂධ අයිතම 13න් 2ක් (15.38%) වෛද්‍ය සැපයුම් අංශය (MSD) මට්ටමින් සම්පූර්ණයෙන්ම තොගයෙන් හිස්ව පවතී. ජීවිතාරක්ෂක ඖෂධවල මෙවැනි හිඟතා රෝගී සත්කාර සඳහා බරපතල අවදානමක් ඇති කරන බව නිලධාරීහු පෙන්වා දෙති. ඊට අමතරව, ප්‍රමුඛතා ඖෂධ අයිතම 618න් 137ක් (22.17%) MSD මට්ටමින් ලබාගත නොහැකි බවද වාර්තා වේ.

මෙය ප්‍රමුඛතා ඖෂධ පහෙන් එකකට ආසන්න ප්‍රමාණයක් හිඟව පවතින තත්ත්වයක් ලෙස සැලකේ. තවද, ප්‍රමුඛතා ඖෂධ අයිතම 116කට මාසයකට පමණක් ප්‍රමාණවත් තොග ඉතිරිව ඇති අතර, තවත් අයිතම 59කට මාස 1 සිට 2 දක්වා ප්‍රමාණවත් තොග පවතී.

සමස්තයක් ලෙස, ප්‍රමුඛතා ඖෂධ අයිතම 175ක් (28.3%) ඉදිරි මාසවලදී අවසන් වීමේ ඉහළ අවදානමකට මුහුණ දී ඇති බව දත්ත පෙන්වා දෙයි.

සෞඛ්‍ය අංශයේ පාර්ශවකරුවන් අවධාරණය කරන්නේ රෝගීන්ට අඛණ්ඩ ප්‍රතිකාර ලබාදීම සඳහා ජාත්‍යන්තර ප්‍රමිතීන්ට අනුව ආරක්ෂිත තොග පවත්වා ගැනීම අත්‍යවශ්‍ය බවයි.

ප්‍රසම්පාදන ප්‍රමාද, ටෙන්ඩර් ගැටලු සහ සැපයුම් දාම බාධා මෙවැනි හිඟතාවන්ට හේතුවී ඇත්දැයි සෞඛ්‍ය අමාත්‍යාංශය හා වෛද්‍ය සැපයුම් අංශය විසින් පැහැදිලි කිරීමක් ලබාදිය යුතු බවද ඉල්ලා සිටී.

ඉතා අඩු තොග සහිත ඖෂධ සඳහා හදිසි සැලසුම් ක්‍රියාත්මකද, රෝහල් මට්ටමින් විකල්ප ඖෂධ භාවිතා කරන්නේද යන්න පිළිබඳවද ප්‍රශ්න මතුවී ඇත. මෙම තත්ත්වය රටේ ඖෂධ සැපයුම් දාමය සම්බන්ධයෙන් ශක්තිමත් සැලසුම්කරණය, විනිවිදභාවය සහ වගවීම අත්‍යවශ්‍ය බව නැවතත් ඉස්මතු කරයි.