අලුත් ගැසට්ටුවක්.. වාහන මිල තවත් ඉහළට…?

2026 ජූලි 06, පෙ.ව. 12:11

---

---

 රජය විසින් ඉදිරියේදී නිකුත් කිරීමට නියමිත නව ගැසට් පත්‍රයක් හේතුවෙන් මෙරට වාහන මිල නැවත වරක් විශාල ලෙස ඉහළ යාමේ අවදානමක් පවතින බව ශ්‍රී ලංකා වාහන ආනයනකරුවන්ගේ සංගමය පවසයි.

එම සංගමයේ සභාපති ඉන්දික සම්පත් මෙරංචිගේ මහතා සඳහන් කරන්නේ, දැනට ක්‍රියාත්මක 2016 වාහන තක්සේරු කිරීමේ ගැසට් පත්‍රය සංශෝධනය කිරීමට රජය සූදානම් වන බවයි.

දැනට භාවිත වන ගැසට් පත්‍රය වසර 10ක් පමණ පැරණි එකක් වන අතර, ලෝක රේගු සංවිධානයේ (WCO) සම්මුතීන්ට අනුව වාහන සඳහා අවම මිලක් නියම කිරීමට නොහැකි වීම හේතුවෙන් මෙම නව සංශෝධනය සිදු කිරීමට රජයට සිදුව ඇත.

මේ හරහා වාහනවල වටිනාකම තක්සේරු කරන ක්‍රමවේදය වෙනස් වන අතර, එහි ප්‍රතිඵලයක් ලෙස බදු මුදල් ඉහළ යාමෙන් අලුත් මෙන්ම පාවිච්චි කරන ලද වාහනවල මිල ගණන් ද ඉදිරියේදී සැලකිය යුතු ලෙස ඉහළ යනු ඇතැයි ඒ මහතා පෙන්වා දෙයි.

මේ වන විටත් පනවා ඇති සියයට 150ක අධිභාරය (Surcharge) හේතුවෙන් වෙළෙඳපොළට අලුතින් පැමිණෙන වාහනවල මිල ගණන් ලක්ෂ ගණනින් ඉහළ ගොස් ඇති බව ද සභාපතිවරයා සඳහන් කළේය. 

පවතින තත්ත්වය හමුවේ වාහනයක් මිලදී ගැනීමට බලාපොරොත්තු වන පාරිභෝගිකයන්ට වත්මන් මිල ගණන් යටතේ වාහන මිලදී ගැනීම වඩාත් ලාභදායී වන බව ද මෙරංචිගේ මහතා අවධාරණය කරයි.

දැනට වෙළෙඳපොළේ පවතින බොහෝ වාහන පැරණි මිල ගණන් යටතේ පවතින අතර, ආනයනකරුවන් සිය බැංකු පොලී පියවා ගැනීම සඳහා අවම ලාභයක් තබා ගනිමින් වාහන අලෙවි කරන බැවින් පාරිභෝගිකයන්ට මේ මොහොතේ වැඩි වාසියක් හිමිවන බව ද ඔහු වැඩිදුරටත් ප්‍රකාශ කළේය.

---