ඉන්ධන අර්බුදයෙන් වාහන ඉල්ලුම හොදටම බහී

2026 මාර්තු 27, පෙ.ව. 12:19

ශ්‍රී ලංකාව තුළ වාහන අලෙවිය මේ වන විට දැවැන්ත ලෙස පහත වැටී ඇති බව වාහන ආනයනකරුවන් ප්‍රකාශ කරති.

එහෙත්, සාම්ප්‍රදායික වාහන සඳහා පවතින ඉල්ලුම අඩු වුවද, විදුලි වාහන සඳහා වන ඉල්ලුම පෙරට වඩා යම් මට්ටමක වර්ධනයක් පෙන්නුම් කරන බව ඔවුන් සඳහන් කරයි.

වෙළඳපොළ විශ්ලේෂකයන් පෙන්වා දෙන්නේ මෑතකදී ඇති වූ ඉන්ධන අර්බුදය සහ ඉන්ධන මිල ශීඝ්‍රයෙන් ඉහළ යාම මෙම තත්ත්වයට ප්‍රධානතම හේතුව වී ඇති බවයි.

ඇතැම් වාහන අලෙවි නියෝජිතයන් පවසන පරිදි, වෙනදා පාරිභෝගිකයන්ගෙන් ලැබෙන විමසීම් සහ දුරකථන ඇමතුම් ප්‍රමාණය පවා මේ වන විට සැලකිය යුතු ලෙස අවම වී ඇත.

ඉන්ධන පිරිවැය ඉහළ යාමත් සමඟ බොහෝ පාරිභෝගිකයන් විදුලි වාහන කෙරෙහි උනන්දුවක් දක්වන බවක් පෙනෙන්නට තිබේ.

මේ හේතුවෙන් අනෙකුත් වාහන කාණ්ඩවලට සාපේක්ෂව විදුලි වාහන සඳහා වන ඉල්ලුමේ යම් ස්ථාවරත්වයක් හෝ සුළු ඉහළ යාමක් නිරීක්ෂණය වේ.

පවතින ගෝලීය යුදමය තත්ත්වයන් සහ ජාත්‍යන්තර දේශපාලනික අස්ථාවරත්වය හේතුවෙන් ඉදිරියේදී වාහන මිල ගණන් තවදුරටත් වෙනස් වීමට ඇති ඉඩකඩ වැඩි බව වාහන ආනයනකරුවෝ වැඩිදුරටත් අනතුරු අඟවති.

මේ හේතුවෙන් මෙරට වාහන වෙළඳපොළ ඉදිරි මාස කිහිපය තුළ දැඩි අභියෝගාත්මක කාලසීමාවකට මුහුණ දෙනු ඇතැයි අපේක්ෂා කෙරේ.