ශිෂ්‍යත්ව විභාගයේ පළමු ප්‍රශ්න පත්‍රය යළි පැවැත්වෙයි?

2024 සැප්‍තැම්‍බර් 26, පෙ.ව. 12:04

ශිෂ්‍යත්ව විභාගයේ පළමු ප්‍රශ්න පත්‍රය යළි පවත්වන්නේ ද නැද්ද යන්න සම්බන්ධයෙන් මෙම සතිය ඇතුළත තීරණයක් ගැනීමට විභාග දෙපාර්තමේන්තුව තීරණය කර ඇති බවයි වාර්තා වන්නේ.

එම තීරණය ගැනීම ප්‍රමාද වීමට හේතු වී ඇත්තේ, සිද්ධිය සම්බන්ධයෙන් පරීක්ෂණ පවත්වන අපරාධ පරීක්ෂණ දෙපාර්තමේන්තුවෙන් අතුරු වාර්තාවක් හෝ විභාග දෙපාර්තමේන්තුවට මෙතෙක් නොලැබීමය. අනුමාන ප්‍රශ්න සාකච්ඡා කළ අලව්වේ ගුරුවරයා සැඟවී සිටීම සිද්ධියට අදාළ පරීක්ෂණ ප්‍රමාද වීමයි.

මේ වන විට අනාවරණය වී ඇති පරිදි දැනට අත්අඩංගුවට ගෙන සිටින ජාතික අධ්‍යාපන ආයතනයේ සැලසුම් අධ්‍යක්ෂ ඊ.පී.එස්. ප්‍රේමතිලක විසින් ප්‍රශ්න පත්‍ර සකස් කරන මණ්ඩලයට ඉදිරිපත් කළ ප්‍රශ්න 16ම විභාගයට පෙර අනුමාන ප්‍රශ්න ලෙස සාකච්ඡා කර ඇති අතර එම ප්‍රශ්න 16න් ශිෂ්‍යත්ව ප්‍රශ්න පත්‍රයට ඇතුළත් වී ඇත්තේ ප්‍රශ්න 3ක් පමණි.

එමෙන්ම විභාගයට පෙර එම ප්‍රශ්න 16ම සාකච්ඡා කර තිබෙන හෙයින් එම ප්‍රශ්න පිට වී ඇත්තේ විභාග දෙපාර්තමේන්තුවෙන් නොවන බව තහවුරු වී ඇත.

පරීක්ෂණ පවත්වන අංශවලට ගැටලුවක් වී ඇත්තේ සැලසුම් අධ්‍යක්ෂවරයා සකස් කළ ප්‍රශ්න අලව්වේ ගුරුවරයාට ලබා දුන්නේ ද නැතහොත් අලව්වේ ගුරුවරයා සකස් කළ ප්‍රශ්න සැලසුම් අධ්‍යක්ෂවරයා ලබා ගෙන ඒවා ප්‍රශ්න පත්‍ර සකස් කරන මණ්ඩලයට ලබා දුන්නේද යන්නයි.

කෙසේ වෙතත් සිද්ධිය සම්බන්ධයෙන් පරීක්ෂණ පැවැත්වීම සඳහා විභාග දෙපාර්තමේන්තුව විසින් පත් කරන ලද කමිටුව අලව්වේ ගුරුවරයාගේ නිවසට ගොස් ප්‍රකාශයක් ගෙන තිබූ අතර එහිදී ඔහු පවසා ඇත්තේ එම ප්‍රශ්න තමන් සකස් කළ බවට තහවුරු කළ හැකි ලේඛන ඉදිරිපත් කළ හැකි බවයි.

මේ අතර සබරගමුව පළාතේ පාසලක සිට විභාග දෙපාර්තමේන්තුවට පැමිණ මේ වන විට විශ්‍රාම ගොස් සිටින නිලධාරියෙක් සම්බන්ධ වී වසර අටක සිට ප්‍රශ්න පත්‍ර මුදලට අලෙවි කර තිබෙන බවට බුද්ධි අංශ මේ වන විට අනාවරණය කර ගෙන තිබෙනවා.