ජනතාවට විනෝද වෙන්න විනෝද බද්ද 5%ක් අඩු කලා.. – ව‍්‍රායි

2026 ජූලි 17, පෙ.ව. 12:19

---

---

කොළඹ නගරයේ ජනතාවට විනෝදාස්වාදය, සංස්කෘතික කටයුතු සහ ක්‍රීඩා සඳහා වැඩි අවස්ථාවන් සලසා දීමේ අරමුණින් කොළඹ මහ නගර සභාව මඟින් අය කරනු ලබන විනෝද බදු (Entertainment Tax) සංශෝධනය කිරීමට පියවර ගත් බව කොළඹ නගරාධිපතිනි ව‍්‍රායි කැලී බල්තසාර් මහත්මිය පවසයි.

නගරාධිපතිනිය මේ බව සඳහන් කළේ තම සමාජ ජාල ගිණුමේ සටහනක් තබමිනි.

කොළඹ නගරයේ ජනතාවගේ විනෝදාස්වාදය සඳහා වැඩි ඉඩකඩක් වෙන් කරන ලෙස ගරු ආණ්ඩුකාරවරයා කළ ඉල්ලීමකට අනුව, 2026 අයවැය මඟින් මෙම බදු සහනය ලබාදීමට යෝජනා සම්මත වූ බව ඇය සඳහන් කළාය. ඒ අනුව අදාළ බදු සංශෝධනයන් ඇතුළත් ගැසට් නිවේදනය ද මේ වන විට නිකුත් කර තිබේ.

මෙම නව සංශෝධනය යටතේ සියලුම විනෝද බදු කාණ්ඩවල අනුපාතයන් අඩු කර ඇති අතර, විශේෂයෙන්ම දේශීය කලාකරුවන්ට සහ කලා ක්ෂේත්‍රයට දිරියක් ලබාදීම වෙනුවෙන් දේශීය ප්‍රසංග සඳහා මෙතෙක් පැවති 12%ක බදු අනුපාතය 7% දක්වා අඩු කිරීමට පියවර ගෙන ඇත.

මෙහිදී වැඩිදුරටත් අදහස් දැක්වූ නගරාධිපතිනිය අවධාරණය කළේ, මෙම බදු සහනයේ සැබෑ ප්‍රතිලාභය ජනතාව වෙත ගලා යා යුතු බවයි.

“අපි ලබාදුන් මෙම බදු සහනය නිසා සංවිධායකයන්ට විශාල සහනයක් හිමිවෙනවා. එම සහනය සැලකිල්ලට ගෙන ප්‍රවේශපත්‍ර මිල ගණන් අඩු කිරීමට කටයුතු කරන ලෙස අපි සියලුම සංවිධායකයන්ගෙන් ඉල්ලා සිටිනවා. එවිට වැඩි ජනතාවකට කලා හා විනෝදාස්වාද අත්දැකීම් විඳගැනීමට අවස්ථාව ලැබෙනවා. කලා ක්ෂේත්‍රය දියුණු වීම මෙන්ම ජනතාවට දැරිය හැකි මිලකට ගුණාත්මක විනෝදාස්වාදයක් ලැබීම අපේ ප්‍රධාන අපේක්ෂාවයි,” යැයි ද ඇය සඳහන් කළාය.

ජනතාව වෙනුවෙන් ලබාදුන් මෙම බදු සහනයේ වාසිය අවසානයේ ජනතාවටම හිමිවිය යුතු බව නගරාධිපතිනිය වැඩිදුරටත් ප්‍රකාශ කළාය.

---