ආණ්ඩුව පෙරළන්න පරද්දන්න විසුරුවන්න පුළුවන්.. රාජ්‍ය බෑ..

2026 පෙබරවාරි 05, පෙ.ව. 12:15

මාන්න මහතා පවසයි.

ඒ මහතා මේ බව සඳහන් කළේ බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු පක්ෂ මූලස්ථානයේ දී පැවති සාකච්ඡාවකින් අනතුරුව මාධ්‍ය වෙත අදහස් දක්වමිනි.

එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.

“මේ ආණ්ඩුවේ ඇමැතිවරයෙක් පසුගියදා බොහොම ආන්දෝලනාත්මක ප්‍රකාශයක් කළා. ආණ්ඩුව කරමින් සිටින්නේ සුද්දගේ කාලයේ ජෝන් ඩොයිලි කළ කාර්යය. අපෙත් සමහර පිරිසකට මේ ගැන තේරුණේ නෑ. ඒ ඇමැතිවරයා තමයි මේ ආණ්ඩුවේ ජෝන් ඩොයිලි. රාජ්‍ය තමන්ට අත්පත් විය යුතුයි කියලා ආණ්ඩුවක් විශ්වාස කරනවා නම් එය ආඥාදායකත්වයේ මූලිකම ලක්ෂණය ලෙස තමයි දේශපාලන විද්‍යාව ලෝකයට උගන්වා තිබෙන්නේ.

පාලකයෙක් විශ්වාස කරනවා නම් රාජ්‍ය තමන් සතු විය යුතුයි කියලා එය තමයි ආඥාදායකත්වය. දේශපාලන විද්‍යාවේ පැරණි පොතපත 14 වැනි ලුවි රජ්ජුරුවන්ගේ ප්‍රකාශයක් උපුටා ගන්නවා තහවුරු කරන්න. ප්‍රංශයේ ලුවි රජ්ජුරුවෝ කියනවා රාජ්‍ය යනු මමය කියලා. මේ ආණ්ඩුවත් විශ්වාස කරනවා රාජ්‍ය කියන්නේ ඔවුන් කියලා. ආණ්ඩුව පෙරළන්න පුළුවන්, පරද්දන්න පුළුවන්, විසුරුවන්න පුළුවන්, හැබැයි රාජ්‍ය එසේ වෙන්නේ නෑ. මේ පිරිස හිතනවා මේ රාජ්‍ය ඔවුන්ගේ කියලා.

හැබැයි මේ ආණ්ඩුව විසින් ඍජුව සහ ඇතැම් අවස්ථාවලදී ඇතැම් ක්‍රියාකාරකම් හරහා නොකියා ප්‍රකාශ කරනවා රාජ්‍ය ඔවුන් සතුයි කියලා. රටේ සියලු පුරවැසියෝ රාජ්‍යයේ සාමාජිකයෝ. හැබැයි රටේ සෑම කෙනෙක්ම ආණ්ඩුවේ සාමාජිකයෙක් නොවේ.

හැබැයි මොවුන් සියලු දෙනා තමන් යටතේ සිටින දේශපාලන ප්‍රතිමත නැති සමාජයක් නිර්මාණය කරන්න දරන උත්සාහය තමයි මෙහිදී අපට පෙනී යන්නේ. රාජ්‍ය සතුව තිබෙන බලය ආණ්ඩුවට දෙන්න බෑ. ආණ්ඩුව කියන්නේ රාජ්‍ය නමැති ස්වාමියාගේ සේවකයා. රාජ්‍යයේ සහ මහජනයාගේ කැමැත්ත ප්‍රතිපත්ති බවට පරිවර්තනය කර එය ක්‍රියාත්මක කිරීම ආණ්ඩුවේ රාජකාරිය. එය නොකර ප්‍රතික්ෂේප වන චෙක්පත් දීලා මිනිස්සු රවටා, ප්‍රතිවාදියාවත් දේශපාලනිකව බියගන්වා, ආයතනික ප්‍රධානීන්ට රාජකාරිය කරන්න දෙන්නේ නෑ ඔවුන්ගේ දේශපාලන මතයට නැමුණේ නැතිනම්. ඒ වගේ තැනක සිට මේ පිරිස ඉතාම විකෘති දේශපාලන බලයක් තමන් වෙත පවරාගන්න උත්සාහ කරමින් සිටිනවා.”