හදවත, පෙණහලු දන් දීලා නිර්වින්දන වෛද්‍යවරියට ජීවිතය දුන් විහඟනා

2023 මාර්තු 27, පෙ.ව. 10:44

හදවත සහ පෙණහලු යන ශරීර අවයව දෙකම රෝගියකු සඳහා එකවර බද්ධ කිරීමට ශ්‍රී ලංකාවේ දී කරන ලද ප්‍රථම සැත්කම කොළඹ ජාතික රෝහලේ විශේෂඥ වෛද්‍ය කණ්ඩායමක් විසින් පසුගිය දා සිදු කළා.

මොළය මිය යාම හේතුවෙන් මරණයට පත්වූ කුරුණෑගල මලියදේව බාලිකා විදුහලේ උසස් පෙළ අධ්‍යාපනය ලැබූ 19 හැවිරිදි විහඟනා ආරියසිංහ සිසුවියගෙන් ලබා ගත් හදවත සහ පෙණහලු මෙසේ වෙනත් රෝගියකුට බද්ධ කෙරුණු අතර, මේ අවයව දෙකම බද්ධ කරනු ලැබුවේ හෘදය සහ පෙණහලු අකර්මණ්‍ය වීමෙන් අසාධ්‍ය තත්ත්වයක පසුවූ නිර්වින්දන විශේෂඥ වෛද්‍යවරියකට වීමද විශේෂත්වයක්.

මීට පෙර සිදු කර තිබුණේ එම අවයව වෙන වෙනම බද්ධ කිරීම වුවද එකවර එවැනි අවයව බද්ධ කිරීමේ සැත්කමක් මෙරටේ දී සිදු කළ ප්‍රථම අවස්ථාව මෙය වීමද විශේෂත්වයක්.

මීට අමතරව ඇයගෙන් ලබා ගත් වකුගඩු දෙකද අසාධ්‍ය රෝගීන් දෙදෙනෙකුට සාර්ථකව බද්ධ කර තිබූ අතර, ඉන් එක් වකුගඩුවක් කුරුණෑගල ශික්ෂණ රෝහලේ වකුගඩු ඒකකයේ ප්‍රතිකාර ලබමින් සිටි රෝගියෙකුට සාර්ථකව බද්ධ කළ බව කුරුණෑගල ශික්ෂණ රෝහලේ අධ්‍යක්ෂ වෛද්‍ය චන්දන කැඳන්ගමුව මහතා ප්‍රකාශ කළා.

එමෙන්ම ඇයගෙන් ලබා ගත් අක්මාව සහ අක්ෂි පටලද තවත් පුද්ගලයන් තිදෙනෙකුට නීරෝගි ජීවිතයක් ලබා දී තිබෙනවා.

මේ අනුව විහඟනාගේ සිරුරෙන් ලබා ගන්නා ලද අවයව කොටස් 5කින් පුද්ගලයන් හත් දෙනෙකුටම නැවත ජීවය ලැබී තිබීමද විශේෂත්වයක්.

විහඟනා සිසුවිය අඹන්පොළ නගරයේම පදිංචි දරුවන් තිදෙනකුගෙන් යුත් පවුලක බාලම දරුවායි.

ඇයට වැඩිමල් එක් සොයුරියක් සහ සොයුරෙකු සිටින අතර සොයුරියද මලියදේව බාලිකාවෙන් උසස් පෙළ සමත්ව වයඹ විශ්වවිද්‍යාලයේ ඉගෙනුම ලබමින් සිටිනවා.

විහඟනා සාමාන්‍ය පෙළ විභාගය ඉහළින් සමත්ව උසස් පෙළ වාණිජ විෂය ධාරාව ඉංග්‍රීසි මාධ්‍යයෙන් හැදෑරීම සඳහා කුරුණෑගල මලියදේව බාලිකා විදුහලට ඇතුළත්ව තිබෙනවා.

