hit counter

2024 ජූනි මස 19 වන බදාදා

2024 මැයි 29, පෙ.ව. 12:05



පවතින අධික වර්ෂාව හේතුවෙන් ඇතිවිය හැකි රෝග තත්ත්ව කිහිපයක් පිළිබඳව සෞඛ්‍ය විශේෂඥයින් අනතුරු ඇඟවීමක් සිදු කරනවා.

එහිදී ඩෙංගු, ලෙප්ටොස්පයිරෝසිස්, පාචන රෝග සහ ඉන්ෆ්ලුවෙන්සා ඇතුළු සෘතුමය රෝගවල වැඩිවීමක් පිළිබඳවයි ඔවුන් අනතුරු ඇඟවීම සිදු කරන්නේ.

පසුගිය සති කිහිපය තුළ ඉන්ෆ්ලුවෙන්සා රෝගීන්ගේ පෙර නොවූ විරූ ලෙස වැඩි වීමක් දක්නට ලැබෙන බවද සෞඛ්‍ය විශේෂඥයින් පවසනවා.

එමෙන්ම මෙම කාලය තුළ ඩෙංගු උණ සැලකිය යුතු තර්ජනයක් ලෙස පවතින බවත් මහජනතාව තම නිවෙස් අවට රැඳෙන ජලය ඉවත් කර මදුරු විකර්ෂක භාවිත කිරීම ඉතා වැදගත් බවයි ඔවුන් පෙන්වා දෙන්නේ.

තවද, ලෙප්ටොස්පයිරෝසිස්, සාමාන්‍යයෙන් ‘මී උණ’ ලෙස හඳුන්වනු ලබන අතර, ඒ පිළිබඳ දැඩි සැලකිලිමත් ලෙස පසුවන මෙන් සෞඛ්‍ය විශේෂඥයින් පෙන්වා දෙනවා.

ගංවතුර ඇති ප්‍රදේශ ආසාදිත සතුන්ගේ මුත්‍රාවලින් අපවිත්‍ර වී ලෙප්ටොස්පයිරෝසිස් ව්‍යාප්තියට හේතු විය හැකි බවයි ඔවුන් සඳහන් කරන්නේ.

එබැවින්, ජලයෙන් යටවී ඇති ස්ථානවල වැඩ කරන පුද්ගලයින් ආරක්ෂිත ඇඳුම් ඇඳිය ​​යුතු අතර උණ, හිසරදය සහ මාංශ පේශි වේදනාව වැනි රෝග ලක්ෂණ ඇත්නම් වෛද්‍ය උපදෙස් ලබා ගත යුතු බවද සෞඛ්‍ය විශේෂඥයින් අවධාරණය කරනවා.

මෝසම් කාලයේදී දූෂිත ජල මූලාශ්‍ර නිසා පාචන රෝග ඇතිවීමේ අවදානම ඇති බවත් පිරිසිදු පානීය ජලය පානය කිරීම සහ හොඳ සනීපාරක්ෂක පිළිවෙත් පවත්වා ගැනීම ඉතා වැදගත් බවත් ඔවුන් සඳහන් කරනවා.

මේ සියලු රෝග තත්ත්වයන් උදෙසා ආරක්ෂාකාරී ක්‍රියාමාර්ග අනුගමනය කරන ලෙස මෙන්ම සෙම්ප්‍රතිශ්‍යාව, ඉන්ෆ්ලුවෙන්සා, ඇදුම වැනි රෝග උග්‍රවන අවස්ථාවන් හි මෙන්ම නිරන්තර ශ්වසන රෝග ලක්ෂණ සඳහා වෛද්‍ය ප්‍රතිකාර ලබා ගැනීම වැදගත් බවයි සෞඛ්‍ය විශේෂඥයින් පෙන්වා දෙන්නේ.





ලිපිය සමග සම්බන්ධ නවතම පුවත්: