යාපනයේත් වහපු පාරවල් විවෘත කර දෙන්න

2024 සැප්‍තැම්‍බර් 30, පෙ.ව. 12:04

---

---

යාපනයේ, අධි ආරක්ෂිත කලාපවල පිහීටි ප්‍රධාන මාර්ග කිහිපයක් ජනතාවගේ පරිහරණය උදෙසා විවෘත කිරීමට පියවර ගන්නා ලෙස හිටපු පාර්ලිමේන්තු මන්ත්‍රී අංගජන් රාමනාදන් මහතා ජනාධිපති අනුර කුමාර දිසානායක මහතාගෙන් ඉල්ලීමක් කර තිබෙනවා.

ජනාධිපතිවරයා වෙත ලිපියක් යොමු කරමින් රාමනාදන් මහතා පෙන්වා දී ඇත්තේ, යුද්ධය අවසන් වී වසර 15 කට වැඩි කාලයක් ගතවී ඇතත්, ජන ජීවිතයට ඉතා තීරණාත්මක ලෙස බලපාන මාර්ග කිහිපයක් තවමත් වසා දමා ඇති බවයි.

මෙම මාර්ග වසා තැබීම හේතුවෙන් උතුරු ප්‍රදේශවල ජනතාවගේ දෛනික කටයුතු සහ ගමනාගමනය සීමා කර ඇති බවද අංගජන් රාමනාදන් මහතා අවධාරණ කරනවා.

මාර්ග බාධක යොදා වසා තිබූ කොළඹ කොටුව ජනාධිපති මන්දිරය ඉදිරිපිට මාර්ග දෙකක් යළි විවෘත කරන ලෙසට ජනාධිපතිවරයා විසින් ගත් තීරණය තමා අගය කරන බවත් ඒ අනුව යමින්, යාපනයේ අධි ආරක්ෂිත කලාපවල පිහිටි මාර්ග කිහිපයක් විවෘත කරන ලෙසත් හිටපු පාර්ලිමේන්තු මන්ත්‍රී අංගජන් රාමනාදන් මහතා සිය ලිපිය මඟින් ඉල්ලා තිබෙනවා.

ඔහු තවදුරටත් පවසා ඇත්තේ මෙම පියවර මඟින් ජාතික සංහිඳියාව මෙන්ම ප්‍රාදේශීය සංවර්ධනයද ශක්තිමත් වනු ඇති බවයි.

ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපතිවරයෙකු වන හිටපු පාර්ලිමේන්තු මන්ත්‍රීවරයෙකු වූ අංගජන් රාමනාදන් මහතා පසුගිය ජනාධිපතිවරණයේදී රනිල් වික්‍රමසිංහ මහතාට සහය පළ කළා.

---