වාහන 50% අධිබාරය ඉවත් නොකෙරේ.. වසර අවසානය තෙක් දිගු කෙරේ…

2026 අගෝස්‍තු 15, ප.ව. 12:21

ශ්‍රී ලංකාවට ආනයනය කරනු ලබන මෝටර් වාහන සඳහා පනවා ඇති රේගු ආනයන බදු මත 50% අධිභාරයක් පැනවීමට රජය තීරණය කර තිබේ. මුදල්, ක්‍රමසම්පාදන සහ ආර්ථික සංවර්ධන අමාත්‍යවරයා ලෙස ජනාධිපති අනුර කුමාර දිසානායක මහතා විසින් අදාළ රේගු නිවේදනය නිකුත් කර ඇත.

1988 අංක 83 දරන පනතින් සංශෝධිත රේගු ආඥා පනතේ 10අ වගන්තිය යටතේ පනවා ඇති මෙම නව බදු සංශෝධනය, 2026 අගෝස්තු මස 15 වන දින සිට 2026 දෙසැම්බර් මස 31 වන දින දක්වා බලපැවැත්වෙන පරිදි ක්‍රියාත්මක වේ.

මෙම නියමයට අනුව, අදාළ කාලසීමාව තුළ ආනයනය කරන වාහන සඳහා පවතින සාමාන්‍ය රේගු ආනයන බදු සහ වරණීය බදු මත මෙම අතිරේක අධිභාරය එකතු වනු ඇත.

කෙසේ වෙතත්, 2026 මැයි මස 15 වන දින හෝ ඊට පෙර ණයවර ලිපි විවෘත කරන ලද මෝටර් වාහන ආනයනය සඳහා මෙම අධිභාරය අදාළ නොවන බව රේගු නිවේදනයේ සඳහන් වේ.

එසේ වුවද, මැයි 15 දිනට පෙර ණයවර ලිපි විවෘත කළද, අදාළ වාහන නැව්ගත කළ දිනය 2026 නොවැම්බර් මස 15 වන දිනට පසුවන්නේ නම්, එම වාහන සඳහා ද මෙම 50%ක අධිභාරය අනිවාර්යයෙන්ම ගෙවීමට සිදුවන බව රජය අවධාරණය කරයි.

වාහන හඳුනාගැනීමේ අංකය, එන්ජින් අංකය හෝ තාක්ෂණික පිරිවිතරයන්හි සුළු සංශෝධනයන් සිදුකර ඇති අවස්ථාවලදී ද නියමිත කාලසීමාවන්ට යටත්ව මෙම බදු සහනය හිමිවන බව එම නිවේදනයේ වැඩිදුරටත් දැක්වේ.