පාසල් දරුවන් වෙනුවෙන් විශේෂ චක්‍ර ලේඛයක්

2026 අප්‍රේල් 02, පෙ.ව. 9:29

අධ්‍යාපන අමාත්‍යාංශය විසින් පාසල් තුළ විනය ආරක්ෂා කිරීම සම්බන්ධයෙන් නව චක්‍ර ලේඛයක් නිකුත් කර ඇත.

මෙම චක්‍රලේඛය නිකුත් කර ඇත්තේ සියලුම පළාත් අධ්‍යාපන ලේකම්වරුන්, පළාත් අධ්‍යක්ෂවරුන්, කලාප අධ්‍යාපන අධ්‍යක්ෂවරුන්, කොට්ඨාශය භාර නියෝජ්‍ය හෝ සහකාර අධ්‍යාපන අධ්‍යක්ෂවරුන්, පරිවේනාධිපති හිමිවරුන් සහ විදුහල්පතිවරුන් වෙතයි.

ඒ අනුව එහි සදහන් වන්නේ පාසල තුළ විනය ආරක්ෂා කිරීම සම්බන්ධව අධ්‍යාපන අමාත්‍යාංශය මීට පෙර නිකුත් කරන ලද 2016 අප්‍රේල් 29 දිනැති චක්‍රලේඛයෙහි සඳහන් උපදෙස්වලට අමතරව මෙම චක්‍ර ලේඛයේ විධිවිධාන ද මින් ඉදිරියට ක්‍රියාත්මක කළ යුතු බවයි.

ශ්‍රේෂ්ඨාධිකරණ නඩු තීන්දුවක ඡේදයක් ද උපුටා දක්වමින් මෙම චක්‍රලේඛය නිකුත් කර ඇත.ඒ අනුව අධ්‍යාපන අමාත්‍යාංශය නිකුත් කළ චක්‍රලේඛයෙහි සඳහන් වෙන්නේ කිසිදු දරුවෙකුට දඬුවම් කිරීමේ ක්‍රමයක් ලෙස හෝ වෙනත් හේතුවක් නිසා හෝ කිසිදු ශාරීරික හෝ මානසික හෝ හානියක් සිදුනොකළ යුතු අතර කිසිදු ආකාරයක ශාරීරික දඩුවමක් කවර මට්ටමකින්වත් සිදුකළ නොහැකි බවත් වැරදිකරුවන්ට නීතියෙන් දඬුවම් හිමි වන බවත්ය.

පාසල් සිසුන්ගේ විනය පවත්වාගෙන යාම සම්බන්ධයෙන් කටයුතු කිරීමේ දී අදාළ ශ්‍රේෂ්ඨාධිකරණ නඩු තීන්දුවේ සඳහන් කර ඇති කරුණු පිළිබඳ විශේෂ අවධානයක් යොමුකළ යුතු බවට අදාළ චක්‍රලේඛය මඟින් අවධාරණය කර තිබේ.