තැන තැන දාලා ගියපු රජයේ වාහන ගැන තීරණයක්

2024 සැප්‍තැම්‍බර් 27, පෙ.ව. 10:50

---

---

පසුගිය රජයන් මගින් භාවිතා කළ අති සුඛෝපභෝගී වාහන අත්‍යවශ්‍ය සේවාවන් වෙත ලබාදීමට ජනපතිගෙන් උපදෙස් ලැබී ඇති බව ජනාධිපති මාධ්‍ය අංශය නිවේදනයක් නිකුත් කරමින් සඳහන් කරනවා.

එම නිවේදනයෙන් පෙන්වා දෙන්නේ, වාහන අවභාවිතාව සම්බන්ධයෙන් අපරාධ පරීක්ෂණ දෙපාර්තමේන්තුවෙන් විමර්ෂණයක් ආරම්භකර ඇති බවයි.

එම නිවේදනයේ සඳහන්වන පරිදි ජනාධිපති පෞද්ගලික ලේකම් ආනන්ද විජේපාල මහතා පවසා ඇත්තේ, ජනතාවගේ බදු මුදල් නාස්ති කිරීම සම්බන්ධයෙන් පූර්ණ සමාලෝචනයක් සිදුකර ක්‍රියාමාර්ග පිළිබඳව ජනතාව දැනුවත් කිරීමට පියවර ගන්නා බවයි.

ඔහු මෙම අදහස් පල කර ඇත්තේ, ගාලු මුවදොර භූමිය ඇතුළු ස්ථාන කිහිපයක නවතා ඇති වාහන සම්බන්ධව ගනු ලබන ඉදිරි ක්‍රියාමාර්ග පිළිබඳව දැනුවත් කිරීම වෙනුවෙන් ඊයේ (26) එම පරිශ්‍රයේ පැවති ප්‍රවෘත්ති සාකච්ඡාවකට එක්වෙමින්.

එහිදී ජනාධිපති කාර්යාලය සතුව පවතින වාහන 833 අතරින් වාහන 29ක් අතුරුදන්ව ඇති බව එම මහතා වැඩිදුරටත් ප්‍රකාශ කර තිබෙනවා.

විවිධ ආයතනවලින් ලබාගත් වාහන 59ක් ජනාධිපති කාර්යාලය හරහා තම හිතවතුන්ට ලබාදී ඇති බවත්, වාහන ආනයනය කිරීම තහනම් කළ කාලසීමාව තුළ පමණක් ජනාධිපති කාර්යාලයට වාහන 16ක් ගෙන්වා ඇති බව අනාවරණය වී ඇති බවත් ජනාධිපති පෞද්ගලික ලේකම්වරයා සඳහන් කළා.

---