යලිත් ඉන්ධන, ගෑස් මිල වෙනස් කරන්න වෙයි.. සියළු බර ජනතාවට දාන්නෑ.. රජයත් දරනවා..- මාලිමා මන්ත්‍රි

2026 මැයි 19, පෙ.ව. 12:10

---

---

ලෝක වෙළෙඳපොළේ පවතින තත්ත්වයන් මත ඉදිරියේදී ඉන්ධන සහ ගෑස් මිලෙහි යම් වෙනස්වීම් සිදුවීමේ සම්භාවිතාවක් පවතින බව ජාතික ජන බලවේගයේ පාර්ලිමේන්තු මන්ත්‍රී චන්දන සූරියආරච්චි මහතා පවසයි.

ලෝක වෙළෙඳපොළේ පවතින අනාරක්ෂිත භාවය හේතුවෙන් ඉන්ධන සහ ගෑස් මිල ස්ථාවර වන තෙක් මෙම අවදානම පවතින බව පෙන්වා දෙන මන්ත්‍රීවරයා, පසුගිය පෙබරවාරි මාසයට සාපේක්ෂව මැයි මාසය වන විට ඉන්ධන ආනයනය සඳහා වැය කරන ඩොලර් ප්‍රමාණය ඩොලර් මිලියන පහකින් පමණ ඉහළ ගොස් ඇති බව සඳහන් කළේය.

මෙහිදී ඇතිවන අමතර වැය බර පියවා ගැනීමට රජයට සිදුවන නමුත්, එහි සම්පූර්ණ බර පාරිභෝගිකයා මත පැටවීමට රජය කටයුතු නොකරන බව ඔහු අවධාරණය කළේය. 

ඒ වෙනුවට රජය, තෙල් සංස්ථාව සහ පාරිභෝගික ජනතාව යන පාර්ශව තුනම මෙම වැය බර බෙදා ගන්නා ක්‍රමවේදයක් දැනට කළමනාකරණය කරමින් පවතින බව මන්ත්‍රීවරයා ප්‍රකාශ කළේය.

පවතින මිල තත්ත්වයන් යටතේ වුවද රජය විශාල සහනයක් ජනතාවට ලබා දෙන බවත්, දැනට ඩීසල් ලීටරයකට රුපියල් 100ක් සහ පෙට්‍රල් ලීටරයකට රුපියල් 20ක බරක් භාණ්ඩාගාරය විසින් දරනු ලබන බවත් ඔහු අනාවරණය කළේය. 

ඉදිරියේදී ජාත්‍යන්තර වෙළෙඳපොළේ මිල ඉහළ යාමට සාපේක්ෂව යම් මිල සංශෝධන කිරීමට සිදු වුවද, එහි 100%ක බර මහජනතාව මත පැටවීම වැළැක්වීමට රජය අවශ්‍ය පියවර ගන්නා බව චන්දන සූරියආරච්චි මහතා වැඩිදුරටත් පැවසීය.

විදුලි ගාස්තු සංශෝධනයේදී ද රජය මෙම ප්‍රතිපත්තිය අනුගමනය කළ බව පෙන්වා දුන් මන්ත්‍රීවරයා, විදුලි ඒකක 0 සිට 180 දක්වා පරිභෝජනය කරන පාරිභෝගිකයන් සඳහා 11%ක විදුලිබිල වැඩිවීම අදාළ නොවන ලෙස කටයුතු කර ඇති බවද මතක් කර දුන්නේය

---