උච්චමුනෙයි දූපතට වෙච්ච දෙයක්! මුළු දූපතම ස්විස් සමාගමට – දූපත් ජනතාව ගැනත් තීරණයක්

2022 මැයි 14, ප.ව. 9:26

---

---

කල්පිටියේ උච්චමුනෙයි දූපත ස්විට්සර්ලන්තයේ පෞද්ගලික සමාගමකට බදු දී ඇතැයි වාර්තා පළ වුණා.

ඒ අනුව එම දූපත බදු දීමෙන් ශ්‍රී ලංකාවට අමෙරිකානු ඩොලර් මිලියන 417.5 ක් ලැබී තිබෙනවා.

කල්පිටිය උච්චමුනෙයි සම්පූර්ණ දූපතම අදාළ සමාගමට බදු දී ඇති බවයි අප කළ සොයා බැලීමේදී හෙළිවුණා.

ඒ අනුව එම දූපත බදු දී ඇත්තේ වසර 30 ක් සඳහායි. ඒ හෝටල් ව්‍යාපෘතියක් සඳහා වනවා.

2020 වසරේ අග භාගයේදී ඊට අනුමැතිය ලැබී ඇති අතර ගිවිසුමට අත්සන් තබා ඇත්තේ පසුගිය 11 වනදායි.

ඇමති අනුමත කරලා

මේ සම්බන්ධයෙන් රට තුළ දැඩි කථාබහක් මතුව ඇත්තේ අග්‍රාමාත්‍යවරයෙකු හෝ ඇමති මණ්ඩලයක් නොමැති අවස්ථාවක මෙවැනි ගිවිසුමකට අත්සන් තැබුවේ කෙසේද යන්න සමාජයේ දැඩි කතාබහක් ඇතිව තිබෙනවා.

ඒ සම්බන්ධයෙන් අදහස් පළ කරමින් සංචාරක සංවර්ධන අධිකාරියේ අධ්‍යක්‍ෂ ජනරාල් ධම්මිකා විජේසිංහ මහත්මිය ප්‍රකාශ කළේ එම දූපත බදු දීම පිළිබඳ සංචාරක සංවර්ධන අධිකාරියේ අධ්‍යක්ෂ මණ්ඩලයේ අනුමැතිය ලැබී තිබූ බවත් එය 2020 ජනවාරි මාසයේ අනුමත කර ඇති බවත්ය.

ඇය පෙන්වා දෙන්නේ නිශ්චල දේපලක් බදුදෙන විට අමාත්‍යවරයාගේ අනුමැතිය ගත යුතු බවත් ඒ අනුව අමාත්‍යවරයාගේද අනුමැතිය ලැබී තිබූ බවයි.

එම බදු ගිවිසුම අත්සන් කර ඇත්තේ සියලු අනුමැතිවලට යටත්ව බවයි අධ්‍යක්‍ෂ ජනරාල්වරිය සඳහන් කළේ.

දූපතට විකුණා නෑ

එම ගිවිසුම දූපත විකිණිමක් නොවන බවත් සංචාරක කටයුතු සඳහා සුදුසු ඉඩම් පවරා ගෙන සුදුසු අයෝජකයින්ට බදු දීම අධිකාරියට අයත් වගකීමක් බවත්

අදාල ස්විට්සර්ලන්තයේ පෞද්ගලික සමාගම එම දූපත නිරීක්ෂණය කර ඊට අදාලව අයෝජන සැලසුමක්ද ලබා දී තිබෙනවා.

පසුව සම්පූර්ණම දූපත අමෙරිකානු ඩොලර් මිලියන 417 ක් ලබා දීමට කැමැත්ත පළ කර තිබෙනවා.

දූපත්වාසීන්ට වෙන දේ

ඒ අනුව ව්‍යාපෘතිය මගින් පරිසර හිතකාමී හෝටල් ව්‍යාපෘතියක් ආරම්භ කිරීමට සැලසුම් කර තිබෙන අතර එම දූපතේ පදිංචි ධීවර ප්‍රජාව කිසිවෙකු ඉවත් නොකිරීමටයි තීරණය කර ඇත්තේ.

එම දූපතේ ධීවර පවුල් 200 ක් පමණ සිටින බවයි වාර්තා වන්නේ.

