”අපි දිගටම විදෙස්ගත වෙලා ඉන්න බලාපොරොත්තුවක් නැහැ. ආයෙම ලංකාවට ආපු දවසක නැවතත් රංගනයට යොමු වෙනවා…”

2026 ජනවාරි 14, පෙ.ව. 12:12

තිසුරි යුවනිකා ගැන මේ දවස්වල වැඩියෙන් කතාබහ කරන්න අරන්.

ඊට හේතුව, ජනවාරි 23 සිට තිරගත වීමට නියමිත, ‘ධර්මයුද්ධය 02’ සිනමාපටය.

පසුගියදා පැවැති රාජ්‍ය සම්මාන උලෙළේ 2021 වසර සඳහා හොඳම නිළිය සම්මානය හිමිකර ගන්නෙ තිසුරි.

වලාකුළු දොරින් ගලන්න ටෙලි නිර්මාණය වෙනුවෙන් ඇයට ලැබුණු මේ සම්මානය අතට ගත්තෙ තිසුරිගෙ ආදරණීය පියා.

”ඒක මට මං සම්මානය ගත්තටත් වැඩිය සතුටක්. මොකද දරුවන්ගේ ජයග්‍රහණයේදී වැඩියෙන්ම සතුටට පත්වෙන්නේ මවුපියන්. මං දැක්කා එදා තාත්තාගේ ඇස්වල තිබුණු සතුට. කතා කරද්දි ඒ වචනවල තිබුණු සතුට. ඒක දරුවෙක් විදිහට මට සම්මානය ලැබුණටත් වඩා ලොකු සතුටක්. මගේ තාත්තා ඒ සම්මානය ගත්ත එක මට ජීවිතේ කවදාවත් අමතක නොවන සිදුවීමක්.”

තිසුරි කියන්නෙ, පුංචි කාලෙ පටන්ම කලාවට යොමුවුණු තාරකවක්.

කාලයත් එක්ක ඈ රංගනයෙන් ඈත්වෙනවා. නමුත් ඇගේ ජනප්‍රියත්ව‍යේ නම් කිසිම වෙනසක් ඇත්තේ නෑ.

”මට රංගනයෙන් ඈත් වෙන්න හේතු කිහිපයක්ම තිබුණා. එකක් මගේ අම්මගේ අසනීපය. අනෙක් කරුණ මට සැමියා එක්ක විදෙස්ගත වෙන්න සිදුවීම. වැඩ භාර අරන් අතරමඟ දාල යන්න බැරි නිසා මං 2020 ඉඳලම නිර්මාණ භාරගත්තෙ නැහැ. මේක මට කාලෙකට පස්සේ ලැබුණු සම්මානයක්. ඒක ලැබෙන වෙලාවෙ මං ලංකාවෙ හිටියෙත් නැහැ. මට දුකක් තියෙනවා. නැත්තෙ නැහැ. සමහර වෙලාවට මගේ පරණ නිර්මාණ දකිද්දි, ආදරණීය ප්‍රේක්ෂකයන්ගේ ප්‍රතිචාර දකිද්දී දුකක් එනවා. නමුත් මගේ පෞද්ගලික ජීවිතය වෙනුවෙන් ගත්ත තීරණයක් නිසා මං කවදාවත් ඒ ගැන පසුතැවෙන්නේ නැහැ. හොඳම දේවල් හොඳම කාලෙදි කළා කියන සතුට තියෙනවා. හැබැයි මං රංගනයෙන් සමු අරන් නැහැ. මඳ විරාමයක් ගත්තා විතරයි.”

”අඩු වයසින්ම මට මගේ වයසට වඩා මුහුකුරා ගිය චරිත ලැබුණා. ඒකම හේතු වෙන්න ඇති මට ඒ වගේ සම්මාන ලැබෙන්න. ගොඩක් මහන්සිවෙලා කැපකිරීම් කරලා ගොඩනඟපු චරිත. ඒ මහන්සියේ ප්‍රතිඵලයක් විදිහට එක එක කාණ්ඩවලින් සම්මානයට නිර්දේශවෙලා තියෙනවා. මාව නිර්මාණවලට සම්බන්ධ කරගත්ත නිර්මාණකරුවන් මං මේ වෙලාවේ ආදරයෙන් සිහිපත් කරනවා.”

රංගනය කියන්නෙ තිසුරිට ඇගේ ආදරණීය මවගෙන් ලැබුණු දායාදයක් කිව්වොත් හරි…

”රංගනය කියන්නේ මගේ මවගෙන් ලැබුණු දායාදයක්. මගේ අම්මගේ ආශීර්වාදය ඇය හිටිද්දිත් තිබුණා. ඇය නැති වුණත් ඒ ආශීර්වාදය මට ලැබෙනවා කියන එක මං දන්නවා. රංගනයේදී විතරක් නෙවෙයි සාමාන්‍ය ජීවිතයේදී ජීවත්වෙන විදිහ පවා මම ඉගෙන ගත්තෙ මගේ අම්මගෙන්. මට පොතේ දැනුමට වඩා වැඩියෙන් තියෙන්නේ සමාජ දැනුම. ඒක මට ලැබුණෙත් අම්මගෙන්. ඇය ගිය අඩිපාරේ තමයි මං හැමදාම යන්න උත්සාහ කළේ. ඇය හැමදාම කිව්වේ හැමදාම හොඳින් ඉන්න. සතුටින් ඉන්න. හොඳ මනුස්සයෙක් වෙන්න කියන එක.”

දෙමාපියන් වගේම, තිසුරිගේ ගමනට හයියක් වෙලා ඉන්නෙ ඇගේ ආදරණීය සැමියා….

”මගේ මවුපියන්ගෙන් පස්සේ මගේ හෙවණැල්ල වෙන්නෙ එයා. මං වැටෙන හැම තැනකදිම මට වාරුවක් වෙන්නේ මාව ශක්තිමත් කරන්නෙ එයා. අම්මගේ අසනීප තත්ත්වයත් එක්ක මට මුහුණදෙන්න වුණු ප්‍රශ්න හමුවේ මට හයියක් වුණේ මගේ සැමියා. එයා හරි කැමැතියි මං වැඩ කරනවට. එයා හැම වෙලාවෙම කියන්නේ ඒක ඔයාගෙ ටැලන්ට් එක ඒ නිසා රංගනයෙන් ඈත් වෙන්න එපා කියලා. ලංකාවට ගිය වෙලාවක ඔයා ආයෙ වැඩ කරන්න ඕන කියන එක එයා හැමවේලේම කියනවා. අපි දිගටම විදෙස්ගත වෙලා ඉන්න බලාපොරොත්තුවක් නැහැ. ආයෙම ලංකාවට ආපු දවසක නැවතත් රංගනයට යොමු වෙනවා”

උපුටාගැනීම : රසඳුන | නාමලී ගමගේ