තැලෙන පොඩිවෙන මිනිස්සුන්ගේ නිවාස සිහිනය සැබෑ කරනවා.. – ටී.බී සරත්

2026 ජූලි 10, පෙ.ව. 12:15

---

---

2026 අයවැය යෝජනා මගින් ප්‍රකාශිත පරිදි රාජ්‍ය අංශයේ ආයතනවල තාවකාලික, අනියම්(දෛනික), ආදේශක, කොන්ත්‍රාත් හෝ සහන පදනමින් බදවාගෙන ඇති ස්ථීර  නොවන රාජ්‍ය සේවකයන් සම්බන්ධයෙන් වන අංක 11/2026 රාජ්‍ය පරිපාලන චක්‍රලේඛයට අනුකූලව සුදුසුකම් සම්පූර්ණ කරන ලද සේවකයින් 20 දෙනෙකු සදහා මෙහිදී ස්ථීර පත්වීම් ප්‍රදානය කෙරිණි.

ඊට අමතරව එම අධිකාරිය ඉතිහාසයේ පළමු වතාවට පැවති කාර්යක්ෂමතා කඩඉම් විභාගය සමත්, අනෙකුත් පූර්ව අවශ්‍යතා සම්පූර්ණ කරන ලද ප්‍රාථමික සේවා ගණයට අයත් සේවකයින් 08 දෙනෙකු සදහාද අදාල ශ්‍රේණියේ උසස්වීම් පිරිනමන ලදී.

නිවාස, ඉදිකිරීම් හා ජලසම්පාදන නියෝජ්‍ය අමාත්‍ය ටී.බී සරත් මහතාගේ ප්‍රධානත්වයෙන් මෙම උත්සවය පැවැත්වුණේ ජාතික නිවාස සංවර්ධන අධිකාරියේ ප්‍රධාන කාර්යාලයේ පිහිටි සභා ශාලාවේදීයි.

චක්‍රලේඛයට අනුකූල සුදුසුකම් සපුරන ලද කලමනාකරණ සහකාර තනතුරේ සිට ඊට පහළ තනතුරුවල සේවය කරනු ලබන සියලුම සේවකයින් හට නව රාජ්‍ය සේවයේ ස්ථීර පත්වීම් ප්‍රදානය කරන ලද අතර විදුලි කාර්මික ශිල්පී 01, කලමණාකරණ සහකාර 10, කාර්යාල සහයක 04, සහයක කාර්මික සහකාර 05 දෙනෙකු සඳහා ස්ථීර පත්වීම් ලබාදෙන ලදී. එමෙන් ම ප්‍රාථමික සේවා ගණයට අයත් රියදුරු 02 ක් සදහාත්, කාර්යාල කාර්ය සහායක 05 දෙනෙකු සදහාත් මෙහිදී උසස්වීම් ලබාදුන් අතර මෙවැනි උසස්වීම් ප්‍රදානය කෙරුණේ ජාතික නිවාස සංවර්ධන අධිකාරිය ඉතිහාසයේ පළමු වරටයි.‍

මේ පිළිබඳව අදහස් දක්වමින් නිවාස, ඉදිකිරීම් හා ජල සම්පාදන නියෝජ්‍ය අමාත්‍ය ටී. බී සරත් මහතා ප්‍රකාශ කළේ ජාතික නිවාස සංවර්ධන අධිකාරිය දේශපාලනයෙන් තොර අධිකාරියක් බවට පත් කරන බවයි.

එමෙන්ම මෙරට තුළ තව අවුරුදු 25කින් ඉපදෙන දරුවන්ට නිවාස අවශ්‍යතාවය සම්පූර්ණ කරන්නේ නිවාස සංවර්ධන අධිකාරියේ සැලැස්මෙන් බවත් ඉදිරි අවුරුදු තුනේදි මිනිස්සුන්ගේ නිවාස අවශ්‍යතාවය වෙනුවෙන් සැලසුම් හදමින් මෙරට තුළ තැලෙන පොඩි වෙන මිනිස්සුන්ගේ නිවාස සිහිනය සැබෑවක් කර බවත් ඒ මහතා ප්‍රකාශ කළා.

