පාසල් සිසුන් ගැන බරපතළ අනාවරණයක්

2023 දෙසැම්‍බර් 16, පෙ.ව. 12:05

මහනුවර ජාතික රෝහලේ වෛද්‍ය, නීතිඥ පාලිත බණ්ඩාර සුබසිංහ මහතා මහනුවර කලාපයේ පාසල් සිසු සිසුවියන් 72කට ප්‍රශ්න 50ක් යොමුකර ලබාගත් පිළිතුරු විශ්ලේෂණය කිරීමේදී හෙලළිවී ඇත්තේ ලිංගික සංසර්ගයට කැමැත්ත පළ කිරීමේ අවම වයස පිළිබඳ වයස අවුරුදු 14-16ත් අතර පාසල් දරුවන්ගෙන් 97.3% කට අවබෝධයක් නොමැති බවයි.

ශ්‍රී ජයවර්ධනපුර විශ්වවිද්‍යාලයේ අපරාධ විද්‍යාව සහ අපරාධ යුක්තිය පිළිබඳ පශ්චාත් උපාධි ඩිප්ලෝමාව වෙනුවෙන් සිදුකළ මෙම සමීක්ෂණයට පිරිමි ළමයින් 36 දෙනකු සහ ගැහැනු ළමයින් 36 දෙනකු සම්බන්ධ කරගෙන ඇති අතර, සිංහල ජාතික සිසුන් 30ක් මුස්ලිම් ජාතික සිසුන් 30ක් සහ දෙමළ ජාතික සිසුන් 12ක් සම්බන්ධ කර ගනිමින් සිදු කළ සමීක්ෂණයේදී ව්‍යවස්ථාපිත ස්ත්‍රී දූෂණයකින් (වයස අවුරුදු 16ට අඩු කාන්තාවක් සමඟ ඇගේ කැමැත්ත ඇතිව හෝ නැතිව ලිංගික සංසර්ගයේ යෙදීම) පසුව සිදුවන ගැබ් ගැනීමකදී ගබ්සා කිරීමට මෙරට නීතියෙන් අවසරයක් නොමැති බව දැන සිට ඇත්තේ 20.8 % බව ද අනාවරණය වී ඇත.

ශ්‍රී ලංකාවේ මුස්ලිම් නීතිය අනුව මුස්ලිම් ස්ත්‍රියකට විවාහ විය හැකි අවම වයස අවුරුදු 12ක් වන අතර, කාතිවරයාගේ අනුමැතියට යටත්ව වයස අවුරුදු 12ට අඩු ස්ත්‍රීන්ට ද විවාහ වීමට පුළුවන. මෙම තත්ත්වය පිළිබඳ නිවැරැදි දැනුමක් තිබී ඇත්තේ දත්ත දායකයින් දෙදෙනකුට පමණි. ඒ අනුව 97.3% කට මේ සම්බන්ධව දැනුමක් නොමැති බව සමීක්ෂණ වාර්තාව පෙන්වයි.

ව්‍යවස්ථාපිත ස්ත්‍රී දූෂණයකදී ලබාදෙන දඬුවම අවුරුදු 10 සිට 20 දක්වා සිරදඬුවමක් වන අතර, ඒ සම්බන්ධ දැනුම 58.3% ක් සතුව තිබී ඇත. ව්‍යවස්ථාපිත ස්ත්‍රී දූෂණයකදී නෛතික කටයුතු කරා යොමු වීමට වින්දිත ස්ත්‍රියගේ කැමැත්ත අත්‍යවශ්‍ය නොවන අතර, ඒ බව දැන සිට ඇත්තේ සමීක්ෂණයට එක් වූ පිරිසෙන් 34.7 % ක් පමණි. බාලවයස්කාර දැරියක් ගැබ් ගත් අවස්ථාවක ගැබ විනාශ කිරීමේ හැකියාවක් ශ්‍රී ලංකාවේ නීතියට අනුව නොහැකි බව දැන සිට ඇත්තේ මෙම පිරිසෙන් 20.8 % කි.

මේ අනුව, වෛද්‍ය පාලිත බණ්ඩාර මහතා සමීක්ෂණය මඟින් පෙන්වා දෙන්නේ, ලිංගික චර්යාවන් සහ ඒ හා සම්බන්ධිත නීතිය පිළිබඳ දැනුම වැඩි කිරීම කාලෝචිත අවශ්‍යතාවක් බවයි.