ඒකාබද්ධ සේවාවන්හි වාර්ෂික ස්ථාන මාරු ගැන නව චක්‍රලේඛයක්

2026 මැයි 30, පෙ.ව. 12:19

ඒකාබද්ධ සේවාවන්ට අයත් නිලධාරීන්ගේ වාර්ෂික ස්ථාන මාරු විවිධ හේතූන් මත ක්‍රියාත්මක නොවීම සම්බන්ධයෙන් පැන නැඟී ඇති ගැටලු නිරාකරණය කිරීම සඳහා නව චක්‍රලේඛයක් නිකුත් කර ඇත.

අමාත්‍යාංශ ලේකම්වරුන්, දෙපාර්තමේන්තු ප්‍රධානීන් සහ අදාළ නිලධාරීන් විසින් සිදුකර ඇති විමසීම් සැලකිල්ලට ගනිමින් මෙම උපදෙස් හා මාර්ගෝපදේශ නිකුත් කර ඇත.

රාජ්‍ය සේවා කොමිෂන් සභාව විසින් අනුමත කළ ස්ථාන මාරු පටිපාටිය අනුව ඒකාබද්ධ සේවා අධ්‍යක්ෂ ජනරාල්වරයා විසින් වාර්ෂික ස්ථාන මාරු චක්‍රලේඛය නිකුත් කරනු ලබයි.

මෙම වාර්ෂික ස්ථාන මාරු ක්‍රියාවලිය මඟින් නිලධාරීන්ට විවිධ සේවා ස්ථානවල සේවය කිරීමේ අවස්ථාව හිමිවන අතර එමඟින් නිලධාරීන්ගේ අභිප්‍රේරණය ඉහළ නැංවීම සහ ආයතනවල සේවා අවශ්‍යතා සපුරාලීම අපේක්ෂා කරයි.