පසුගියදා අවසන් වූ උසස් පෙළ විභාගයටද ඇය සාර්ථකව පෙනී සිට තිබෙනවා.

ඉන් පසුව හදිසියේ ඇතිවූ හිසේ අමාරුවක් හා වමනයක් හේතුවෙන් ඇය ප්‍රතිකාර සඳහා පසුගිය දා (17) ගල්ගමුව දිසා රෝහලට ඇතුළත් කර තිබෙනවා.

එහි දී ඇගේ රෝගී තත්ත්වය බරපතළ වීම හේතුවෙන් එදිනම රාත්‍රියේ වැඩිදුර ප්‍රතිකාර සඳහා කුරුණෑගල ශික්ෂණ රෝහලට ඇතුළත් කර ඇති බව වාර්තා වෙනවා.

කුරුණෑගල ශික්ෂණ රෝහලට ඇතුළත් කරන විටද අසාධ්‍ය තත්ත්වයෙන් පසුවූ විහඟනා රෝහලේ දැඩි සත්කාර ඒකකයට ඇතුළත් කර ප්‍රතිකාර ලබා දුන්නද එහි දී සිහිය නොලබාම ඇය මරණයට පත්ව තිබෙනවා.

මොළයේ හටගෙන තිබූ පිළිකාවක් නිසා මොළය මිය යාම හේතුවෙන් ඇය මරණයට පත්ව තිබූ බව වෛද්‍ය පරීක්ෂණවලින් අනාවරණය වී තිබෙනවා.

බාහිර රෝග ලක්ෂණ කිසිවක් නොපෙන්වාම හටගෙන තිබූ පිළිකාව මොළය තුළ ඔඩු දුවා තිබීමෙන් ඇයගේ මරණය සිදුව ඇති බව කියයි.

පසුව පවුලේ සාමාජිකයන්ගේ කැමැත්තට අනුව විහඟනාගේ සිරුරේ අවයව අසාධ්‍ය රෝගීන්ට දන් දීමට පියවර ගෙන තිබුණා.

නමුත් ඒ වන විටද විහඟනා වයඹ විශ්වවිද්‍යාලයේ අධ්‍යාපනය ලබන තම සොයුරියද සමඟ එක්ව මරණින් පසුව සිරුරු කොටස් දන්දීම සඳහා ගිවිසුම්ගතව සිටි බව ද කියයි.

“විහඟනා කියන්නේ මගේ පන්තියේ සිටිය අහිංසකම සිසුවියක්. එයා අහිංසක වගේම හරිම පරිත්‍යාගශීලි කෙනෙක්. තමන් සතු ඕනෑම දෙයක් අනෙක් අයට නොපැකිළිව දීමට තරම් පරිත්‍යාගශීලි කෙනෙක් වුණා. එයාගේ දැඩි විශ්වාසයක් තිබුණා උසස් පෙළ විභාගය හොඳින් සමත් වෙලා අක්කා වගේම විශ්වවිද්‍යාලයකට ඇතුළත් වෙලා උසස් අධ්‍යාපනයක් ලබන්න. නමුත් ඒ දරුවාගේ වගේම දෙමාපියන්ගෙත් හීන සියල්ලම බොඳ වෙලා ගිහින් ඉවරයි. ඒත් මේ දරුවා දන් දුන්න ශාරීරික අවයවවලින් මේ වන විට රෝගී පුද්ගලයන් පස් දෙනෙකුටම නීරෝගිව ජීවත් වීමට අවස්ථාව ලබා දීලා තියෙනවා. ඒ මහඟු පිනම ඇති මේ දරුවාට නැවත නීරෝගිමත් ජීවිතයක් ලබන්න.” විහඟනාගේ උසස් පෙළ පන්තිය බාරව කටයුතු කළ ලක්මිණි සමරකෝන් මහත්මිය ප්‍රකාශ කළා.