සභාපතිට ලක්ෂ 5ට වැඩි විශේෂ දීමනාවක්! වැඩසටහන් 80ක් නොමිලේ විකාශය කරලා! රූපවාහිනී සංස්ථාවේ පාඩු පිට පාඩු ලැබූ හැටි

2023 අප්‍රේල් 06, පෙ.ව. 4:25

---

---

ගාස්තු අය කිරීමකින් තොරව වැඩසටහන් 80 ක් විකාශනය කිරීම හේතුවෙන් ශ්‍රී ලංකා රූපවාහිනී සංස්ථාවට රුපියල් තුන් කෝටියකට වැඩි මුදලක් 2020 වර්ෂයේදී අහිමිව ගොස් ඇතැයි ජාතික විගණන කාර්යාලය නිකුත් කළ වාර්තාවක සඳහන් වනවා.

මෙම වැඩසටහන් වෙනුවෙන් පැය 119 කට වැඩි ගුවන් කාලයක් වැය කර තිබූ බවද එම වාර්තාවේ දැක්වෙනවා.

මේ අතර රූපවාහිනී සංස්ථාවේ  ප්‍රධාන කාර්යාලය පවත්වාගෙන යන කොළඹ 7 බෞද්ධාලෝක මාවතේ පිහිටි අක්කර 8 ක පමණ ඉඩම  සහ ගොඩනැගිලි සංකීර්ණයේ නෛතික අයිතිය පවරාගෙන එහි වටිනාකම මූල්‍ය ප්‍රකාශනවලට ඇතුළත්  කිරීමට සංස්ථාව අපොහොසත්ව තිබූ බවද එහි සඳහන්.

එසේම රුපියල් හත් කෝටි අසූ හතර ලක්ෂයකට වැඩි මුදලක ණය ගැතියන් 153 දෙනකුට එරෙහිව  සංස්ථාව නීතිමය ක්‍රියාමාර්ග ගෙන නොතිබූ බව විගණන අංශ පෙන්වා දෙනවා.

ඉතාලිය සහ යුරෝපයේ මැදිරියක රූපවාහිනී නාලිකාවක් චන්ද්‍රිකා තාක්ෂණය ඔස්සේ පවත්වාගෙන යෑමට රූපවාහිනී සංස්ථාව  රුපියල් තිස් හතර ලක්ෂයකට වැඩි මුදලක් පෞද්ගලික සමාගමකට මුදල් අමාත්‍යාංශ එකඟතාවයෙන් තොරව ගෙවා තිබුණද 2015 වර්ෂයෙන් පසු එම කාර්යය සම්පූර්ණයෙන්ම අතහැර දමා තිබූ බව පවසන විගණන කාර්යාලය එම අත්තිකාරම අයකරගැනීමට 2020 වර්ෂය අවසානය දක්වා කටයුතු කර නොතිබූ බවද සඳහන් වනවා.

මේ අතර රූපවාහිනි සංස්ථාවේ ස්ථිර තනතුරු පුරප්පාඩු එකසිය අසූ දෙකක් හා වැඩ බලන තනතුරු 28 ක් 2020  වර්ෂය අවසානය දක්වා පැවතුණු බව විගණන වාර්තාවේ සඳහන්.

තවද සංස්ථාවේ සභාපතිවරයාට ගෙවිය යුතු දීමනාවට අමතරව පන් ලක්ෂ හතළිස් අට දහසක විශේෂ දීමනා හා වෙනත් දීමනා 2020 වර්ෂයේදී ගෙවා තිබූ බව පවසන විගණන කාර්යාලය ප්‍රවාහන සහ ඉන්ධන දීමනාවට හිමිකම් නොමැති නිලධාරීන් අනු නව දෙනකුට රුපියල් කෝටියකට ආසන්න මුදලක් දීමනා වශයෙන් ගෙවා තිබූ බවද වාර්තා වනවා.

---