රාජ්‍ය සේවකයන්ට අති විශේෂ නිවේදනයක්

2026 ඔක්‍තෝබර් 02, පෙ.ව. 12:03

---

---

රට තුළ දරුවන්ගේ ආරක්ෂාව පිළිබඳව පවතින අවදානම ඉහළ යමින් පවතින පසුබිමක, ළමා ආරක්ෂාව ශක්තිමත් කිරීමේ අරමුණින් නව නීතිමය අවශ්‍යතාවක් හඳුන්වා දීමට රජය පියවර ගනිමින් සිටී.

රාජ්‍ය සේවයට සහ දරුවන් සමඟ සෘජුවම සම්බන්ධ වන තනතුරු සඳහා පුද්ගලයින් බඳවා ගැනීමේදී, ඔවුන් ළමුන් සම්බන්ධ අපරාධවලට චෝදනා ලබා නොමැති බව තහවුරු කරන සහතිකයක් ලබා ගැනීම අනිවාර්ය කිරීමට කාන්තා හා ළමා කටයුතු අමාත්‍යාංශය තීරණය කර ඇත.

මේ සඳහා අවශ්‍ය කැබිනට් පත්‍රිකාව දැනටමත් අනුමැතිය සඳහා ඉදිරිපත් කර ඇති බව අමාත්‍යාංශය සඳහන් කරන අතර ඊට අදාළ සහතිකය පොලිසියෙන් ලබාගත හැකිය.

එමෙන්ම, රාජ්‍ය සේවයේ නියුතු සේවකයින්ට තම සේවය ස්ථිර කිරීමේදී සහ වැටුප් වර්ධක ලබා ගැනීමේදී, අදාළ කාලසීමාව තුළ ළමුන් සම්බන්ධ අපරාධවලට සම්බන්ධ වී නොමැති බව තහවුරු කරන සහතිකය අලුත් කර ඉදිරිපත් කිරීමට ද සිදුවනු ඇතැයි අමාත්‍යාංශය වැඩිදුරටත් පැවසීය.

මෙම නව නීතිමය රාමුව මගින් දරුවන්ට එරෙහි අපරාධ සහ ප්‍රචණ්ඩත්වය වැළැක්වීමටත්, ළමා ආරක්ෂණ ක්‍රියාමාර්ග තවදුරටත් ශක්තිමත් කිරීමටත්, රාජ්‍ය සේවය තුළ විනිවිදභාවය ඉහළ නැංවීමටත් දායක වනු ඇතැයි රජය අපේක්ෂා කරයි.

---