මේ අවුරුද්දේ බදු අඩුවෙන්නේ නෑ

2025 පෙබරවාරි 15, පෙ.ව. 12:05

මෙම වසර ඇතුළත බදු අඩුකිරීමේ හැකියාවක් නොමැති බව කර්මාන්ත හා ව්‍යවසායකත්ව නියෝජ්‍ය අමාත්‍ය චතුරංග අබේසිංහ පවසයි.

ඊට හේතුව ලෙස ඔහු පවසන්නේ, අන්තර්ජාතික මූල්‍ය අරමුදල සමඟ ඇතිකරගත් එකඟතාවන්ට අනුව දළ දේශීය නිෂ්පාදිතයෙන් 15.1%ක් බදු වශයෙන් රජය අයකරගත යුතු වීමයි.

“විශේෂයෙන්ම වක්‍ර බදු අඩුකිරීමක් ක්‍රමානුකූලව ක්‍රියාත්මක කිරීමට සිදුවෙයි. නමුත් මේ වසරේ බදු අඩු කිරීමක් බලාපොරොත්තු වෙන්න බැහැ. ජාත්‍යන්තර මූල්‍ය අරමුදල විසින් නියම කර ඇති පරිදි, දළ දේශීය නිෂ්පාදිතයෙන් 15.1% ක අවශ්‍ය බදු ප්‍රමාණය එකතු කිරීම සිදුවෙනවා. කෙසේවෙතත්, මෙම ක්‍රියාවලියෙන් ආදායම් එකතු කිරීමේ කාර්යක්ෂමතාව වැඩි වූ පසු විවිධ කර්මාන්තවල නිෂ්පාදන සඳහා සහන ලබා දීමට හැකි වනු ඇති” නියෝජ්‍ය අමාත්‍ය චතුරංග අබේසිංහ පවසයි.

තවද, විශේෂයෙන්ම බැංකු අංශයේ සහ කර්මාන්තවල තාක්ෂණික ආයෝජන සඳහා බදු සහන ලබාදීම රජයේ දිගුකාලීන අරමුණ බව ද ඔහු අවධාරණය කරයි.

”ඉදිරි වසරවලදී කාර්මික වර්ධනය සඳහා හිතකර පරිසරයක් නිර්මාණය කිරීම අරමුණු කර ගනිමින් කර්මාන්ත සඳහා අවශ්‍ය පහසුකම් සහ සහාය ලබා දීමට රජය අදහස් කරනවා.”

කාර්මික ආනයන සඳහා නව බදු ප්‍රතිපත්තියක් හඳුන්වාදීමට සැලසුම් කර ඇති බව ද නියෝජ්‍ය අමාත්‍යවරයා පැවසුවේය.

“අපි ‘තීරුබදු ප්‍රතිපත්තිය’ නමින් නව බදු රාමුවක් ක්‍රියාත්මක කරනවා. මෙම ප්‍රතිපත්තිය යටතේ, නිෂ්පාදන යෙදවුම් මත බදු අඩු කිරීම හෝ ඉවත් කිරීම අපගේ අරමුණයි. සෑම කර්මාන්තකරුවෙකුටම තම නිෂ්පාදන ක්‍රියාවලීන් සඳහා අවශ්‍ය ආනයනික යෙදවුම් පිළිබඳව පැහැදිලි අවබෝධයක් දැන් තිබෙනවා. තීරු බදු ප්‍රතිපත්තියේ හරය මෙයයි,” ඔහු පැහැදිලි කළේය.