බන්ධනාගාර නිලධාරීන්ට චීවරය ගලවන්න පුළුවන්ද? පාඨලීගෙන් අනාවරණයක්

2026 ඔක්‍තෝබර් 06, ප.ව. 5:53

---

---

පූජ්‍ය ගලගොඩඅත්තේ ඥානසාර හිමියන් බන්ධනාගාරගත කිරීමෙන් අනතුරුව උන්වහන්සේගේ චීවරය ඉවත් කර ගිහි ඇඳුම් ඇන්දවීම සහ එම ඇඳුමින් අධිකරණයට ඉදිරිපත් කිරීම ශාසනික මෙන්ම නීතිමය වශයෙන් ද බරපතළ වරදක් බව පාඨලී චම්පික රණවක මහතා විශේෂ ප්‍රකාශයක් කරමින් පෙන්වා දෙයි.

ඔහු සඳහන් කරන්​නේ:

චීවරය ඉවත් කිරීමේ ශාසනික බලය:

අධිකරණය මගින් දෙනු ලබන දඬුවම්වලට නීතිය හමුවේ ඕනෑම අයෙකු යටත් විය යුතු වුවද, භික්ෂුවකගේ චීවරය ඉවත් කිරීමේ අයිතිය ඇත්තේ අදාළ භික්ෂු සංස්ථාවට මිස බන්ධනාගාර නිලධාරීන්ට හෝ ආණ්ඩුවට නොවේ. භික්ෂුවක් සතර පාරාජිකාවන්ට (මනුෂ්‍ය ඝාතනය, මෛතුන සේවනය, බරපතළ සොරකම, නොමැති ධ්‍යාන/මාර්ගඵල ඇති බව පැවසීම) හසුවී නොමැති නම් උන්වහන්සේගේ සිවුර ඉවත් කිරීමට බන්ධනාගාරයට කිසිදු බලයක් නොමැත.

අතීත පූර්වාදර්ශ:

උඩුකැන්දවල සරණංකර හිමි: බ්‍රිතාන්‍ය සමයේ සිරගත වූ උඩුකැන්දවල සරණංකර හිමියන්ගේ සිවුර ගැලවීමට උත්සාහ කළ අවස්ථාවේදී, උන්වහන්සේ තමන් සිවුර දැරුවේ මුළු මහත් සංඝ සමාජය ඉදිරියේ බැවින් එය ඉවත් කිරීමේ බලය ද පවතින්නේ සංඝ සමාජයට බව ප්‍රකාශ කළහ. පසුව එදවස අධිකරණ අමාත්‍ය ඩී.බී. ජයතිලක මහතාගේ මැදිහත්වීමෙන් උන්වහන්සේට සිවුර පිටින්ම සිරගෙදර සිටීමට අවසර ලැබුණි.

කුඩාපොල හිමි: කුඩාපොල රාහුල හිමියන්ට වෙඩි තැබීමට පෙර උන්වහන්සේගේ සිවුර ගැලවීමට බ්‍රිතාන්‍යයන් දැක්වූ උත්සාහයට උන්වහන්සේ තදින් එරෙහි වූහ.

සෝමාරාම හිමි: එස්.ඩබ්ලිව්.ආර්.ඩී. බණ්ඩාරනායක මහතා ඝාතනය කළ සෝමාරාම හිමියන් මනුෂ්‍ය ඝාතනයකට (සතර පාරාජිකාවට) සම්බන්ධ වීම සහ පසුව බුද්ධාගම අතහැර ක්‍රිස්තියානි ආගම වැළඳ ගැනීම නිසා එම සිදුවීම මීට අදාළ නොවේ.

ආගමික හා මානව අයිතිවාසිකම්: සිරගත වන වෙනත් ආගමිකයන්ට (සීක් ජාතිකයන්ගේ හිස්වැසුම හෝ මුස්ලිම් ජාතිකයන්ගේ ආගමික ඇඳුම්) සිරගෙදරදී පවා තමන්ගේ ආගමික සංකේත භාවිත කිරීමට අයිතියක් ඇති සේම, ඥානසාර හිමියන්ට ද මූලික මානව අයිතිවාසිකම් සහ ආණ්ඩුක්‍රම ව්‍යවස්ථාවේ 9 වන වගන්තිය මගින් තහවුරු කර ඇති රැකවරණය යටතේ තම ආගමික අයිතිය සුරක්ෂිත විය යුතු බව පාඨලී චම්පික රණවක මහතා අවධාරණය කරයි.

කෝට්ටේ ශ්‍රී කල්‍යාණි සාමග්‍රී ධර්ම මහා සංඝ සභාව මගින් ලබාදී ඇති අනුශාසනාව පිළිගෙන මේ පිළිබඳව වහා මැදිහත් වන ලෙස ජනාධිපතිවරයාගෙන් සහ රජයෙන් ඉල්ලා සිටින අතර, රටේ ආගමික අයිතිවාසිකම් සහ යුක්තිය සුරැකීම සඳහා සමස්ත මහා සංඝරත්නය සහ මහජනතාව පෙරමුණ ගත යුතු බව ද රණවක මහතා වැඩිදුරටත් සඳහන් කරයි.

---