කෙසේ වෙතත් එම ධීවර පවුල් අදාල ව්‍යපෘතියේම කොටස් කරුවන් ලෙස සම්බන්ධ කර ගැනීමට අදාල අයෝජන සමාගම තීරණය කර තිබෙනවා.

මේ අතර කල්පිටිය, උච්චමුනෙයි දූපත විදෙස් රටකට විකුණා ඇති බවට පසුගිය දිනක සමාජ මාධ්‍ය ජාල ඔස්සේ ප්‍රචාරය වූ වාර්තා සම්බන්ධයෙන් ශ්‍රී ලංකා සංචාරක සංවර්ධන අධිකාරිය (SLTDA) කරුණු පැහැදිලි කර තිබෙනවා.

එම ප්‍රකාශය පහතින්,

නිසි ක්‍රියා පටිපාටියකින් තොරව ඉඩම් විදේශීය ආයෝජකයින්ට විකුණා ඇති බවට විවිධ මාධ්‍ය හෙළිදරව් කිරීම් සහ වාර්තා ප්‍රසිද්ධියේ සාවද්‍ය තොරතුරුවලට තුඩු දෙයි. එබැවින් ශ්‍රී ලංකා සංචාරක සංවර්ධන අධිකාරිය (SLTDA) ඒ සම්බන්ධයෙන් කරුණු පැහැදිලි කිරීමට බලාපොරොත්තු වේ.

අදාළ උච්චමුනෙයි දූපත විකුණා නොමැති අතර, අවශ්‍ය සෘජු විදේශ ආයෝජන (FDIs) ගෙන ඒමේ උත්සාහයක් ලෙස විදේශීය ආයෝජකයෙකුට වසර 30 ක කාලයක් සඳහා බදු ගිවිසුමක් අත්සන් කරන ලදී. SLTDA සඳහා ආදායම වන්නේ බදු කුලියයි. බදු කුලිය පදනම් වී ඇත්තේ ගිවිසුම අවසන් කරන ලද 2020 ඔක්තෝම්බර් මාසයේදී සිදු කරන ලද රජයේ තක්සේරු දෙපාර්තමේන්තුව විසින් සපයන ලද වටිනාකම මතය. ප්‍රකාශිත ඩොලර් මිලියන 417.5 ක් යනු අදියරෙන් අදියර ක්‍රියාත්මක කෙරෙන සංචාරක ව්‍යාපෘතියක් සඳහා ආයෝජකයා විසින් ඇස්තමේන්තු කර ඇති ව්‍යාපෘති පිරිවැයයි. ව්‍යාපෘතිය ආරම්භ කළ හැක්කේ වෙරළ සංරක්ෂණය, පරිසර අධිකාරිය ඇතුළු රේඛීය ආයතනවලින් අවශ්‍ය සියලුම අනුමැතියන් ක්‍රියාත්මක වූ විට පමණි.

2005 අංක 38 දරන සංචාරක පනතට අනුව, සැලසුම් සහගතව සහ තිරසාර ලෙස සංචාරක හෝටල් සහ නිවාඩු නිකේතන සංවර්ධනය කිරීම සහ පවත්වාගෙන යාම සඳහා SLTDA සතු ඉඩම් විභව ආයෝජකයින්ට බදු දීමට (විකුණුම් නොකිරීමට) SLTDA වෙත නියම කර ඇත. SLTDA අතීතයේ දී මෙන් විදේශීය හා දේශීය ආයෝජන ආකර්ශනය කර ගනිමින් එය අඛණ්ඩව සිදු කර ඇති අතර, දැනටමත් අනුමත කර ඇති ව්‍යාපෘති සඳහා බදු ගිවිසුම් අත්සන් කිරීමේදී යම් ප්‍රමාදයක් සිදු වුවහොත් ශ්‍රී ලංකා පාර්ලිමේන්තුවේ පොදු ව්‍යාපාර පිළිබඳ කාරක සභාව (COPE) වෙත වගකීම දරයි.

