ඇමරිකාව කැළඹූ දේශපාලන ඝාතනවල රහස්‍ය ලිපිගොනු එළියට

2025 ජනවාරි 24, ප.ව. 12:25

1960 දශකයේදී ඇමරිකා එක්සත් ජනපදය කැළඹූ දේශපාලන ඝාතන තුනකට අදාලව එරට බුද්ධි සේවා සතුව ඇති රහසිගත ලිපිගොනු මහජනතාවට විවෘත කිරීම සඳහා ජනාධිපති ඩොනල්ඩ් ට්‍රම්ප් විධායක නියෝගයක් අත්සන් කළා.

මේ අනුව ඉදිරි දිනවලදී හිටපු ජනාධිපති ජෝන් එෆ්. කෙනඩි මෙන්ම ඔහුගේ සහෝදර රොබර්ට් එෆ්. කෙනඩි දෙදෙනාගේ ඝාතනයන්ට සහ මාර්ටින් ලූතර් කිං (කනිෂ්ඨ) ඝාතනයට අදාලව ඇති රහසිගත ලිපිගොනු නිදහස් කෙරෙනු ඇතැයි අපේක්ෂා කෙරෙනවා.

ජෝන් එෆ් කෙනඩි ඝාතනයට අදාල ලිපිගොනු දින 15 ක් තුළ ද අනෙක් ලිපිගොනු දින 45 ක් තුළ ද නිදහස් කිරීමට සැලැස්මක් සකසන්නැයි ට්‍රම්ප්ගේ නියෝගයෙන් බුද්ධි සේවා වෙත උපදෙස් ලැබී තිබෙනවා.

ජෝන් එෆ්. කෙනඩි 1963 නොවැම්බර් 22 වනදා ඩලස් නගරයේදී ඝාතනය වූ අතර කිං සහ රොබර්ට් එෆ්. කෙනඩි ඝාතනය වූයේ 1968 වසරේදී යි. මෙයින් විශේෂයෙන්ම ජෝන් එෆ්. කෙනඩිගේ සහ මාර්ටින් ලූතර් කිංගේ ඝාතන පිළිබඳ විවිධ ප්‍රශ්න අදටත් නැගෙමින් තිබෙනවා.

ධවල මන්දිරය පවසන්නේ මෙම තිදෙනාගේ පවුල්වල සාමාජිකයන් මෙන්ම ඇමරිකානු ජනතාව ද මෙම ඝාතන පිළිබඳ සත්‍යය දැනගත යුතු බවයි.