බිස්නස් කරද්දී ඕවා වෙනවනේ! – සිද්ධිය ගැන සේමිණි කට අරී

2025 මැයි 11, ප.ව. 9:09

තමාව අත්අඩංගුවට ගැනීමට හේතු වූයේ තමන්ට අයත් පුද්ගලික ආරක්ෂක සේවා ලබාදෙන ව්‍යාපාරයේ සේවකයන්ගේ සේවක අර්ථ සාධක අරමුදල් පිලිබද ඇති වු ගැටලුවක් පිළිබඳව අධිකරණය මඟින් නිකුත් කර තිබූ සිතාසි තමන්ට නොලැබීම සම්බන්ධ ගැටලුවක් නිසා බව ප්‍රවීණ රංගන ශිල්පී සේමිණි ඉද්දමල්ගොඩ මහත්මිය පවසනවා.

ඒ අනුව ඊයේ (10) දිනයේ සිය සැමියාගේ මෝටර් රථය අනතුරට ලක්වූ බවත් ඔහු සමඟ වැලිකඩ පොලීසියට ගිය අවස්ථාවේදී වරෙන්තු වගයක් ඇති බවට පවසා තමාව අත්අඩංගුවට ගැනීමට කටයුතු කළ බව සේමිණි මහත්මිය පැවසුවා.

ඒ මොහොත වන තෙක් තමා ඒ සම්බන්ධයෙන් දැන නොසිටි බව ඇප මත නිදහස්ව පැමිණි සේමිණි ඉද්දමල්ගොඩ අද (11) මාධ්‍ය වෙත අදහස් දක්වමින්‍ සඳහන් කළා.

අදාළ නඩු සම්බන්ධයෙන් නිකුත් කර තිබූ සිතාසි තමන්ට නොලැබුණු බවත් ඒවා එම ව්‍යාපාරය පවත්වාගෙන ගිය පැරණි කාර්යාලයට ලබා දී තිබිම නිසා ඒ සම්බන්ධයෙන් තමාගේ කිසිදු දැනුවත්වීමක් නොමැති බව ඇය වැඩිදුරටත් ප්‍රකාශ කළා.

මෙම සිතාසි 07 ට අදාළ නඩු සම්බන්ධයෙන් පවතින සියළු ගෙවීම් මේ වනවිටත් ගෙවා අවසන් කර ඇති බවත් ඊට අදාල සියලුම ලියකියිවලි අධිකරණයට ඉදිරිපත් කර ඇති බව ඇය ප්‍රකාශ කර සිටියා.