ගුරුවරුන්ගේ හා විදුහල්පතිවරුන්ගේ වැටුප් වැඩිවීම පිළිබඳව අධ්‍යාපන ඇමතිගෙන් ප්‍රකාශයක්

2024 අගෝස්‍තු 31, පෙ.ව. 12:05

---

---

ඡන්ද පොරොන්දු මගින් වර්තමාන ගුරුවරුන් රැවටිය නොහැකි බවත් ප්‍රායෝගික ව ක්‍රියාවට නැංවිය හැකි ක්‍රමවේදයක් අනුව සමස්ත රාජ්‍ය සේවයේ ම වැටුප් විෂමතා ඉවත් කර වැටුප් ඉහළ නංවන බව අධ්‍යාපන අමාත්‍ය ආචාර්ය සුසිල් ප්‍රේමජයන්ත පවසනවා.

ඒ අනුව 2025 ජනවාරි සිට රාජ්‍ය සේවකයකුගේ අවම වැටුප රු. 55,000/-ක් දක්වා ඉහළ නංවන බව අමාත්‍යවරයා සඳහන් කළා.

අමාත්‍යවරයා කියා සිටියේ රජය සකස් කර ඇති අය-වැය සැලසුම් අනුව අවශ්‍ය ප්‍රතිපාදන සපයා ගැනීමේ ක්‍රමවේද හරහා මෙම වැටුප් වැඩිවීම ක්‍රියාවට නැංවන බවයි.

ඒ අනුව මෙම වැටුප් වැඩි වීමේදී ගුරුවරුන්ගේ වැටුප් ඉතා ඉහළ අගයකින් වැඩි වන බව අමාත්‍යවරයා පැවසීය.

එසේ ම මෙම වැටුප් වැඩිවීම සිදු කරන බව රජය පවසන්නේ සහේතුකව බව අමාත්‍යවරයා මෙහිදී අවධාරණය කර සිටියා.

රජය විසින් බංකොලොත්භාවයේ සිට වසර දෙකක් පමණ ක්‍රමානුකූල ව ගොඩනගාගෙන පැමිණෙන රටේ ආර්ථිකය ඉදිරියටත් වර්ධනය කිරීමේ හැකියාව හා පඩි වැඩි කිරීමේ සැබෑ හැකියාව වත්මන් රජය සතු ව පවතින බව අධ්‍යාපන අමාත්‍ය ආචාර්ය සුසිල් ප්‍රේමජයන්ත වැඩිදුරටත් කියා සිටියා.

අමාත්‍යවරයා මේ බව පැවසුවේ අධ්‍යාපන අමාත්‍යංශයේ පැවති මාධ්‍ය දැනුම්වත් කිරීමේ වැඩසටහනකට සහභාගි වෙමින්.

---