අත්දැකීම් ඇති උපාධිධාරින්ට ගුරු සේවයට යන්න විශේෂ අවස්ථාවක්

2026 පෙබරවාරි 04, පෙ.ව. 12:11

ජනාධිපති අනුර කුමාර දිසානායක මහතා පාසල්වල සේවය කර අත්දැකීම් ඇති උපාධිධාරීන් ගුරු සේවයට ඇතුළත් කිරීම රජයේ අපේක්ෂාවක් බව පැවසීය.

ඒ අනුව, ජනාධිපතිවරයා මෙහිදී ගුරු ව්‍යවස්ථාවට අනුකූලව විභාගයට පෙනී සිටීමට සංවර්ධන නිලධාරීන් ආරාධනා කරන බවත් ප්‍රකාශ කළේය.

දින කිහිපයක් තිස්සේ ජනාධිපති කාර්යාලය අසල පැවති විරෝධතාවය අතරතුර, පාසල් සංවර්ධන නිලධාරීන්ගේ සංගමයේ නියෝජිතයින් සහ ජනාධිපතිවරයා අතර ජනාධිපති කාර්යාලයේදී සාකච්ඡාවක් පැවැත්වුණි.

මෙම හමුව ජනාධිපති අනුර කුමාර දිසානායක මහතාගේ ආරාධනය අනුව සිදු විය. සාකච්ඡාවේදී ජනාධිපතිවරයා සඳහන් කළේ, සංවර්ධන නිලධාරීන්ගේ වෘත්තිය අභිමානය සහ ගරුත්වය ආරක්ෂා කිරීම රජයේ අරමුණ බවයි.