කල්පිටියේ උච්චමුනෙයි දූපත සම්බන්ධයෙන්, SLTDA විසින් 2019 ජූලි මාසයේදී භාෂා තුනෙන්ම පුවත්පත් දැන්වීම් හරහා අනාගත ආයෝජකයින් කැඳවා ඇත. ව්‍යාපෘති යෝජනා ඇගයීම් කමිටුවේ ඇගයීම සහ අනුමැතියෙන් පසු, එය කර්මාන්ත පාර්ශවකරුවන් සහ රජයේ නියෝජිතයින් ඇතුළත් වන SLTDA මණ්ඩලය විසින් 2020 පෙබරවාරි මාසයේදී අනුමත කරන ලදී. 2020 අගෝස්තු මාසයේදී සංචාරක අමාත්‍යාංශයේ ලේකම්වරයා හරහා සංචාරක අමාත්‍යවරයා බදු ගිවිසුමක් අත්සන් කිරීම අනුමත කළේය. තාක්ෂණික කරුණු අනුව බදු ගිවිසුම සඳහා කෙටුම්පත 2020 ඔක්තෝම්බර් මාසයේදී අවසන් කරන ලද අතර 2020 දෙසැම්බර් මාසයේදී ගිවිසුම් කෙටුම්පත අවසන් කරන ලදී.  එය 2021 මාර්තු මාසයේදී අත්සන් කිරීමට සූදානම් විය.

කෙසේ වෙතත්, වසංගත තත්ත්වය සහ ආයෝජකයාගේ අභ්‍යන්තර කටයුතු හේතුවෙන් ගිවිසුම අත්සන් කිරීම ප්‍රමාද විය. 2022 අප්‍රේල් මාසයේදී, ආයෝජන මණ්ඩලය (BOI) විසින් 2022 මැයි 11 වැනි දින හෝ ඊට පෙර කල්බදු ගිවිසුම අත්සන් කිරීමට ආයෝජකයාට අවසාන නිවේදනයක් ලබා දුන් අතර, එය අසමත් වුවහොත් අයදුම්පත ඉල්ලා අස්කර ගැනීමට සිදුවේ. එහි ප්‍රතිඵලයක් වශයෙන්, SLTDA සමඟ බදු ගිවිසුම අත්සන් කරන ලෙස ආයෝජකයා ඉල්ලා සිටියේ 2022 මැයි 9 හෝ 10 යන දිනවලය. කෙසේ වෙතත්, 2022 මැයි 9 සහ 10 යන දිනවල ශ්‍රී ලංකාවේ සිදු වූ අවාසනාවන්ත සිදුවීම් හේතුවෙන් සහ ආයෝජන මණ්ඩලයේ මුල් ඉල්ලීම ලබා දී, SLTDA කළමනාකාරිත්වය විසින් ඉඩම් අන්සතු කිරීමේ ප්‍රතිපත්තියට අනුව වසර 30 ක බදු දීම සඳහා බදු ගිවිසුම අත්සන් කිරීමට 2022 මැයි 11 දින කටයුතු කරන ලදී.

ජනප්‍රිය මතය තිබියදීත්, මෙම ගනුදෙනුවේ ප්‍රතිඵලයක් ලෙස SLTDA හෝ ශ්‍රී ලංකා රජය හෝ ඊට සම්බන්ධ කිසිදු පාර්ශවකරුවෙකු USD මිලියන 417.5ක් ලබා නොගන්නා බව SLTDA පැහැදිලි කිරීමට කැමතිය. ගිවිසුම සම්පූර්ණයෙන්ම වසර 30 කට ඉඩම් බදු දීමට අවසන් අයිතිය SLTDA සතු විය.

SLTDA සඳහා, කලින් නැවත අවධාරණය කළ පරිදි, ආදායම් මාර්ගය වන්නේ කල්බදු කුලියට දීමයි. එහිදී ආයෝජකයා විසින් 2020 වසරේ රජයේ තක්සේරු දෙපාර්තමේන්තුව විසින් සිදු කරන ලද තක්සේරුව මත පදනම්ව වසර 30ක කාලයක් සඳහා ස්ථාවර කුලී ගාස්තුවක් මාසිකව ගෙවනු ලැබේ.  USD මිලියන 417.5 ක මුළු පිරිවැය හුදෙක් ඉහත කී ආයෝජකයා විසින් කරන ලද ආයෝජනයේ මුළු වාණිජ වටිනාකම නියෝජනය කරයි.

ශ්‍රී ලංකාවේ සංචාරක පාර්ශවකරුවන්ගෙන් සහ සාමාන්‍ය ජනතාවගෙන් අප කාරුණිකව ඉල්ලා සිටින්නේ ප්‍රවේශම් වන ලෙසත් අසත්‍ය හා වැරදි තොරතුරුවලට නොරැවටෙන ලෙසත්ය.

---