2026 ඔක්‍තෝබර් 13, පෙ.ව. 8:14
හිටපු අගවිනිසුරු සරත් එන්. සිල්වා මහතා පවසන්නේ පූජ්‍ය ගලගොඩඅත්තේ ඥානසාර හිමියන්ට නියම කර ඇති වසර හයක සිරදඬුවම නීති විරෝධී බවයි. නීතියෙන් නියම කළ හැකි උපරිම දඬුවම ඉක්මවා එම දඬුවම ලබාදී ඇති බවට ඔහු චෝදනා කරයි.
සඳුදා (12) කොළඹදී සමස්ත ලංකා බෞද්ධ මහා සම්මේලනය සංවිධානය කළ සමුළුවක් අමතමින් සරත් එන්. සිල්වා මහතා මේ බව ප්‍රකාශ කළේය.
“ඥානසාර හිමියන්ට ලබාදුන් දඬුවම සම්පූර්ණයෙන්ම නීති විරෝධීයි. මෙය අසාමාන්‍ය තත්ත්වයක්” යැයි ඔහු පැවසීය.
“අදාළ මහේස්ත්‍රාත්වරයා තම අධිකරණයේ එවැනි සිදුවීමක් සිදුවූ බවත්, තමන්ට දඬුවම් නියම කිරීමේ බලය සීමිත බැවින් ඊට වඩා දැඩි දඬුවමක් ලබාදීම සඳහා එම කාරණය අභියාචනාධිකරණයට යොමු කරන බවත් සඳහන් කරමින් අභියාචනාධිකරණයේ සභාපති ප්‍රීති පද්මන් සූරසේන මහතා වෙත ලිපියක් යොමු කර තිබෙනවා.
“ගැටලුව තිබෙන්නේ එතැනයි. මෙහි නීතිමය තත්ත්වය කුමක්ද? අධිකරණයට අපහාස කිරීමේ වරදට රුපියල් 1,500 නොඉක්මවන දඩයක් හෝ මාස 18 නොඉක්මවන සරල සිරදඬුවමක් නියම කළ හැකියි. එය වසර එකහමාරක් පමණයි.
“නමුත් නීතියෙන් මාස 18ක උපරිම දඬුවමක් පමණක් නියම කර තිබියදී ප්‍රීති පද්මන් සූරසේන මහතා වසර හයක සිරදඬුවමක් නියම කර තිබෙනවා. එම විධිවිධානය අදාළ වන්නේ අභියාචනාධිකරණයට අපහාස කිරීම සම්බන්ධයෙන් පමණයි. අනෙකුත් කරුණු සම්බන්ධයෙන් එවැනි විධිවිධානයක් නැහැ” යැයි සරත් එන්. සිල්වා මහතා චෝදනා කළේය.
හිටපු අග්‍ර විනිශ්චයකාරවරයා මීට පෙර හිටපු ජනාධිපති මෛත්‍රීපාල සිරිසේන මහතා විසින් ඥානසාර හිමියන්ට ලබාදුන් ජනාධිපති සමාව ද සාධාරණීකරණය කළේය.
බුදුදහම සහ සිංහල බෞද්ධ උරුමය ආරක්ෂා කිරීම වෙනුවෙන් පැවති ජාතික සමුළුවට මහා සංඝරත්නයේ සාමාජිකයන්, දේශපාලනඥයන් සහ විවිධ සංවිධානවල නියෝජිතයෝ එක්ව සිටියහ.
2026 ඔක්‍තෝබර් 13, පෙ.ව. 12:19
2026 ඔක්‍තෝබර් 13, පෙ.ව. 12:13
2026 ඔක්‍තෝබර් 13, පෙ.ව. 12:11
2026 ඔක්‍තෝබර් 13, පෙ.ව. 12:11
2026 ඔක්‍තෝබර් 13, පෙ.ව. 12:06