මගේ තාත්තව ඝාතනය කරපු දුමින්ද සිල්වා කියන පුද්ගලයට සමාව දෙනව නම් දෙන්න පුළුවන් ජනාධිපතිවරයාට, ජනාධිපති සමාවක් විතරයි.. මම ඔහුට මගේ හදවතින් සමාව දීලා ඉවරයි…

2026 මාර්තු 17, ප.ව. 3:52

භාරත ලක්ෂ්මන් ප්‍රේමචන්ද්‍ර ඝාතනයට වරදරකරු වී මරණ දඬුවම හිමිව සිටින හිටපු පාර්ලිමේන්තු මන්ත්‍රී ආර්. දුමින්ද සිල්වාට තමා හදවතින්ම සමාව දුන් බව සමගි ජන බලවේගයේ රත්මලාන ආසනයේ සංවිධායිකා, හිටපු පාර්ලිමේන්තු මන්ත්‍රිනී හිරුණිකා ප්‍රේමචන්ද්‍ර මහත්මිය ඊයේ (16දා) ප්‍රකාශ කළාය.

ඇය මේ බව ප්‍රකාශ කළේ කොළඹ අලුත්කඩේ මහේස්ත්‍රාත් අධිකරණයට පැමිණි අවස්ථාවේ මාධ්‍ය කළ විමසීමකට පිළිතුරු දෙමිනි.

කොළඹ මහාධිකරණය විසින් වැරැදිකරුවකු කර ඇති ආර්. දුමින්ද සිල්වාට මරණ දඬුවමින් ගැලවීමේ හැකියාවක් ඇත්තේ ජනාධිපති සමාව යටතේ පමණක් බව ප්‍රකාශ කළාය. තමන්ට එවැනි හැකියාවක් නොමැති බැවින් තමන් ඔහුට හදවතින් සමාව දුන් බව ඇය කියා සිටියාය.

වර්තමානය වන විට තමන් දැඩි ලෙස කර්මය විශ්වාස කරන්නට පෙලඹී ඇති බව ඇය පැවසුවාය. ජනාධිපතිවරයා හා ආණ්ඩුව කටයුතු කරන ආකාරය අනුව ඔවුන් ද කර්මය විශ්වාස කරන බවට තමන්ට විශාල විශ්වාසයක් ඇතැයි ඇය පෙන්වා දුන්නාය.

මේ ගැන වැඩිදුරටත් අදහස් දැක්වූ ඇය ‘වපුරන දේවල් අනුව අස්වැන්න’ ලැබෙන බව කීය. පියා ඝාතනය කිරීමෙන් පසු දුමින්ද සිල්වා හා තමා අතර පැවැති වෛරී චක්‍රය තවදුරටත් පැවැතිය යුතු නැති බව හිරුණිකා ප්‍රේමචන්ද්‍ර මහත්මිය ප්‍රකාශ කළාය.

ආර්. දුමින්ද සිල්වාට හිටපු ජනාධිපති ගෝඨාභය රාජපක්ෂ මහතා ප්‍රදානය කළ ජනාධිපති සමාව ආපසු කැඳවීමට හැකි වූයේ එය නිසි පරිදි ප්‍රදානය නොකිරීම නිසා බව ප්‍රකාශ කළ ඇය, වර්තමාන ජනාධිපතිවරයා එවැනි වැරැදි තීරණයක් ගනී යැයි තමා නොසිතන බව කියා සිටියාය. ජනාධිපති සමාව ආපසු කැඳවීම හැර තමන්ට පියා වෙනුවෙන් කිරීමට වෙනත් කිසිවක් නැති බව ඇය වැඩිදුරටත් පැවසුවාය. දුමින්ද සිල්වා සම්බන්ධයෙන් ඉදිරියේ කුමන තීන්දුවක් ලැබුණත් ඉන් තමන්ට සන්තෝෂයක් හෝ කනගාටුවක් නොමැතිය යන්න ඇගේ අදහස විය.

කොළොන්නාවේ දේශපාලන ගැටුම ඉදිරියට පැවතුණහොත් ඉන් තමන්ගේ ඊළඟ භවයට ද අකුසල් රැස්වන බව ඇය පැවැසීය. මේ සිද්ධිය ඔස්සේ තවදුරටත් මානසිකව ඇලී ගැලී සිටීම සිය මානසික හා ශාරීරික සෞඛ්‍යයට අනවශ්‍ය බරක් බව ඇය පැවසුවාය. එබැවින් එම බැඳීම්වලින් මිදීම ඇගේ අරමුණ බව ප්‍රකාශ කළාය. දුමින්ද සිල්වා සමඟ ගොඩනැඟී ඇති මිත්‍රත්වය ආණ්ඩුවට එරෙහිව ගොඩනැ‍ඟී ඇති විරුද්ධ පක්ෂ සන්ධානයේ දිගුවක් දැයි මාධ්‍ය විමසා සිටි අවස්ථාවේ ඇය කියා සිටියේ, ඔවුන්ගේ පවුලට අයත් මාධ්‍ය ජාලය සමඟ තමන්ට කිසිම දේශපාලන ඩීල් එකක් නොමැති බවයි. “දුමින්දට මම සමාව දුන්නේ මුදල් නිසා නෙමෙයි, පියාගේ මරණයෙන් පසු මගේ ජීවිතයේ ඇතිවූ හිස් තැන කාටවත් පුරවන්න ලැබුණේ නැහැ. ජීවිතයකින් වන්දි ගෙව්වත් මට නැවත ඒ ජීවිතය ලැබෙන්නෙ නැහැ” යැයි ඇය කිව්වාය.

මෙම සමාව දීම පිටුපස කිසිදු මුදල් හෝ දේශපාලන ගනුදෙනුවක් නොමැති බව ඇය අවධාරණය කළාය. තමන් ඔහුට සමාව දුන්නේ මුදල් නිසා බවට සමාජ මාධ්‍යයේ පළව ඇති චෝදනා දේශපාලන අනාථයන්ගේ ප්‍රකාශ බව ඇය පෙන්වා දුන්නාය.

2011 වසරේ කොළොන්නාවේ දී භාරත ලක්‍ෂ්මන් ප්‍රේමචන්ද්‍ර හිටපු පාර්ලිමේන්තු මන්ත්‍රීවරයා ඇතුළු සිව් දෙනෙකුට වෙඩි තබා ඝාතනය කළ බවට වරදකරු වී මරණ දණ්ඩනය නියම වූ හිටපු පාර්ලිමේන්තු මන්ත්‍රී දුමින්ද සිල්වාට හිටපු ජනාධිපති ගෝඨාභය රාජපක්ෂ මහතා 2021 වසරේ ජුනි 24දා ජනාධිපති පොදු සමාවක් ප්‍රදානය කර නිදහස් කළේය.