වීදුරුවෙන් එළියට අත දාලා උදවු ඉල්ලලා කෑ ගැහුවා… බොහෝ පිරිසක් බලා සිටියදී සයින්දමරුදු ඇළේ ගිලුණු මල් කැකුළ ගැන ඇහෙන සංවේදී කතාව

2025 නොවැම්‍බර් 30, පෙ.ව. 12:06

දින කිහිපයක් පුරා දිගාමඬුල්ල නිල්වන් අහස් කුස වසාදමමින් මහ වැසි ඇදහැලෙමින් තිබිණි.

දිවා රෑ නැතිව එක දිගට ඇදහැලෙන මහ වරුසාව නිසා ඇළදොළ පිටාර ගලන්නට විය. කොණ්ඩවටානේ ගඟ පිටාර ගලද්දී ඉඟිනියාගල අම්පාර මාර්ගය ජලයෙන් යට වන්නට විය. අලහේනේ වැව් පිරී ඉතිරෙද්දී දමන පාදගොඩ මහා මාර්ගයද ජලයේ ගිලී ගියේය.

පසුගිය වසරේ පාසල් සිසුන් හත් දෙනකු ඇතුළු දස දෙනකු ට්‍රැක්ටරයක් පෙරළී මියගිය අම්පාර කල්මුණේ මාර්ගයේ මාවඩී පල්ලි ප්‍රදේශයද ජලයෙන් යටව තිබීම නිසා එම මාර්ගයේද ගමනාගමන කටයුතු සඳහා බාධා පැමිණෙමින් තිබිණි.

ඊට අමතරව චවල කඩේ මාර්ගයද ජලයෙන් යටව තිබීම නිසා නාවික හමුදාවෙන් බෝට්ටු පවා යොදාගෙන ප්‍රවාහන පහසුකම් සැපයුවේ මහවැසි මැදය.

එලෙස ත්‍රිවිධ හමුදාව, පොලීසිය ඇතුළු ආරක්ෂක අංශ පවතින දැඩි ගංවතුරෙන් ජීවිත බේරාගැනීමට කටයුතු කරමින් සිටියදී කිසිවකු නොසිතූ අවාසනාවන්ත සිදුවීමක් සයින්දමරුදු ප්‍රදේශයෙන් අසන්නට ලැබිණි. මෝටර් රථයක් එහි වූ සිඟිති දැරියකද ඇතුළු තිදෙනකු සමඟ දියේ ගිලී යෑමක් ඒ පුවතින් කියවිණි.

සයින්දමරුදුවලින් ගලා යන කරිවාපච්චු ඇළ වෙනදා මෙන් කෙඬෑරිව නොතිබිණි. දින කීපයක සිට ඇදහැලෙන මහා වැසි නිසා එය ප්‍රචණ්ඩව පිරී ඉතිරී ගලා යන්නට විය.

සයින්දමරුදු, ඔරාබිපාර, අංක 268 ලිපිනයේ පදිංචි හැට දෙහැවිරිදි සින්න ලෙබ්සබේ සබුර්දීන් විසින් සිය බිරිය වූ හැට හැවිරිදි මොහොමඩ් තම්බි තස්වින් හා ඔවුන්ගේ මිනිපිරිය වූ සය හැවිරිදි සුරතල් මොහොමඩ් ජෙරින් අසලා මෙහවිස් ද නංවාගෙන පදවන ලද ඩබ්ලිව්.පී. සී.ඒ.එස් 6950 සුදු පැහැති වෙසල් වර්ගයේ මෝටර් රථය ඉදිරියට ඇදෙමින් තිබිණි.

එක්වරම ඉදිරියෙන් වේගයෙන් යතුරුපැදියක් පැමිණෙන්නට විය. යතුරුපැදියේ ගැටේවියි බියෙන් සබුර්දින් රිය වහාම මාර්ගයේ පසෙකට ගත්තේය. එහෙත් සිදු වූයේ නොසිතූ දෙයකි. ඔහුගේ පාලනයන් ගිලිහී ගිය කාරය කරියපච්චු ඇළට පෙරළී යන්නට වූයේ ඇසිල්ලකිනි. සබුර්දීන් උදවු ඉල්ලා කෑගැසුවත් බොර පැහැති සීතල වතුරේ කාරය සෙමෙන් සෙමෙන් පහළටම ඇදී යන්නට විය.

“මෙන්න කාර් එකක් ඇළට වැටිලා…” යැයි කෑගසමින් දුටු දුටුවෝ ඇළ අසලට දුව එන්නට වූහ. මොහොතක් ගත වන විට ඇළ අසලට විශාල සෙනඟක් පිරී සිටියහ. සබුර්දීන් පැති වීදුරුවෙන් එළියට අත දමා උදවු ඉල්ලා කෑගැසුවේය. දියට පනින්නට කිසිවකු නිර්භීත වූයේ නැත.

මේ අතර කිහිප දෙනෙක් ලණුවක් විසි කර, එය අල්ලා වාහනේ ගැටගසන ලෙස කෑගසන්නට වූහ. කෙසේ වෙතත් සබුර්දීන්ට ඒ ලණුව අල්ලා ගැටගසන්නට හැකියාවක් තිබුණේ නැත.

මොහොතක් ගත වෙද්දී කායේ ඉදිරිපස මඩ පැහැති දිය තුළ ගිලී යන්නට විය. තවත් තත්පර කිහිපයක් යන විට කාරය මුළුමනින්ම දිය තුළ ගිලිණි.

මේ සිද්ධිය දැනගත් සැණින් සයින්දමරුදු පොලීසියේ ස්ථානාධිපතිවරයා ඇතුළු නිලධාරීන් සහ ආරක්ෂක අංශ කඩිනමින් ක්‍රියාත්මක වන්නට වූහ. ඔවුන් එම ස්ථානයට ළං වන විටත් විශාල පිරිසක් එම ස්ථානයට පැමිණ සිටියහ.

ජීවිතාරක්ෂක කණ්ඩායම් සහ ප්‍රදේශවාසීහු ගිලුණු කාරය ගොඩ ගැනීමේ මෙහෙයුම ආරම්භ කරන්නට වූහ. පැයක් පමණ කාලයක් දැඩි වෙහෙසක් දරා බැකෝ යන්ත්‍රද යොදාගෙන කාරය ගොඩ ගැනිණි.

එහි හිර වී සිටි සිඟිති දැරිය මෙහවිස් ඇතුළු තිදෙනා එළියට ගෙන කඩිනමින් කල්මුණේ අශ්රෆ් අනුස්මරණ රෝහල වෙත රැගෙන ගිය නමුත් ඒ වන විටත් ඔවුන් අවසන් සුසුම් හෙළා තිබිණි.

මේ ආකාරයට අවාසනාවන්ත ලෙස සීයා, අත්තම්මා සහ මිනිපිරියගේ මරණ පරීක්ෂණ කටයුතු 28 දින දහවල් කල්අමුණේ අශ්රෆ් අනුස්මරණ රෝහලේදී සිදු කරනු ලැබූ අතර, ඔවුන්ගේ සිරුරු පිළිබඳ අවසන් කටයුතු එදින සවසම සිදු කෙරිණි.