ආණ්ඩුවට එක්වෙනවාද? හර්ෂද සිල්වාගෙන් විශේෂ ප‍්‍රකාශයක්

2026 මැයි 07, ප.ව. 2:47

---

---

තමන් ආණ්ඩුවට සම්බන්ධ වීමට සූදානම් වන බවට දේශපාලන කරළියේ පැතිර යන කටකතා සමගි ජන බලවේගයේ (SJB) පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා තරයේ ප්‍රතික්ෂේප කරයි.

විශේෂ ප්‍රකාශයක් කරමින් ඒ මහතා අවධාරණය කළේ, සිය දේශපාලන හැසිරීම වැරදි ලෙස අර්ථකථනය කරමින් තම අනාගතය පිළිබඳව අනවශ්‍ය කටකතා නිර්මාණය කිරීමට ඇතැම් පාර්ශව උත්සාහ දරන බවයි.

රජය තමන් සමඟ අදහස් හුවමාරු කර ගැනීමට උත්සාහ කිරීම ධනාත්මක කරුණක් ලෙස තමන් දකින නමුත්, තමන් සැමවිටම අනුගමනය කරන්නේ ස්වාධීන දේශපාලන ප්‍රවේශයක් බව මන්ත්‍රීවරයා මෙහිදී පෙන්වා දුන්නේය. 

නිවැරදි දේ නිවැරදි ලෙසත්, වැරදි දේ වැරදි ලෙසත් ප්‍රකාශ කිරීම තම දේශපාලන ප්‍රතිපත්තිය බව ඔහු වැඩිදුරටත් සඳහන් කළේය.

පාර්ලිමේන්තු රජයේ මුදල් පිළිබඳ කාරක සභාවේ (COPF) සභාපතිවරයා ලෙස තමන් කටයුතු කරන ආකාරය පිළිබඳව ඇතැම් පුද්ගලයන් අමනාපයෙන් පසුවන බව ද ඔහු පැවසීය. 

එම කමිටුවේ කටයුතු විනිවිදභාවයකින් යුතුව මෙහෙයවීම ඇතැම් පාර්ශවවලට අපහසුවක් වී ඇති බවත්, මෙවැනි කටකතා නිර්මාණය වීමට එය ද හේතුවක් විය හැකි බවත් හර්ෂ ද සිල්වා මහතා ඉඟි කළේය.

---