පාසල් සිසුන්ගේ ආරක්ෂාව ගැන අධ්‍යාපන අමාත්‍යාංශයෙන් වැදගත් නිවේදනයක්

2026 ජූනි 24, පෙ.ව. 12:11

---

---

අධ්‍යාපන අමාත්‍යාංශයේ ලේකම් නාලක කලුවැව මහතා පාසල් සිසුන්ගේ ආරක්ෂාව සම්බන්ධයෙන් වැදගත් නිවේදනයක් නිකුත් කර තිබේ.

ඒ අනුව, සිසුන්ගේ ආරක්ෂාව සහතික කිරීම සහ ලිංගික හිංසනය හෝ අපයෝජනය පිළිබඳ පැමිණිලි සම්බන්ධයෙන් වහාම නීතිමය පියවර ගැනීම පාසල් විදුහල්පතිවරුන්ගේ වගකීමකි.

අම්බලන්තොට ප්‍රදේශයේ පාසලක ශිෂ්‍යාවක් අපයෝජනයට ලක් කිරීමේ සිද්ධිය වසන් කිරීමේ චෝදනාව මත විදුහල්පතිවරයා සහ උප විදුහල්පතිවරයා අත්අඩංගුවට ගෙන ඇති පසුබිමක නාලක කලුවැව මහතා මේ බව සඳහන් කළේය.

අධ්‍යාපන අමාත්‍යාංශයේ ලේකම්වරයා මේ පිළිබඳව අදහස් දක්වමින්, අධ්‍යාපන අමාත්‍යාංශය විසින් නිකුත් කරන ලද විශේෂ චක්‍රලේඛවලට අනුව, සිසුන් ආරක්ෂා කිරීම සඳහා විදුහල්පතිවරුන්ට පැහැදිලි වගකීම් පවරා ඇත.

පාසල්වල ළමා ආරක්ෂණ ක්‍රියා පටිපාටි නිසි ලෙස ක්‍රියාත්මක වන බවට ඔවුන් සහතික විය යුතුය.

පාසල්වල විනය පවත්වා ගැනීම සම්බන්ධයෙන් 2016/12 දරන චක්‍රලේඛයට අනුව, සිසුන්ට කිසිදු ශාරීරික හෝ මානසික හානියක් සිදු නොවන බවට පාසල් පරිපාලනය සහතික විය යුතුය.

සියලුම පාසල්වල ‘පාසල් ළමා ආරක්ෂණ කමිටු’ පිහිටුවිය යුතුය. මේ හරහා සිසුන්ට එල්ල වන තර්ජන හඳුනාගෙන නිසි ආකාරයෙන් පැමිණිලි විසඳිය යුතුය,” ඔහු පැවසීය.

---