ඉරිදාට ගුරුවරු කැඳවීම කෙසේවත් සිදුකළ නොහැකි දෙයක් – ලියුම් එව්වට ගුරු සංගම්වලින් දැඩි විරෝධයක්

2026 මාර්තු 26, පෙ.ව. 10:36

---

---

තංගල්ලේ පැවති ගුරු හමුවකට සහභාගි නොවීම සම්බන්ධයෙන් කරුණු පැහැදිලි කරන මෙන් දන්වමින් තංගල්ල කලාප අධ්‍යාපන කාර්යලය සිදුකළ ඉල්ලීම දැඩි ලෙස හෙළා දකින බවට හම්බන්තොට දිස්ත්‍රික් ලංකා ගුරු සංගමය සඳහන් කරයි.

ඒ අනුව එම සංගමයේ දිස්ත්‍රික් ලේකම් සුරංග චින්තක මහතා කියා සිටියේ, කලාප අධ්‍යාපන අධ්‍යක්ෂවරියට එසේ කටයුතු කිරීමට කිසිදු හැකියාවක් නොමැති බවයි.

ඉකුත් 15 වන ඉරු දින තංගල්ල ප්‍රදේශයේ දී අග්‍රාමාත්‍යවරියගේ ප්‍රධානත්වයෙන් පැවති උත්සවයකට ගුරුභවතුන් සහභාගී නොවීමට හේතුව දන්වන මෙන් තංගල්ල කලාප අධ්‍යාපන කාර්යාලය විසින් කලාපයේ විදුහල්පතිවරුන් වෙත ලිඛිතව දැනුම් දී තිබෙනවා.

ඒ අනුව එම දැනුම්දීම සම්බන්ධයෙන් ඊයේ (25) පැවති මාධ්‍ය හමුවකදී හම්බන්තොට ලංකා ගුරු සංගමයේ ලේකම් සුරංග චින්තක මහතා අදහස් දක්වමින් කියා සිටියේ,

“ඉරිදා දිනයේ දී ගුරුවරු කැඳවීම කෙසේවත් සිදුකළ නොහැකි දෙයක්. ඒ නිසා අපි මේ ක්‍රියාව දැඩි ලෙස හෙළා දකිනවා. අපි තවදුරටත් මේ ගැන ගුරුවරු දැනුවත් කිරීමේ ක්‍රියාවලියේ යෙදෙනවා. මේ ආණ්ඩුව පත්වෙන්නේ ගුරුවරු පාරේ ඉඳලා, කෑ ගහලා කළු කොඩි අරන් ඇවිත් පැවති පාලනය බිඳ දමලා නව යුගයක් කරා ගෙනයෑමට ගුරුවරු තමා පෙරටුගාමීන් වුණේ. හැබැයි අද වෙද්දි පළමු ෂොට් එක ගුරුවරුන්ට වැදෙමින් පවතිනවා.”

---