‍රියදුරු බලපත්‍ර ගැන මෝටර් රථ දෙපාර්තුමේන්තුවෙන් නිවේදනයක්

2024 අගෝස්‍තු 23, පෙ.ව. 12:07

2009ට පෙර ලබාගත් රියදුරු බලපත්‍ර ඉදිරි මාස තුන ඇතුළත අවලංගු කිරීමක් පිළිබඳ ප්‍රතිපත්තිමය තීරණයක් මෝටර් රථ දෙපාර්තමේන්තුව හෝ රජය විසින් මෙතෙක් ගෙන නොමැති බව මෝටර් රථ දෙපාර්තුමේන්තුව පවසනවා.

රියදුරන් විසින් 2009ට පෙර ලබා ගන්නා ලද රියදුරු බලපත්‍ර ඉදිරි මාස තුන ඇතුළත අවලංගු කිරීමට මෝටර් රථ දෙපාර්තමේන්තුව කටයුතු කිරීමට සූදානම් කරමින් සිටින බවට පළවන ප්‍රවෘත්තිය සම්බන්ධව අදහස් දක්වමින් එම දෙපාර්තමේන්තුවේ කොමසාරිස් ජනරාල් නිශාන්ත අනුරුද්ධ විරසිංහ මහතා මේ බව පවසා සිටියා.

කෙසේ නමුත් ප්‍රවාහන අමාත්‍යාංශය සමග සාකච්ඡා කර මාර්ග ආරක්ෂාව සම්බන්ධයෙන් මතුව ඇති තත්ත්වය සලකා බලා රියදුරු බලපත්‍රයට අසාදු ලකුණු ලබාදීමේ ක්‍රමවේදයක් ක්‍රියාවට නැංවීම සඳහා කටයුතු මේ වනවිට ආරම්භ කර ඇති බව ඔහු සඳහන් කර තිබෙනවා.

නිශාන්ත වීරසිංහ මහතා මෙහිදී පවසා සිටියේ ඒ අනුව ඉදිරි මාස තුන ඇතුළත මෙම නව ක්‍රමවේදය ක්‍රියාත්මක කිරීමට අදාළ මූලික කටයුතු මේ වනවිට නිර්මාණය වෙමින් පවතින බවයි.

මෙම නව ක්‍රමවේදය හරහා රියදුරෙකු රථවාහන වරදක් සිදුකිරීමෙන් පසු රථවාහන පොලිස් නිලධාරියා විසින් ලබාදෙන දඩ පත්‍රිකාව අනුව එම අවස්ථාවේදීම දඩ මුදල් ගෙවීම සඳහා වූ ඩිජිටල් පද්ධතිය සකස් වී ඇති බවත් එම වරදට හිමිවන දඬුවම් ලකුණු ප්‍රමාණය රියදුරු බලපත්‍රයට එකතු වෙනු ඇති බවත් ඔහු පෙන්වා දෙනවා.

එමෙන්ම, මෙම අසාදු ලකුණු ක්‍රමවේදය ලකුණු 24ක් දක්වා ආ පසු රියදුරු බලපත්‍රය අවලංගුවීම සිදුවනු ඇති බවද ඒ මහතා අවධාරණය කළා.

එසේ අවලංගු වන රියදුරු බලපත්‍රය නැවත ලබාගැනීම සඳහා රියදුරෙකු වසරකට පසු නැවත මුල සිට සියලු කාර්යයන් සම්පූර්ණ කර පැමිණිය යුතුව තිබෙනවා.

දිනකට මෙරට මහා මාර්ගයේ මිය යන පිරිස 7 දෙනෙක් බවත් රිය අනතුරු හේතුවෙන් පූර්ණ ආබාධිත තත්ත්වටයට පත් වන පිරිස් ද ඉහළ යමින් පවතින බැවින්ද මහා මාර්ගයේ විනයක් ඇති කිරීම සඳහා මෙම ක්‍රමවේදය හඳුන්වා දීමට පියවර ගන්නා බව කොමසාරිස් ජනරාල්වරයා තවදුරටත් සඳහන් කළා.