මැකොට එරෙහි අශේන්ගේ පෙත්සම සුප්‍රීම් උසාවිය විසිකරයි

2024 ඔක්‍තෝබර් 23, ප.ව. 2:37

---

---

එළැඹෙන මහමැතිවරණයට තරග කිරීම සඳහා තමා ඉදිරිපත් කළ නාමයෝජනා ප්‍රතික්ෂේප කිරීමට ජාතික මැතිවරණ කොමිසම ගත් තීරණය අභියෝගයට ලක්කරමින් යූටියුබ්කරුවකු වන අශේන් සේනාරත්න ගොනුකළ පෙත්සමක් ශ්‍රී ලංකා ශ්‍රේෂ්ඨාධිකරණය අද ප්‍රතික්ෂේප කළේය.

කොළඹ දිස්ත්‍රික්කයෙන් අශේන් සේනාරත්නගේ ස්වාධීන කණ්ඩායමේ නාමයෝජනා ලැයිස්තුව ජාතික මැතිවරණ කොමිසම මීට පෙර ප්‍රතික්ෂේප කර තිබිණි.

එම නාමයෝජනා පත්‍ර අනවසර පුද්ගලයකු විසින් ඉදිරිපත් කර ඇති බව පවසමින් කොමිසම එම කණ්ඩායම නුසුදුස්සකු කරන ලදී.

එකල සමාජ මාධ්‍යවල පළකරන ලද වීඩියෝවක අශේන් සේනාරත්න කලකිරීම ප්‍රකාශ කරමින්, තමා එම පරිශ්‍රයට පැමිණ සිටි නමුත් එළිමහනේ රැඳී සිටින ලෙස ඉල්ලා සිටි බවත්, එමනිසා වෙනත් අපේක්ෂකයෙකු ලිපි ලේඛන ඉදිරිපත් කිරීමට කටයුතු කළ බවත් සඳහන් කළේය.

මේ සම්බන්ධයෙන් අදහස් දක්වමින් මැතිවරණ කොමිෂන් සභාව කියාසිටියේ නාමයෝජනා භාරදිය යුත්තේ නිශ්චිත පුද්ගලයන් විසින් බවත්, මෙම රීතිය පිළිපැදීමට අපොහොසත් වීම නුසුදුස්සකු වීමට හේතු වන බවත්ය.

ඉන් අනතුරුව අශේන් සේනාරත්න මැතිවරණ කොමිසමේ තීන්දුවට එරෙහිව පසුගිය සතියේ ශ්‍රේෂ්ඨාධිකරණයේ නඩුවක් ගොනුකළේය.

---