“කේන්ද්‍රය බලපු මහත්තය හැම දේම කිව්වා…උඹ ශනියා එක්ක හාදකමක් තියෙනවා නේද? දෛවඥයකුගේ පලාපල විස්තරයක් වැරදියට තේරුම් ගත් අයකු බිරිඳ යළි මවුපියන්ට බාර දීලා

2024 ජනවාරි 04, පෙ.ව. 12:01

දෛවඥයකුගේ පලාපල විස්තරයක් වැරදියට තේරුම් ගත් අයකු තම බිරිඳ ඇයගේ මවුපියන්ට බාර දීමට කටයුතු කිරීමක් ගැන මේ කතාව මොරවත්කෝරළයේ නැගෙනහිර ප්‍රදේශයේ අසන්නට ලැබුණි.

ඔහු පාසල් අධ්‍යාපනය නොලද, ගැමියෙකි. වයස අවුරුදු 22 පමණ නව යෞවනයෙකි. සමාජයේ කටයුතු ගැන අවබෝධය අඩු මෝඩ පහේ අයෙකි.

යන්ත්‍ර මන්ත්‍ර, හදි හූනියම් ගැනත් ග්‍රහ අපල පිළිබඳවත් දැඩි සේ විශ්වාස කළ මොහු අසල ගම්මානයකින් නාඹර වියේ හැඩකාර තරුණියක් කරකාරයට එක්කර ගත්තාය.

ඇය තරමක් ඉගෙනුම ලැබූ ජේත්තුවට කැමැති ශෝබනකාර බිරිඳක වූවාය.

කුඩා කල ඇය ඇඳෙන් වැටීම නිසා ඇති වූ ආබාධ තත්වයක් නිසා අපස්මාර රෝගයෙන් පෙළෙන්නියකි.

විවාහ වී කාලයක් ගත වුවද දරු සම්පතක් නොලැබීම නිසා දැඩි කලකිරීමකට පත්ව සිටි මොහු අසල නිවසක සිටි හිතවතකු දුන් උපදෙස් පරිදි බිරිඳගේ කේන්ද්‍රය බලවා ගැනීමට ජෝතිෂවේදියකු වෙත යාමට තීරණය කළාය.

ප්‍රසිද්ධ ජෝතිෂවේදියා ළඟට ගිය ඔහු බිරිඳගේ කේන්ද්‍රය දී පලාපල විමසා සිටියේය.

ජෝතිෂවේදියා කේන්ද්‍රය බලා පලාපල පැවසුවේය.

මේ කේන්ද්‍රය අයිති කාන්තාව අලංකාරයට, කැමැති විනෝදකාමී හැඩකාරියක්. අනුන්ගේ සිත් ඇද බැඳ ගන්න හරි දක්ෂ කමක් තියනව.

අඟහරු නීචවෙලා තියනව. ශනිගේ බැල්ම මැයගේ හිසට ලැබෙන ලග්න ඒ රෂ්ඨක කාලයක් ලබල තියෙන්නෙ. අපල කාරයා ශනියි. ශනිට නොපෙනෙන ලෙස මැය වෙනත් නිවසක පදිංචි කර ශනි මෘත්ථුංජය යන්ත්‍රය පළඳවන්න. නිල් කටරොළු මල්වලින් පූජාවක් පවත්වන්න. කපුටන්ට ගිතෙල් මිශ්‍ර බත් දෙන්න.

ග්‍රහයන් ගැන දැනුමක් නැති මොහුට, ශනිගේ බැල්ම ගැන සැකයක් ඇති විය. තම නිවසට මදක් දුරින් ඇති නිවසේ සිටින ලස්සන කොලු ගැටයාගේ නමද සනී ය. ඔහු සිතුවේ සනියා තම බිරිඳට ඇහැබැල්ම දාල ලෙඩ කර ඇති බවය.

මෙම සිතුවිලි සමග නිවසට පැමිණි මොහු, බිරිඳගෙන් ඇසුවේ “සනියා උඹට මොනවත් කීවද? මම නැති වෙලාවට මේ ගෙදරට ඒ කොල්ල එනවද? කේන්ද්‍රය බලපු මහත්තය කියපු හැම දේම ඇත්ත. ශනිගේ බැල්ම උඹට ලැබෙනව කියල කිව්ව. මට ඇත්ත කියපන්. උඹ සනිය සමග හාදකමක් පවත්වනවා නේද?

නොසිතූ අකරතැබ්බයකට මුහුණ බිරිඳ – මේ මිනිහට පිස්සුද? මම දන්න සනියෙක් නෑ කියා උස්හඬින් කීවාය.

“උඹ මට හොරේ හංගනව. උඹගෙන් මට වැඩක් නෑ. දැන් සූදානම් වෙයන් ගෙදර යන්න.” ස්වාමිපුරුෂයා මහ හඬින් ඇයට සැර කර, මග යන ත්‍රී වීලරයක් ගෙන්වාගෙන බිරිඳ එයට නංවාගෙන බිරිඳගේ ගෙදරට ගොස් ඇයගේ පියාට දියණිය බාර ගන්න කියා, කේන්ද්‍රය බැලූ, පලාපල විස්තරයත් මාමණ්ඩිය අත තබා ඔහු පැමිණි ත්‍රීවීලරයෙන්ම ආපසු නිවසට පැමිණියේය.

දියණිය, සිදු වූ දේ පියාට පැවැසූ අතර පියා පලාපල විස්තරය කියවා බලා බඩ අල්ලාගෙන හිනා වී සෙනසුරු අපලයට කොහෙවත් ඉන්න සනියෙක් අල්ලගෙන මේ ගොනා රණ්ඩු වී ඇතැයි ඥාතීන්ට පැවැසීය.