ඔබේ දරුවාගේ ඡායාරූප අන්තර්ජාලයට දාන්න කලින් දෙපාරක් හිතන්න- කෘතිම බුද්ධිය හරහා එන අලුත්ම තර්ජනය මෙන්න

2026 සැප්‍තැම්‍බර් 18, පෙ.ව. 12:11

---

---

AI මගින් ජනනය කරන ළමා ලිංගික අපයෝජන ද්‍රව්‍ය (CSAM) හේතුවෙන් මතුවෙමින් පවතින නව අවදානම් පිළිබඳව ශ්‍රී ලංකා පොලිසිය දැඩි අනතුරු ඇඟවීමක් නිකුත් කර තිබේ.

තාක්ෂණයේ වේගවත් දියුණුවත් සමඟ අන්තර්ජාලය ඔස්සේ ළමුන්ට එල්ල වන තර්ජන නව ස්වරූපයන් ගනිමින් පවතින බව පොලිසිය පෙන්වා දෙයි. පොලිසියට අනුව, සාම්ප්‍රදායිකව CSAM යනු ලිංගික අපයෝජනයට ලක් වූ ළමුන්ගේ සැබෑ ඡායාරූප හෝ වීඩියෝ ඇතුළත් ද්‍රව්‍ය වේ.

එහෙත් කෘතිම බුද්ධි තාක්ෂණයේ වේගවත් වර්ධනයත් සමඟ, අපරාධකරුවන්ට ළමුන්ගේ සාමාන්‍ය ඡායාරූප හෝ රූප වෙනස් කර අපයෝජන ස්වරූපයෙන් භාවිත කිරීමට හැකියාව ලැබී ඇති බව පොලිසිය සඳහන් කරයි.

මෙවැනි ක්‍රියා දරුවන්ගේ පෞද්ගලිකත්වයට, ගෞරවයට, චිත්තවේගීය යහපැවැත්මට සහ මානසික සෞඛ්‍යයට බරපතළ තර්ජනයක් විය හැකි බවද පොලිසිය අවධාරණය කරයි.

අන්තර්ජාලය ඔස්සේ දරුවෙකු තර්ජනයකට හෝ උපාමාරුවකට ලක්ව ඇති බවට ඉඟි පළ විය හැකි බැවින්, ඒ පිළිබඳව අවධානයෙන් සිටින ලෙස පොලිසිය දෙමාපියන් සහ රැකබලා ගන්නන්ගෙන් ඉල්ලා සිටී.

එවැනි සංඥා අතර:

ළඟා වන විට දුරකථන හෝ පරිගණක තිර වසා දැමීම හෝ සැඟවීම.

පෞද්ගලිකත්ව සැකසුම් හදිසියේ වෙනස් කිරීම හෝ රහස් ගිණුම් නිර්මාණය කිරීම.

වරදකාරිත්වය, බිය හෝ සමාජයෙන් ඉවත්වීම වැනි චිත්තවේගීය වෙනස්කම්.

අන්තර්ජාල සන්නිවේදනයන් සම්බන්ධයෙන් අසාමාන්‍ය රහස්‍යභාවයක් දැක්වීම.

දරුවන් ආරක්ෂා කිරීම සඳහා පවුල් විසින් පූර්වාරක්ෂාකාරී පියවර ගත යුතු බවද පොලිසිය පවසයි.

ඒ සඳහා:

අන්තර්ජාල අවදානම් පිළිබඳව දරුවන් සමඟ ඔවුන්ගේ වයසට ගැළපෙන, විවෘත හා මිත්‍රශීලී සංවාද පවත්වා ගැනීම.

සමාජ මාධ්‍ය ඔස්සේ දරුවන්ගේ ඡායාරූප බෙදා ගැනීමේදී පෞද්ගලිකත්ව සැකසුම් භාවිත කිරීම.

ආගන්තුකයන් සමඟ පෞද්ගලික තොරතුරු හෝ ඡායාරූප බෙදා ගැනීමෙන් වළකින ලෙස දරුවන් දැනුවත් කිරීම.

වෙබ් අඩවි, යෙදුම් සහ අන්තර්ජාල සේවා භාවිතය සඳහා සුදුසු මාපිය පාලන ක්‍රම භාවිත කිරීම.

අන්තර්ජාලය ඔස්සේ සිදුවන සිදුවීම් පිළිබඳව කිසිදු බියකින් හෝ දොස් පැවරීමකින් තොරව වාර්තා කළ හැකි බවට දරුවන්ට සහතික කිරීම.

ඩිජිටල් යුගයේ දරුවන් ආරක්ෂා කිරීම දැනුවත්භාවයෙන් ආරම්භ වන බව ශ්‍රී ලංකා පොලිසිය අවධාරණය කරයි.

තාක්ෂණය අඛණ්ඩව පරිණාමය වන බැවින්, දරුවන් සඳහා ආරක්ෂිත අන්තර්ජාල පරිසරයක් නිර්මාණය කිරීමට දෙමාපියන් සහ රැකබලා ගන්නන් සුපරීක්ෂාකාරීව, දැනුවත්ව සහ ක්‍රියාශීලීව කටයුතු කළ යුතු බවද පොලිසිය පවසයි.

---