කාන්තාවන් සහ ළමුන් අනතුරේ.. ඡායාරූප හා ලිංගික දර්ශන ජාවාරමක්

2026 අගෝස්‍තු 28, පෙ.ව. 12:18

---

---

ළමුන්ගේ සහ කාන්තාවන්ගේ ලිංගික දර්ශන මෙන්ම පුද්ගලික ඡායාරූප මුදලට අලෙවි කිරීමේ සහ මිලදී ගැනීමේ ඔන්ලයින් ජාවාරමක් පිළිබඳ කරුණු අනාවරණය වී ඇති බව ළමා හා කාන්තා කටයුතු අමාත්‍යාංශය සඳහන් කරයි.

ෆේස්බුක් (Facebook) ඇතුළු ප්‍රමුඛ සමාජ මාධ්‍ය ජාල තුළ විවිධ සමූහ (Groups) නිර්මාණය කරගනිමින් මෙම ඔන්ලයින් ජාවාරම සිදුවන බව ළමා හා කාන්තා කටයුතු අමාත්‍යාංශය සඳහන් කරයි.

මෙම තත්ත්වය සම්බන්ධයෙන් අමාත්‍යාංශයේ පූර්ණ අවධානය යොමු වී ඇති බවත් කාන්තාවන් සහ ළමුන් වින්දිතභාවයට පත්වීම වැළැක්වීම සඳහා අවශ්‍ය කඩිනම් මැදිහත්වීම් සිදුකරන බවද එම අමාත්‍යාංශය සඳහන් කරයි.

සිදුකරන ලද මූලික සොයා බැලීම්වලින් අනාවරණය වූ තොරතුරු පිළිබඳ සොයාබැලීම සඳහා ශ්‍රී ලංකා පොලිස් ළමා හා කාන්තා කාර්යාංශය මෙන්ම පරිගණක අපරාධ විමර්ශන කොට්ඨාසය වෙතද යොමුකර ඇති බවද සඳහන් කරයි.

ජාවාරම්කාර සමූහ පරීක්ෂා කිරීමේදී ව්‍යාජ ගිණුම් හරහා තම සමීපතමයින්ගේ සහ පවුලේම සාමාජික කාන්තාවන්ගේ ඡායාරූප හා වීඩියෝ පට මෙලෙස අලෙවි කිරීමට උත්සාහ කරන බවට හෙළිවී ඇති අතර මෙම සමූහ බොහොමයක් විදේශ රටවල සිට මෙහෙයවන බවද හඳුනාගෙන ඇත.

තම පවුලේ කාන්තාවන් සහ ළමුන් නිවස තුළදීම මෙලෙස අනාරක්ෂිත වීමේ අවධානමක් පවතින බැවින් දෙමව්පියන් සිය දරුවන්ගේ සමාජ මාධ්‍ය භාවිතය සහ ඔවුන් ඇසුරු කරන මිතුරන් පිළිබඳ දැඩි අවධානයෙන් පසුවන ලෙසද එම අමාත්‍යාංශය සඳහන් කරයි.

යම් හෙයකින් පවුලේ අයෙකු මෙවැනි ජාවාරමක ගොදුරක් හෝ ඊට ඇබ්බැහි වූවෙකු ලෙස නිරීක්ෂණය වුවහොත්, ඔවුන් වහාම මනෝ සමාජයීය උපදේශනය වෙත යොමු කිරීමට පියවර ගන්නා ලෙසද උපදෙස් ලබාදී ඇත.

මෙවැනි නීති විරෝධී ක්‍රියාවලින් ආරක්ෂා වීමට සහ අදාළ නෛතික සහය ලබාගැනීම සඳහා 1938 සහ 1929 යන ගාස්තු රහිත උපකාරක දුරකථන අංක ළමා හා කාන්තා කටයුතු අමාත්‍යාංශය විසින් හඳුන්වා දී ඇත.

---