තුන්වන ලෝක යුද්ධයක්…? නොස්ට්‍රඩමස්ගේ සහ බාබා වැන්ගාගේ අනාවැකි නිසා ලෝකයම කැළඹෙයි

2026 මාර්තු 18, පෙ.ව. 12:20

වර්තමානයේ පවතින ගෝලීය යුද ආතතීන් හමුවේ, ලෝක ප්‍රසිද්ධ අනාවැකි කරුවන් වන බාබා වැන්ගා සහ නොස්ට්‍රඩාමස් විසින් සිදු කරන ලදැයි පැවසෙන භීතිකාජනක අනාවැකි පිළිබඳව ජාත්‍යන්තරයේ දැඩි කතාබහක් නිර්මාණය වී තිබෙනවා.

රුසියාව-යුක්රේනය, ඊශ්‍රායලය-ඉරානය සහ පාකිස්ථානය-ඇෆ්ගනිස්ථානය අතර පවතින ගැටුම්කාරී වටපිටාව මෙම සංවාදයන් තවදුරටත් උණුසුම් කිරීමට හේතු වී තිබෙනවා.

1996 වසරේදී අභාවප්‍රාප්ත වූ බල්ගේරියානු ජාතික දෘශ්‍යාබාධිත කාන්තාවක වන බාබා වැන්ගා, 2026 වසරේදී තුන්වන ලෝක යුද්ධයක් පුපුරා යා හැකි බවට අනතුරු ඇඟවූ බව ඇයගේ අනුගාමිකයෝ පවසනවා.

මැදපෙරදිග සහ යුරෝපයේ ඇතිවන ගැටුම් මෙයට මූලික විය හැකි බව එම අනාවැකිවල සඳහන් වෙනවා.

ඇයගේ අනාවැකිවලට අනුව,

– 2026 වසරේදී මහා විනාශකාරී යුද්ධයක් සිදුවුවද, එය මානව වර්ගයාගේ අවසානය නොවනු ඇත.

– ඇය පෙන්වා දී ඇත්තේ ලෝකය අවසන් වන්නේ 5079 වසරේදී බවයි.

– සමාජය මේ වන විටත් “බිඳවැටීමේ ලක්ෂ්‍යයකට” පැමිණ ඇති බවත්, මිනිසා ඉක්මනින්ම එය වටහා ගනු ඇති බවත් ඇය පවසා ඇත.

එසේම, බාබා වන්ගාට අමතරව, 1500 ගණන්වල ජීවත් වූ ප්‍රංශ ජ්‍යෝති ශාස්ත්‍රඥ නොස්ට්‍රඩාමස් පිළිබඳවද මේ දිනවල පුවත් වාර්තා වෙනවා. ඔහුගේ ඇතැම් පද්‍යයන්ට අනුව, ලෝකයේ ප්‍රමුඛ පිරිමි චරිතයක් ඝාතනය කිරීම හෝ දේශපාලන කුමන්ත්‍රණයක් හරහා පාලන තන්ත්‍රයක් අස්ථාවර වීමෙන් පසුව මාස හතක මහා යුද්ධයක් ඇතිවිය හැකි බව අර්ථකථනය කෙරුණා.

කෙසේ වෙතත්, ලෝකයේ අවිනිශ්චිතතාවයක් පවතින සෑම අවස්ථාවකම මිනිසුන් මෙවැනි අද්භූත අනාවැකි පසුපස යාම සාමාන්‍ය ස්වභාවයක්. බොහෝ විට මෙම අනාවැකි ඉදිරිපත් කර ඇත්තේ ඉතා සංකීර්ණ සහ ඕනෑම අතකට අර්ථකථනය කළ හැකි අයුරින් බැවින්, ඇතැම් සිදුවීම් අහඹු ලෙස ගැළපීම නිසා මිනිසුන් මේවා විශ්වාස කිරීමට පෙළඹෙනවා.

සමාජමාධ්‍යයේ පළවුණු ලිපියක් ඇසුරෙන්..