අවාරයේ සිරිපා කරුණාව ගැන තීන්දුවක් ගන්න සූදානම්

2023 අප්‍රේල් 20, පෙ.ව. 10:07

අවාරයේ සිරිපා වන්දනාවේ යන විවිධ කණ්ඩායම් නිසා වන සතුන්ට මෙන්ම පරිසරයටද ගැටලු රැසක් ඇතිව තිබෙන බැවින් ඉදිරියේදී යම් රාජ්‍ය අනුමැතියකට යටත්ව අධ්‍යාපන කටයුතු විදේශ සංචාරකයන් සහ වෙනත් පුරාණ සිරිත් විරිත්වලට යටත්ව ඇති බාර හාර ආදිය සඳහා වන්දනා කටයුතුවල නිරතවන්නන්ට පමණක් අවාරයේ සිරිපා වන්දනාවට අවසර දීම යෝග්‍ය බවත් ශ්‍රී  පාදස්ථානාධිපති, උෟව වෙල්ලස්ස විශ්වවිද්‍යාලයේ කුලපති රත්නපුර දිසාවේ ප්‍රධාන සංඝනායක පැල්මඩුල්ල රාජමහා විහාරය හා රත්නපුර පොත්ගුල් රාජමහා විහාරය යන උභය විහාරාධිපති ඌව වෙල්ලස්ස විශ්වවිද්‍යාලයේ කුලපති, රත්නපුර දිසාවේ ප්‍රධාන සංඝනායක, බෙන්ගමුවේ ධම්මදින්න නාහිමියෝ පැවසූවා.

මෙවර සිරිපා වන්දනා වාරයේ සමාප්තිය සනිටුහන් කරමින් සධාතුක කරඬුව හා සමන් දේව ප්‍රතිමාව රැගත් රිය පෙරහර ලබන මස වෙසක් පුර පසළොස්වක පොහෝ දිනයෙන් පසු දින ගෞතම ශ්‍රී  පාදස්ථානයේ සිට පැල්මඩුල්ල ගල්පොත්තාවල ශ්‍රී  පාද රාජමහා විහාරය වෙත වැඩම කරවීමට නියමිත පෙරහර සංවිධානය කටයුතු සම්බන්ධයෙන් සබරගමුව පළාත් ආණ්ඩුකාර ටිකිරි කොබ්බෑකඩුව හා රත්නපුර දිස්ත්‍රික් ලේකම් වසන්ත ගුණරත්නගේ ප්‍රධානත්වයෙන් රත්නපුර දිස්ත්‍රික් ලේකම් කාර්යාලයේදී පැවැති සාකච්ඡාවේදී අදහස් දක්වමින් උන්වහන්සේ පැවැසූවා.

එහිදී වැඩිදුරටත් අදහස් දැක්වූ බෙංගමුවේ ධම්මදින්න නාහිමියෝ, 2022/2023 වර්ෂයේ ශ්‍රී  පාද වන්දනා වාරය 2022 වර්ෂයේ දෙසැම්බර් මස 07 වැනි දිනට යෙදුණු උඳුවප් පුර පසළොස්වක පොහෝ දින ආරම්භ වී ලබන වෙසක් පොහෝ දිනෙන් අවසන් වෙනවා. සෑම වසරකම වෙසක් පොහොය දිනෙන් පසු එම වර්ෂයේ එළැඹෙන දෙසැම්බර් මස පොහොය දිනය දක්වා ශ්‍රී  පාද වන්දනාවේ අවාරය ලෙස දුරාතීතයේ පටන් පැවැතගෙන එනවා. ශ්‍රී පාද වන්දනා වාරය සමයේ මිනිසුන්ට එය කරුණා කිරීමට ඉතාම උචිත ලෙස පරිසරයක් පවතිනවා. අවාර සමයේදී අධික වැසි, අධික සුළං වැනි ශ්‍රී  පාදස්ථානයට ප්‍රවේශ වීමට අපහසු පරිසර තත්ත්වයක් පැවැතීම මෙලෙස වාර සහ අවාර ලෙස නම් කිරීමට හේතු වී තිබෙනවා. ශ්‍රී  ශ්‍රී  පාද වන්දනා වාරයේ ඇති විදුලිය, ජලය, මහජන ආරක්ෂාව, සෞඛ්‍ය සේවා, ආහාර පාන සැපයුම යනාදිය අවාර කාලයේ නොමැති බවද පාදස්ථානාධිපති හිමියෝ පැවැසූවා.

මෙම විශේෂ සාකච්ඡාවේදී අදහස් දැක්වූ සබරගමු පළාත් ආණ්ඩුකාරවර ටිකිරි කොබ්බෑකඩුව පැවසුවේ, ඇතැම් පුද්ගලයන් අවාරයේ ශ්‍රී  පාදයට පැමිණීම නිසා ගැටලු රැසක් පැන නැඟී ඇති බවයි. එමෙන්ම ත්‍රාසය හා වීරත්වය ප්‍රදර්ශනය කිරීම වෙනුවෙන් ඇතැම් පුද්ගලයන් අවාරය තුළ ශ්‍රී  පාද තරණය සඳහා පෙලඹී ඇති බවද ආණ්ඩුකාරවරයා පැවැසුවා.

මෙහිදී අදහස් දැක්වූ රත්නපුර දිස්ත්‍රික් ලේකම් වසන්ත ගුණරත්න, ඇතැම් පුද්ගලයන් අවාරයේ ශ්‍රී  පාදය වෙත පැමිණීම නිසා ගැටලු මතුවී ඇති බවට නායක ස්වාමීන් වහන්සේ පෙන්වා දුන් කරුණු පිළිබඳ විශේෂ අවධානයක් යොමුකර යම් යම් සීමාවන් පැනවීමට ඇති හැකියාව පිළිබඳ කඩිනමින් සොයා බලා අවශ්‍ය පියවර ගන්නා බව පැවැසුවා.

මෙම අවස්ථාවට ගෞරවනීය මහා සංඝරත්නය, සබරගමු පළාත් ප්‍රධාන ලේකම් මහින්ද එස්.වීරසූරිය, රත්නපුර අතිරේක දිස්ත්‍රික් ලේකම් බී.ටී.ජී.අයි. කරුණාරත්න, අතිරේක දිස්ත්‍රික් ලේකම් ජී.ඩී.එල්. උදය කුමාරි, රත්නපුර ජේ‍යෂ්ඨ පොලිස් අධිකාරි සේනක වීරසිංහ, සබරගමුව මහ සමන් දේවාලයේ බස්නායක නිලමේ මිගාර ජයසුන්දර බණ්ඩාර, රත්නපුර හා නුවරඑළිය ප්‍රාදේශීය ලේකම්වරුද, කුරුවිට යුද හමුදා කඳවුරෙහි නිලධාරීන් ඇතුළු අත්‍යවශ්‍ය සේවාවන් සපයන රාජ්‍ය ආයතනවල ප්‍රධානීන්ද රාජ්‍ය නොවන සංවිධානවල නියෝජිතයෝ පිරිසක්ද සහභාගි වූවා.