ජාතික ආරක්‍ෂාව තහවුරු කර අවසන්.. දැන් බලන්නේ මහජන ආරක්‍ෂාවයි.. – අරුණ ජයසේකර

2026 අගෝස්‍තු 09, පෙ.ව. 12:23

---

---

රටේ ජාතික ආරක්ෂාව දැනටමත් උපරිම අයුරින් තහවුරු කර ඇති බවත්, වර්තමානයේ රජයේ විශේෂ අවධානය යොමු වී ඇත්තේ මහජන ආරක්ෂාව තහවුරු කිරීම කෙරෙහි බවත් ආරක්ෂක නියෝජ්‍ය අමාත්‍ය අරුණ ජයසේකර මහතා පවසයි.

මාධ්‍ය වෙත අදහස් දක්වමින් ඒ මහතා මේ බව සඳහන් කළේය.

බන්ධනාගාර තුළ පසුගිය දින කිහිපය තුළ වාර්තා වූ අවාසනාවන්ත සිදුවීම් මාලාව සම්බන්ධයෙන් රජය දැඩි අවධානය යොමු කර ඇති බවත්, ඒ පිළිබඳව අධිකරණ අමාත්‍යවරයා සහ කැබිනට් ප්‍රකාශක නලින්ද ජයතිස්ස මහතා ද විශේෂ ප්‍රකාශ සිදු කර ඇති බවත් ඔහු පෙන්වා දුන්නේය.

මෙම තත්ත්වය පාලනය කිරීම සඳහා පොලිසිය සහ අධිකරණ අමාත්‍යාංශය එක්ව විශේෂ විමර්ශන සහ පරීක්ෂණ ආරම්භ කර ඇති බව ද නියෝජ්‍ය අමාත්‍යවරයා පැවසීය.

“දින තුනක් ඇතුළත බන්ධනාගාර හතරක මෙවැනි සිදුවීම් වාර්තා වීම පිටුපස විවිධ හේතු තිබිය හැකියි. ඒ පිළිබඳව ඊයේ සවස ජනාධිපතිතුමාගේ ප්‍රධානත්වයෙන් විශේෂ සාකච්ඡාවක් ද පැවැත්වුණා. දැනට පවතින විමර්ශන කටයුතු නිසා ඒ පිළිබඳව වැඩිදුර තොරතුරු අනාවරණය කිරීම මේ මොහොතේ සුදුසු නැහැ,” යනුවෙන් ඔහු වැඩිදුරටත් ප්‍රකාශ කළේය.

රටේ මුහුදු සීමාව ඇතුළු සමස්ත දිවයින පුරාම ජාතික ආරක්ෂාව සම්බන්ධයෙන් කිසිදු ගැටලුවක් නොමැති බව අවධාරණය කළ අරුණ ජයසේකර මහතා, මහජන සාමය සහ නීතිය පවත්වාගෙන යාම සඳහා ඕනෑම අවස්ථාවක පොලිසියට සහාය වීමට ත්‍රිවිධ හමුදාව සූදානමින් සිටින බව ද සඳහන් කළේය.

ආණ්ඩුක්‍රම ව්‍යවස්ථාවට අනුකූලව මහජන ආරක්ෂාව තහවුරු කිරීම සඳහා රජය උපරිම විශ්වාසයකින් යුතුව කටයුතු කරන බව ද ඔහු මෙහිදී අවධාරණය කර සිටියේය.

---