ලෝකේ යුද්ධයක් තිබ්බත් ආණ්ඩුවේ හොඳකම නිසා ඒක දැනෙන්නේ නෑ..- ලාල් කාන්ත

2026 ඔක්‍තෝබර් 15, පෙ.ව. 12:17

ලෝකයේ යුද ගැටුම් පැවතියද වත්මන් රජයේ නිසි කළමනාකරණය සහ මැදිහත්වීම හේතුවෙන් එහි අහිතකර බලපෑම මෙරට ජනතාවට දැඩි ලෙස නොදැනෙන මට්ටමින් පාලනය කර ඇති බව කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ. ඩී. ලාල්කාන්ත මහතා ප්‍රකාශ කළේය.

වැඩසටහනකට එක්වෙමින් අදහස් දැක්වූ අමාත්‍යවරයා පෙන්වා දුන්නේ, ලෝකයේ පවතින යුද වාතාවරණය හේතුවෙන් ගෝලීය වශයෙන් ඉන්ධන සහ පොහොර මිල ගණන් සීඝ්‍රයෙන් ඉහළ ගොස් ඇති බවයි.

කෙසේ වෙතත්, කලාපයේ අනෙකුත් රටවල් හා සැසඳීමේදී මෙරට ජනතාවට අඩු මිලකට ඉන්ධන ලබාදීමටත්, වෙළෙඳපොළ මිල ගණන් පාලනය කිරීමටත් රජයේ මැදිහත්වීම මත හැකියාව ලැබී ඇති බව හෙතෙම සඳහන් කළේය.

විශේෂයෙන්ම මෙරටට පොහොර ආනයනය කළ ප්‍රධාන රටක් වන ඉරානය ආශ්‍රිත කලාපයේ මතුව ඇති යුද ගැටුම් හේතුවෙන් පොහොර අර්බුදයක් නිර්මාණය වුවද, රජය සහනාධාර ලබාදෙමින් එම තත්ත්වය සාර්ථකව කළමනාකරණය කර ඇති බවද අමාත්‍යවරයා මෙහිදී පැහැදිලි කළේය.

එහිදී ගොවි ජනතාව වෙනුවෙන් ලබාදෙන සහන පිළිබඳව වැඩිදුරටත් අදහස් දැක්වූ අමාත්‍ය කේ. ඩී. ලාල්කාන්ත මහතා මෙසේද පැවසීය:

“අප රජය භාරගන්නා විට හෙක්ටයාරයකට හිමිවූ පොහොර සහනාධාරය රුපියල් 15,000ක්. අප බලයට පත්වූ වහාම එය රුපියල් 25,000 දක්වා ඉහළ දැමුවා. මේ වන විට එම මුදල හෙක්ටයාරයකට රුපියල් 30,000ක් දක්වා වැඩි කර තිබෙනවා. පසුගිය කාලයේ අතිරේක බෝග සඳහා කිසිදු පොහොර සහනාධාරයක් ලැබුණේ නෑ. නමුත් අප බලයට පැමිණි පසු අතිරේක බෝග සඳහා මුලින් රුපියල් 15,000ක්ද, පසුව 18,000ක්ද බැගින් ලබා දුන්නා. එළඹෙන මහ කන්නයේ සිට වී ගොවිතැනට ලබාදෙන ආකාරයෙන්ම අතිරේක බෝග වගාවන් සඳහාද හෙක්ටයාරයකට රුපියල් 30,000 බැගින් වූ පොහොර සහනාධාරය ලබාදීමට පියවර ගන්නවා.”

මෙම සියලු ක්‍රියාමාර්ග ගනු ලබන්නේ මෙරට කෘෂිකාර්මික ක්ෂේත්‍රය යළි නඟාසිටුවා ගොවි ප්‍රජාව සවිබල ගැන්වීමේ අරමුණින් බවද අමාත්‍යවරයා වැඩිදුරටත් අවධාරණය කළේය.