මීගමු හිරගෙදර ගැටුම ගැන අජිත් පෙරේරාගෙන් බරපතල හෙලිදරව්වක්

2026 ජූලි 08, පෙ.ව. 12:15

---

---

මීගමු බන්ධනාගාරයේ ඇති වූ නොසන්සුන්කාරී තත්ත්වය සහ එහිදී සිදුවූ මරණ සම්බන්ධයෙන් රජයේ සහ විෂයභාර අමාත්‍යවරයාගේ ක්‍රියාකලාපය දැඩි ලෙස විවේචනය කරමින් පාර්ලිමේන්තු මන්ත්‍රී අජිත් පී. පෙරේරා මහතා පාර්ලිමේන්තුවේදී අදහස් දැක්වීය.

2026 ජූලි මස 05 වන ඉරිදා දහවල් 1:00 ට පමණ මීගමු බන්ධනාගාරය තුළ ඉතා ගැඹුරු අර්බුදයක් මතු වූ බව මන්ත්‍රීවරයා පැවසීය. රැඳවියන් 2,400 කට අධික පිරිසක් සිටින මෙම බන්ධනාගාරයේ කණ්ඩායම් දෙකක් අතර ගැටුමක් හටගෙන ඇති අතර, තවත් කාන්තාවන් පිරිසක් තමන්ට නිසි ප්‍රතිකාර නොලැබෙන බව පවසමින් වහලය මත නැගී විරෝධතාවයක නිරත වී ඇත. එදින සවස 4:00 වන විට පුද්ගලයින් 24 දෙනෙකු රෝහල්ගත කර තිබූ අතර දෙදෙනෙකු මියගොස් ඇති බවට වාර්තා වූ බව ඔහු අනාවරණය කළේය.

මෙවැනි බරපතළ තත්ත්වයක් පවතිද්දී අමාත්‍යවරයා ඒ පිළිබඳව නිසි තොරතුරු දැන නොසිටීම මන්ත්‍රීවරයාගේ දැඩි දෝෂදර්ශනයට ලක් විය. මියගිය සහ තුවාල ලැබූ සංඛ්‍යාව පිළිබඳව මාධ්‍ය විමසූ අවස්ථාවේදී, “තමන් පසුගිය පැය දෙක තුළ සමාජ මාධ්‍ය බැලුවේ නැති නිසා ඒ ගැන දන්නේ නැතැයි” අමාත්‍යවරයා පැවසීම හාස්‍යජනක සහ වගකීම් විරහිත ප්‍රකාශයක් බව අජිත් පී. පෙරේරා මහතා පෙන්වා දුන්නේය. බන්ධනාගාරය තුළ සිදුවන දේ පිළිබඳව අමාත්‍යවරයාට රියල් ටයිම් තොරතුරු ලැබිය යුතු බව ඔහු අවධාරණය කළේය.

බන්ධනාගාර දෙපාර්තමේන්තුවේ පවතින පරිපාලනමය අර්බුදය පිළිබඳවද ඔහු කරුණු දැක්වීය. බන්ධනාගාර කොමසාරිස් ජනරාල්වරයා වසරක පමණ කාලයක සිට වැඩබලන මට්ටමේ පසුවන බවත්, ස්ථිර නායකත්වයක් නොමැති වීම මෙවැනි ගැටලු පාලනය කිරීමට බාධාවක් වී ඇති බවත් ඔහු පැවසීය. මීට පෙර අනුරාධපුර බන්ධනාගාරයේ සිදුවූ අක්‍රමිකතා සම්බන්ධයෙන්ද මෙතෙක් විධිමත් විනය ක්‍රියාමාර්ග ගෙන නොමැති බව ඔහු සිහිපත් කළේය.

ගැටුම පාලනය කිරීම සඳහා විශේෂ කාර්ය බලකාය හෝ හමුදාව කඩිනමින් කැඳවීමට පියවර නොගත්තේ මන්දැයි මන්ත්‍රීවරයා ප්‍රශ්න කළේය. බන්ධනාගාරය තුළ මරණයක් සිදුවූ විට මහේස්ත්‍රාත්වරයාට විශේෂ බලතල පවතින නමුත්, මහේස්ත්‍රාත්වරයා එම ස්ථානයට ගෙන්වා ගැනීමට හෝ කටයුතු කර නොමැති බව ඔහු චෝදනා කළේය.

ගැටුම් පාලනය කිරීම පිළිබඳ විශේෂ පුහුණුවක් නොමැති බුද්ධි අංශ නිලධාරීන් පිරිසක් සඳුදා උදෑසන බන්ධනාගාරය තුළට යැවීම පිළිබඳවද ඔහු විවේචනය කළේය. මිනීමැරුම් චෝදනා ලැබූ සහ ප්‍රචණ්ඩකාරී ඉතිහාසයක් ඇති පුද්ගලයින් සිටින ස්ථානයකට මෙලෙස නිසි පුහුණුවක් නැති පිරිස් යැවීම අනතුරුදායක බව ඔහු පෙන්වා දුන්නේය.

බන්ධනාගාර නිලධාරීන් අතර ඩෙංගු රෝගය පැතිර යාම හේතුවෙන් නිලධාරීන් සංඛ්‍යාව අඩු වී ඇති බවත්, එමගින් පාලන කටයුතු තවදුරටත් දුෂ්කර වී ඇති බවත් මන්ත්‍රීවරයා සඳහන් කළේය.

අවසාන වශයෙන් අජිත් පී. පෙරේරා මහතා අවධාරණය කළේ, මෙම සමස්ත සිදුවීම සම්බන්ධයෙන් විෂයභාර අමාත්‍යවරයා, රාජ්‍ය ආරක්ෂක අමාත්‍යවරයා සහ පොලිස් අමාත්‍යවරයා ඇතුළු වගකිවයුතු සියලු දෙනා අසමත් වී ඇති බවයි.

---