ගුවන් යානා ඉන්ධන ගැටලුවක්! ලංකාවට එන ගුවන් යානා වෙනත් රටවලින් තෙල් ගහයි

2022 මැයි 26, පෙ.ව. 9:30

කටුනායක බණ්ඩාරනායක ජාත්‍යන්තර ගුවන් තොටුපළ වෙතින් ගුවන් යානා සදහා ඉන්ධන ලබා ගැනීමේදී ගැටලු මතුවී තිබෙන බව වාර්තා වනවා.

ඒ අනුව එම ගැටළු අවම කර ගැනීම සදහා විකල්ප විසදුමක් ලෙස ඉන්දියාවේ චෙන්නායි , ඩුබායි සහ සිංගප්පූරුව වැනි ගුවන් තොටුපළ යොමු කිරීමට ගුවන් සේවා සමාගම් යොමු වීමේ පවතින තත්වයක් උදා වෙමින් පවතින බව ගුවන් තොටුපළ ආරංචි මාර්ග සදහන් කළා.

දැනටමත් ඉන්දියාව ඔස්සේ ගමන් ගන්නා ශ්‍රී ලන්කන් ගුවන් යානා චෙන්නායි සහ අනෙකුත් ඉන්දීය ගුවන් තොටුපළ වෙතින් තම ගුවන් යානා වලට අවශ්‍ය ඉන්ධන ලබා ගනිමින් ක්‍රියාත්මක වන බව එම ගුවන් සේවයේ උසස් නිලධාරීවරයෙකු ඒෂීයන් මිරර් වෙත පැවසුවා.

මේ පිළිබඳව මීට කළකට පෙර සිටම ඉන්දියාව සමග සාකච්ඡා කර තිබූ බව ද හෙතෙම වැඩිදුරටත් සඳහන් කළා.

ඉන්දියාවේ චෙන්නායි හෝ නවදිල්ලි වෙත ගුවන් ගන්නා ගුවන් යානා ආපසු පැමිණීමේ දී , එම යානා වලට අවශ්‍ය ඉන්ධන එම ගුවන් තොටුපළ වලින් ලබා ගෙන පැමිණීමට කටයුතු කරන බව ද එම නිලධාරීයා සදහන් කළා.

එමෙන්ම ඩුබායි සහ සිංගප්පූරුව යන රටවල ජාත්‍යන්තර ගුවන් තොටුපළ වලින් ද මේ ආකාරයට ශ්‍රී ලංකාව වෙත පැමිණෙන ගුවන් යානා වලට අවශ්‍ය ඉන්ධන ලබා ගැනීමට ගුවන් සේවා සමාගම් කටයුතු කරමින් සිටින බව ද ගුවන් තොටුපළ ආරංචි මාර්ග සදහන් කළා.