මෙම පියවර ඔස්සේ මෙරට පොදු ජනතාවගේ නිවාස සිහිනය වඩාත් විධිමත් මෙන්ම ස්වාධීන සැලසුම් සහගත වැඩපිළිවෙළක් යටතේ සැබෑ කිරීමට රජයේ අපේක්ෂාවයි.

මෙහිදී වැඩිදුරටත් අදහස් දැක්වූ නිවාස, ඉදිකිරීම් හා ජලසම්පාදන නියෝජ්‍ය අමාත්‍ය ටී.බී සරත් මහතා;

“අපි අපේ වගකීම ඉටුකරනවානම් මෙම ආයතනය දිනෙන් දින දියුණු වේවි. සතුටින් දකින්න පුලුවන් ආයතනයක් බවට පත්වේවි. එක අරමුණකින් තමන්ගෙ ආයතනය ගැන හිතන්න. ප්‍රශ්න මතුවෙන්න පුලුවන්. ආණ්ඩුව සම්බන්ධ ප්‍රශ්න එන්න පුලුවන්. තමන් කැමති ඕනෑම ආණ්ඩුවක් සමග වැඩ කරන්න. හැමෝම මතක තබා ගත යුත්තේ අපි හැමෝම මුදල් උපයන්නේ මේ රටේ මහජනතාවගේ ධනයෙන් බව පමණයි. ඒ පොදු ජනතාවට යුක්තිය, සාධාරණය ඉෂ්ට කරන්න. අපිට දේශපාලනය අදාල නෑ. වැඩ කරන්න කරන්න මේ රට දියුණු වෙනවා. මේ රට ලස්සන වෙනවා. මේ රට සංවර්ධනය වෙනවා. ඔබේ උරමත මේ රටේ අහිංසක මිනිස්සුන්ගේ එක් වේදනාවක් පැවරී තිබෙනවා. ඔබ සියලු දෙනාම මිනිස්සුන්ගේ මූලික අවශ්‍යතාවලින් එකක් වන නිවාස අවශ්‍යතාවය කර තබාගෙන ඉන්න නිලධාරින්. ඒ වෙනුවෙන් අප්‍රතිහතව වැඩ කරන්න. ඔබේ පත්වීම ස්ථීර කරලා, පඩි වැඩි කරලා වර්තමාන ආණ්ඩුව බලාපොරොත්තු වන එකම දේ තමයි ඒක. ජාතික නිවාස සංවර්ධන අධිකාරියේ සේවය කරන තවත් මෙවැනි 300 ට අධික සේවක කණ්ඩායමක ගැටළු විසදන්නත් අපි සූදානම්. ඒ සදහා අපි දැන් කටයුතු කරමින් ඉන්නවා. නිවාස සංවර්ධන අධිකාරිය දේශපාලනයෙන් තොර අධිකාරියක් බවට අපි පත්කරනවා. කවුරු මේ රටේ බලයට ආවත් වෘත්තීය මේ ගරුත්වය සහිතව වැඩ කළ හැකි අධිකාරියක් බවට පත් කරනවා. ඒ වෙනුවෙන් අපි වැඩ කටයුතු කරනවා. ඉදිරි අවුරුදු තුනේදි මේ මිනිස්සුන්ගේ නිවාස අවශ්‍යතාවය වෙනුවෙන් අපි සැලසුම් හදනවා. මේ රටේ තැලෙන පොඩිවෙන මිනිස්සුන්ගේ නිවාස සිහිනය සැබෑ කිරීමයි අපේ බලාපොරොත්තුව.”

මීට පෙර ජාතික නිවාස සංවර්ධන අධිකාරියේ කිසිදු දිනයකදී කඩඉම් පරීක්ෂණ පවත්වා නැත. ඒ හේතුවෙන් අභ්‍යන්තර සේවකයින් හට තම තනතුරුවල උසස්වීම් ලබාගැනීමට හෝ අයදුම් කිරීමට අවස්ථාවක් නොතිබිණි. එම අවස්ථාව නිර්මාණය කරමින් පැවති කඩඉම් විභාග සමත් පූර්ව අවශ්‍යතා සපුරන ලද පිරිසකටද ඊයේ සිය උසස්වීම්වලට අදාල පත්වීම් ප්‍රදානය කෙරිණි.

---